Қалб кечинмаларини юрак қони ила ёзган ижодкор: Улуғбек Ҳамдам

[Ulugbek Hamdam]

Сообщение от Nigora Umarova

Улуғбек ака!

Сизни шоир сифатида ҳам мухлисларингиз шеърларингизни севиб ўқишади. Уларга ёзган шеърларингиздан ҳавола қилсангиз.

Кўзларимнинг оқи...

Кўзларимнинг оқи сенсан, қароси ҳам,
Юрагимнинг ҳеч битмаган яроси ҳам.
Бори умрим йўлларингга нисор этгум,
Ибтидо-сен, интиҳо-сен, ароси ҳам.

Эй гулбадан, сендин ортиқ маъни борму,
Магар бўлса, кўрсат менга, қани, борму?
Сирли-сирли жилмаюрсан нега бундай,
Кулгичларинг беркитдиму ани, борму?

Кўзларимнинг оқи сенсан, қароси ҳам,
Юрагимнинг ҳеч битмаган яроси ҳам.
Юлдузим-сен, кундузим -сен, умидим-сен,
Шўрпешона бошгинамнинг балоси ҳам.

Сен -қуёшсан, айланурман йўлдош бўлиб,
Ёшим ўтди, аммо ҳануз бир ёш бўлиб.
Эл билса ҳам, эл кулса ҳам, парво қилмай,
Усти юпун, бағри бутун бардош бўлиб.

Кўзларимнинг оқи сенсан, қароси ҳам...

[Ulugbek Hamdam]

Табризийсиз

Одам ичингда, дейди,
Ичимда бўлсин, майли.
Аммо ўшал оламни
Сенсиз нетгумдир, Лайли?

"Ўзлигингни топ,-дейди,ғ
Топсанг, Ҳаққа етгунгдир!"
Ёнимда сен бўлмасанг,
Ўзлигимни нетгумдир?

Ўзлигимни топиб мен
Чиққанман сени излаб.
Қаёндасан, Лайлим, сен?
Бормоқдаман-ку бўзлаб...

Ҳаммасидан кўнглим тўқ,
Ҳаммаси бор. Фақат шу-
Табризий ёнимда йўқ,
Усиз ҳаётим оғу.

Олам ичингда, дейди,
Ичимда бўлсин, майли.
Аммо ўшал оламни
Сенсиз нетгумдир, Лайли...

[Ulugbek Hamdam]

Паноҳ изладим

Тушларимнинг таъбиридан паноҳ изладим,
Ўзга чора, ўзга таскин қолмаганди, воҳ.
Титраб-қақшаб йўғу бордан илоҳ изладим,
Бирда топсам, бирда топмай йиғладим узоқ...
Тушларимнинг таъбиридан паноҳ изладим...

У йўқ эди на ўнгимда ва на сўлимда,
На қулф урган ҳаётимда ва на ўлимда.
Чирпинардим, юлқинардим: комсиз, бардошсиз,
Телбаларча тикилганча бўм-бўш қўлимга
Йиғлар эдим унсиз ҳамда қатра кўзёшсиз.

Мўъжизалар кутмас эдим ҳаётдан аммо,
Қўлим етмас юлдузлардан менга қандай наф?
Ўз қўли-ла яратмаса тақдирин инсон
Кўкдан тушган мўжизалар унга ҳайфдир, ҳайф!
Мўжизалар кутмас эдим , кутмасдим асло.

Тушларимнинг таъбиридан паноҳ изладим,
Чўкаётган одам эдим номсиз уммонга.
Кўкка қараб ёлборганча сўзсиз бўзладим,
Боқмас эдим қибласи йўқ тўртта томонга...
Тушларимнинг таъбиридан паноҳ изладим.

Шундай ўлиб кетаманми, деб гоҳ ўйладим,
Гоҳи эса бепарводек тутдим ўзимни.
Чидаб бўлмас изтиробни келди куйлагим,
Келди чўкким юмган куйи мунгли кўзимни,
Тақдирига қолдирганча ўғил-қизимни...

Шундай ўтиб борар экан менинг ёз-қишим
Ханжар каби юрагимга кирди бир қайғу.
Оҳ, ўзича битмас экан дунёнинг иши,
Битармикан ўз ҳолича охиратда у?!..
Юрагимда оғриқларим кундан-кун асру...

Тегирмоннинг тошларига ўхшар бу дунё,
Сен-чи, тошлар орасига тушган буғдойсан:
Чирпинасан, юлқинасан, қўймайди, аммо,
Бағринг чок-чок сўкилар-да адо бўлгайсан...
Сўнгра ухлаб... ҳаммасини тушда кўргайсан.

Тушларимнинг таъбиридан паноҳ изладим...

[Ulugbek Hamdam]

Сен денгизсан

Халқ, бу асли нима дегани?
Марду номард-қуроқ дегани.
Номардингга сирингни айтсанг,
Уч кун ўтмай сиртмоқ дегани.

Халқ, бу асли нима дегани,
Сен барг десанг, дарахт дегани.
Бутоғингга қурт тушмаганми?
Шунинг ўзи бир бахт дегани.

Халқ, бу асли нима дегани?
Томчи бўлсанг, денгиз дегани.
Шу денгизга қайта билсанг гар
Куч-қудратинг тенгсиз дегани.

Сенинг ўзинг денгиз дегани!

[Ulugbek Hamdam]

Улуғларинг асрагил

Улуғларинг асрагил, элим!
Улуғларинг улуғлар сени.
Этагингга гард ҳам юқтирмай
Юлдузларга қадар кўтаргай!..
Сен ҳам асра миллат гулларин,
Кишанларга тиқма қўлларин!..

Улуғларинг асрагил, элим!

[Ulugbek Hamdam]

Варақлаймиз ўз қалбимизни

Йиллар ўтаверар,
Ўтаверар йиллар...
Юракка ўтмишдан сувратлар солиб.
Биз эса лабларда истеҳзо,
Шунчаки кўз ташлаб ўтирганнамо
Варақлаймиз ўз қалбимизни...

Йиллар эса ўтаверар,
Ўтаверар йиллар.
Улар бизга чиндан бепарво...

[Nigora Umarova]

Улуғбек ака!
"Ёлғизлик" қиссасининг бошланишида шеър орқали эпиграф келтиргансиз:

Парча-парча бўлдим, қайдасан?
Юрагимда жарлик, қайдасан,
Қулаб тушмоқдаман, қайдасан?
Ёлғизлигим зўрлик, қайдасан,
Парча-парча бўлдим, қайдасан?

Инсон-ота, инсон-фарзанд, инсон ёр, инсон-турмуш ўртоғи, инсон- аввало ўзининг МЕНи.
Ҳаёт инсонни турли жабҳаларга парчалаб ташлайди. Натижада эса У баъзан ўзлигини-МЕНини йўқотиб қўяди. Мени йўқолган юракда ЖАРЛИК пайдо бўлади. Инсон руҳияти шу жарликка томон қуламоқда. Жарликнинг номи АРОСАТдир.
Ҳаёти давомида инсон ЯХШИЛИК ва ЁМОНЛИКларни содир қилади. Яхшилик ва Ёмонликни ОҚ ва ҚОРАга менгзашади.
Ҳаётни қайси рангда кўрасиз?

[Nigora Umarova]

Улуғбек Ҳамдам- адабиётшунос олим, Улуғбек Ҳамдам-шоир, Улуғбек Ҳамдам- ёзувчи. "Сабо ва Самандар" романини ўқиб кўз ўнгимда ажойиб бир фильм гавдалангандек бўлди. Кейинчалик драматургия соҳасида ҳам ижод қилиш ниятингиз борми?

[Kavsar]

Сообщение от Ulugbek Hamdam

Табризийсиз

Одам ичингда, дейди,
Ичимда бўлсин, майли.
Аммо ўшал оламни
Сенсиз нетгумдир, Лайли?

"Ўзлигингни топ,-дейди,ғ
Топсанг, Ҳаққа етгунгдир!"
Ёнимда сен бўлмасанг,
Ўзлигимни нетгумдир?

Ўзлигимни топиб мен
Чиққанман сени излаб.
Қаёндасан, Лайлим, сен?
Бормоқдаман-ку бўзлаб...

Ҳаммасидан кўнглим тўқ,
Ҳаммаси бор. Фақат шу-
Табризий ёнимда йўқ,
Усиз ҳаётим оғу.

Олам ичингда, дейди,
Ичимда бўлсин, майли.
Аммо ўшал оламни
Сенсиз нетгумдир, Лайли...

Muhtaram ustoz. Mana shu she'ringiz ko'proq yoqdi menga. Chunki Asqar Mahkamning Tabriz daftari she'riy kitobini eslatdi.

Bir savolim bor : "Tabriziy yonimda yo'q" deyilganida Shams Tabriziy nazarda tutilmoqdami? Shuni juda ham bilgim keluvdi.

Ya'ni, ramziy ma'noda Majnun - Mavlono Rumiy, Layli - esa Shams Tabriziy deb tushunsak xato bo'lmaydimi? (Garchi Majnun nomi berilmagan bo'lsada, Layli bor joyda albatta Majnun ham bo'ladi. Shunga ko'ra Majnunni xayolan tasavvur etib...)

Javobingiz uchun oldindan rahmat, hurmat ila...

[Nigora Umarova]

Сообщение от Kavsar

Muhtaram ustoz. Mana shu she'ringiz ko'proq yoqdi menga. Chunki Asqar Mahkamning Tabriz daftari she'riy kitobini eslatdi.

Кавсарой!

Вақтингиз бўлса, Асқар Маҳкамнинг ижоди ва "Табриз дафтари" шеърий тўпламига ёки "Адабиётда Лайли ва Мажунун тимсолларининг тасвирланиши"га алоҳида мавзу очмайсизми?
Муҳокама қилишга арзигулик мавзу экан.