Kino va tomоshabin o'rtasidagi masofa yaqinmi yoki uzoq?!

[kanishka]

Сообщение от Lutfillo Tursunov

Бу филмнинг бошқа киноларимиздан яққол ажралиб турадиган устунлиги йўқ. Камчиликлариям кўп. Аммо, дейлик биринчи чиқарилган тижорий филмларга нисбатан озгина савия ошган. Тижорат филмларида савия секин ошяпти, энди-энди уларнинг айримлари кино жанрига тушиб бораяпти. Мени фикрим шундай. Одамларнинг кинотеатрларга кўпроқ тушаётгани эса эҳтиёждан. Ишдан бош кўтариб бўш вақтда кино, театрга тушишни истовчилар кўпайяпти. Якшанба, дам олиш куни Миллий театрга спектакл кўришга бордик. Ярим соат аввал билетлар тўлиқ сотиб бўлинган экан. Ташқарида 50 нафарча одам билет топилмаганидан афсусланиб ўтирибди. Жума куни бордик. Бир соатча олдин билет олиб спектаклга тушдим. Зал деярли лиқ тўлди. Бу ерда кино ёки спектаклларнинг "хит"лиги эмас, шунчаки эҳтиёжнинг юқорилиги рол ўйнаяпти. Кинодан ёки спектаклдан бир марта яхши дам олиб чиқдимми, кейинги сафар яна одамнинг боргиси келаверади. Вақти келиб кучли кино ва спектаклларимиз кўпайиб қолар.

Фикрларингиз тўғри, раҳмат. Бошқалар оғзини кўпиртириб кинематографиямизни ёмонлашдан нарига ўтмасди, сиз холис фикр билдирибсиз. ИМХО, ҳар бир кино саноати шу босқичдан ўтади (Хитой ва Ҳиндистоннинг биринчи фильмлари шу қадар расво сифатда эди-ки...), биз бу соҳада кўп давлатлардан олдиндамиз.

[kanishka]

Оффтоп:

Оффтоп:

Сообщение от Colorado

узур у, Навои кинотеатри каерда жойлашкан? иккинчи савол - Амир Темур катта харф билан ёзлса, нега канишка кичик харф билан ......

Канишка - буюк шахс, мен эса унинг номини текиндан-текин ўзлаштириб олганман . Ўзимни катта ҳарфдан Канишка дейишга тил бормайди. Шу учун камтарона канишка деб аталаман (охирги сўз от эмас, феъл) .

[Husen]

Баъзан форумда ЛС орқали ҳам мазмунли суҳбатлар бўлади-ки, уларни форумдошлар билан ҳам ўртоқлашиш фойдадан ҳоли бўлмаса керак. Қуйида форумимизнинг фахрий меҳмонларидан бири Фахриёр билан бўлиб ўтган суҳбатча уларнинг розиликлари ила сизга тақдим қилинмоқда:

Сообщение от Husen

Ҳурматли Устоз!

Сиз "Сарой жавоҳири" тарихий мавзудаги корейс сериални таржима қилгансиз? Аммо, бугунга келиб тарихий мавзудаги корейс сериалларининг болалаб кетганлигига қандай муносабат билдирасиз? Ёш авлод Жумонг, Жанг Бого деб катта бўлгандан кўр Алпомиш, Жалолиддин ёки Амир Темур деб кўкрак керса яхшимасми?

Сообщение от fahriyor

Азиз дўстим Ҳусен,

Саволингиз учун раҳмат. Ҳозирги кунда ўзбек телеэкранини чет эл сериаллари тўлдириб ташлаётгани рост. Мен ҳам анча-мунча сериалларни таржима қилганман. Бунда ўзимнинг “ҳиссам” борлигидан, тўғриси, баъзан уяламан. Эҳтимол, бунинг ўрганиш жараёнида ҳеч қандай зиёни йўқдир, чунки илгари бизда бундай телесериаллар йўқ эди (бир замонлар олинган видеофильмларни бугун телесериал деб эфирга узатилаётгани одамнинг кулгиси қистатади, холос). Чет эл сериаллари қайсидир маънода бизга мактаб вазифасини ўташи керак эди, лекин, афсуски, шогирдлик жараёни жуда чўзилиб кетяпти.

Билмадим, сизнинг эсингизда борми-йўқми, бундан йигирма йиллар муқаддам Россия телеканалларини ҳам Лотин Америкаси сериаллари тўлдириб ташлаган эди, аммо руслар бундан тезда қутулиб, ўз телеэкранларини ўз сериаллари билан тўлдириб ташлади. Лекин ҳеч бирини миллий сериал деб мақтаётгани йўқ. Улар томошабинини топяпти ҳам, бироқ кўпчилиги саёзлигини, олди-қочди нарсалар эканини ҳам тан олиш керак. Шу билан бирга Достоевский, Толстой, Булгаков сингари классиклар асарлари ҳам 5-10 серия қилиб саҳналаштирияптики, бундан ҳар қанча ўрнак олсак арзийди.

Назаримда, русларнинг шогирдлик жараёни камроқ бўлганига сабаб дунёдаги машҳур телесериалларнинг (масалан, ситкомлар) русча версиясини сотиб олиб саҳналаштиргани ижодий мактаб вазифасини ўтаган бўлиши ҳам мумкин. Биз эса фақат таржима қилиб, энг осон йўлни тутиб ётибмиз. Баҳона осон – маблағ йўқ. Лекин сиз айтгандай фарзандларимиз фақат Жумонг билан Жанг Богона тақлид қилиб ўсса, қизларимиз Кумушга (турк сериали) ўхшаб кийинишдан бошқасини ўйламаса, миллийликни бой бераётганимиз шу эмасми? Эртага шу маънавий зиённи бугунги маблағ йўқлиги билан оқлаб бўлармикан?

Мен бундан буён прайм-тайм вақтидаги экранларимизни чет эл сериаллари банд қилишига мутлақо қаршиман. Бир томондан маънавият ҳақида куйиб-пишиб гапирамиз, иккинчи томондан эса ўзимиз ўтирган шохга ўз қўлимиз билан болта урмаяпмизми?

Ахир, ўша корейс сериалларига “хомашё” бўлаётган тарихга эътибор қилсак, Корея – неча асрлар давомида Хан (Хитой) империясининг бир вассали бўлиб келган мамлакат, яъниким ҳуқуқи ўз қўлида бўлмаган. Биз эса, хоразмча ибора билан айтганда, нақат хонлик, ҳатто империя кўрган миллатмиз. Бинобарин, тарихимизда конфликтлар ҳам, интригалар ҳам, фожиалар ҳам, ғурурланишимизга арзийдиган шону шавкат ҳам, жасорат ҳам, ватанпарварлик ҳам корейсларникидан юз, ҳатто минг чандон ортиқ бўлган. Уни кўрсатиб бера олмаяпмиз, холос. Одам ҳеч қачон қуруқ гапдан ғурурланмайди. Бунинг учун унга ҳиссиёт керак. Ҳиссиётни эса фақат юксак савияли, чуқур драматизм билан йўғрилган, энг муҳими томошабинни ишонтира оладиган фильмлар, телесериалларгина бериши мумкин. Чунки бугун телевидение энг кучли ахборот қуролига айланди, уни ҳар куни томоша қиламиз, таъсири ҳам шунга яраша. Уйимизга ахборотни ҳам, томошани ҳам олиб киради.

Кўпинча бундай фильмлар йўқлиги ҳақида гапирилса, Навоий ёки Улуғбек ҳақидаги фильмлар билан “оғизга урмоқчи” бўлишади. Масалан, мен Ҳусайн Бойқаронинг неварасини, фильмда кўрсатилганидек, фақатгина май ичгани учун ўлдирганига ишонмайман. Саройдаги тахт учун тинимсиз курашлар, интригалар, фожиали зиддиятларни бу қадар жўн талқин қилиш билан ҳеч нарсага эришиб бўлмайди.
Сизга бир фактни келтирай. “Тафаккур” журналида ишлаб юрганимда раҳматли Шариф Юсупов Қўқон хони Худоёрхон тахтдан айрилгандан сўнг генерал Жўрабек унинг рафиқаси Оғоча ойимни хотинликка олмоқчи бўлиб юргани, у эса, аскар менинг тенгим эмас (аслида жавоб жуда қўпол ва дангал бўлган – уни бу ерда келтириб бўлмайди), деб рад жавоби берганини айтиб қолди. Биз у кишидан уни мақола қилиб беришни сўрадик ва мақола журналнинг шу йил 1-сонида босилиб чиқди.

Эри тахтдан айрилгандан сўнг ҳаёти хавф остида турган аёлнинг таъқибу машаққатларга қарамай ғурурини сақлаб қола билгани одамнинг ўмганини кўтарадиган, ўрнак бўладиган нарса эмасми? Тўғриси, шу аёлнинг бир оғиз жавоби менинг хаёлларимни ағдар-тўнтар қилиб юборди, унга бўлган ҳурматим минг чандон ошди. Бир ўзбек аёлининг ғурури шунчалар баланд экан, нега уни бошқаларга намуна қилиб кўрсатмаслигимиз керак?

Шукрки, тарихимизда бундай мисоллар жуда кўп. Шунинг учун сизнинг ташвишли саволингизга тўлиқ қўшиламан. Фарзандларни ҳеч қачон бировнинг тарихини кўрсатиш билан ватанпарвар қилиб тарбиялаб бўлмайди. Ғурур миллатнинг қадриятларини ҳис қилдириш эвазига келади. Бунинг учун бизга ўзбекнинг шавкатини оламга ёйган оталар ҳаёти ҳақидаги бадиий ҳақиқатлар (бадиий асарми, киноми, телесериалми – фарқи йўқ) керак.
Албатта, бу борада муайян ишлар қилиняпти. Яхшими-ёмонми, сериаллар суратга олиняпти, экранга ҳам олиб чиқиляпти, лекин уларнинг маиший даражадан кўтарилиб, ижтимоийлашиши қийин бўляпти. Буни қанча кутамиз – худо билади.

Омон бўлинг.
Фахриддин

[Bekmirzo]

Tunov kuni "Suv yoqalab" degan kinoni ko'rdim, NTT kanalida qo'yishdi.
Rosti, yaqin orada bunaqa darajada maza qilib, o'zbekcha film ko'rmagandim...

[OmoN]

Сообщение от Bekmirzo

Tunov kuni "Suv yoqalab" degan kinoni ko'rdim, NTT kanalida qo'yishdi.
Rosti, yaqin orada bunaqa darajada maza qilib, o'zbekcha film ko'rmagandim...

Ўзиям Эркин Комилов Болта Мардон ролини "синдириб" қўйган.

[axmedovshuhrat]

Келинг санаб кўрамиз биринчи муваффақиятли тижорат кинофильми "Муҳаббат синовлари"дан бошлаб шу кунгача (2.12.2010) нечта тижорат фильмлари ишлаб чиқарилган (ёки суратга олинган) ва уларни номлари?

1. Муҳаббат синовлари.
2. Фотима ва Зуҳра.
3. Севгинатор.
4. Эркаклар ови.
5. Ўйин.
6. Фериде.
7. Келгинди куёв.
8. Келгинди келин.
9. Келгинди қайнона.
10. Бойвачча.
11. Бойвачча-2.
12. Нортой.
13. Ўйин ичида ўйин.
14. Бегоналар.
15. Жоним сени... ёҳуд эгизаклар.
16. Омад.
17. Тундан тонггача.
18. Уйланиш.
Қайси фильмлар қолиб кетди? Ёзиб юборинг.

[Lutfillo Tursunov]

Сообщение от axmedovshuhrat

Қайси фильмлар қолиб кетди? Ёзиб юборинг.

Эҳҳе, 100дан ортиқ кинони номини санаш керакку. Кўпчилигини номини эслашни иложи йўқ. Сифат шунга ярашада.

[Stolz]

Bir ikkitasini ko'rganman, xolos. Manimcha yetarli, boshqalarini ko'rishim shart emas. Bu kinolar xuddi 80 yillarda Bollywood saviyasidagi kinolar bo'lib, to'g'risi, bir marta ham korishga arzimaydi (mani didim boy'icha, sizniki albatta boshqacha) Lekin "mashq-usta qiladi" deganlaridek, "Toshlywood" da 20 yillardan keyin ancha-muncha yaxshi kinolar ko'rib qolsak ajabmas, Inshaallah!

[Husen]

Сообщение от axmedovshuhrat

Қайси фильмлар қолиб кетди? Ёзиб юборинг.

2008 йилда тахминан 35-40 та атрофида, 2009 йилга келиб 50-55 атрофида фильм катта экранга чиққан. Бу йилги кўрсаткичлар ундан ҳам ортиши аниқ. Узундан узоқ рўйхатни келтириб ўтишдан аслида нима наф бор? Аслида, тижорат фильмлар оммалашуви "Мухаббат синовлари"дан эмас, аксинча Отабек Мадраҳииов ва Фаррух Зокировлар иштирокидаги (номланиши эсимда йўқ, "Тақдир"миди-ей...) фильмдан бошланган ва томошабинлар кинотеатрга қайтишни бошлашган эди.

[Nigora Umarova]

Сообщение от axmedovshuhrat

Келинг санаб кўрамиз биринчи муваффақиятли тижорат кинофильми "Муҳаббат синовлари"дан бошлаб шу кунгача (2.12.2010) нечта тижорат фильмлари ишлаб чиқарилган (ёки суратга олинган) ва уларни номлари?

Қайси фильмлар қолиб кетди? Ёзиб юборинг.

Endi ro'yxatni tuzishga qiynalmaysiz. Ushbu ro'yxatga ko'ra ro'yxat tuzib chiqishingiz mumkin.