Dildagi satrlar

[albatros]

Agar dardga to'lsang, do'stni izlama,
Endi so'zlar ketdi - so'zni izlama,
Shafqat keltirguvchi ro'zni izlama -
Dardingni telbavor shamolga yashir.

Maqomsan - dilni sho'z bayot tushunmas.
Sen - saydsan, "oh"ingni sayyod tushunmas,
Hasratni gullagan hayot tushunmas -
Ko'z yoshing ta'birin savolga yashir.

Dunyo, chayqalmoqda - og'ib turibdi,
Dunyoga shaytonlar yoqib turibdi,
Qara, haq falakdan boqib turibdi -
Rostni ildizdagi kamolga yashir.

Hamdard bo'lmoqlikka bemorlar topgin,
Vatanning kuyida zor-zorlar topgin,
Yig'moqqa daraxtmas, devorlar topgin -
Erk so'zin qafasda beholga yashir.

Bu go'zal bog' ichra bahor dengizi,
Mavjlari - yamyashil, ufqi -qirmizi,
Bahor - payg'ambardir, sen ham - Termiziy -
Bir hadis topsang gar niholga yashir.

Bahor yuragingga bir shirin sasdir,
O'zliging sezmaydi - bu dunyo mastdir,
Mastlik ham beshafqat hayotdan bahsdir -
Hayotning ma'nosin zavolga yashir.

Usmon Azim.

[Shokirbek]

Баралла сўйланган хаёллар..

Гоҳида уйқуда сўйлайман,
Уйқуда ўйлаган сўзларим..
Алаҳсиб ўтмишни куйлайман,
Туш кўриб гўдаклик кезларим...

Бехосдан уйғониб, ҳалқумда
Ёшликнинг таъмини туяман..
Тамшаниб ётганча балконда
Ёстиққа ёшларим қуяман...


Шул каби эслайман ёшликни,
Ёдлайман лойсувоқ уйларим..
Юрагим қаърида бўшлиқни,
Шул каби тўлғизар ўйларим...

(С)

[Gulchehra Ibragimova]

ШОИРНИНГ ЭНГ КАТТА УНВОНИ...

Шоирнинг энг катта унвони – ёзиш,
Худо берган бўлса гар буни – соз иш,
Ҳақиқатни куйлаш бандалар аро
Шеър аҳлининг юксак қисмига хос иш.

2О1О йил.

ШОҲ ВА ОТА

“Инна лиллаҳи ва инна илайҳи рожиъун”(Биз Аллоҳникимиз ва
Унинг хузурига қайтгувчимиз).

Ўлим тўшагида фарзанд – Ҳумоюн,
Теппасида эса,ота – соппа-соғ –
Заҳириддин Муҳаммад Бобур,
Темурий подшоҳ.

Айтинг, ота бўлишдан ортиқ бахт борми?
Фарзанд доғин кўришдан-чи,
Борми ортиқ ғам?
Қолмади табиблар - уни кўрмаган,
Ўқитмаган дуоси.
Ватан, балки ватанда топиларди давоси?
Дарвоқе, у ердан ҳам келди табиблар,
Етишмади бироқ ватан ҳавоси.
“Инна лиллаҳи ва инна илайҳи рожиъун”.

Ўзи-ку қайтмади,
Йўқ, қайтолмади,
Орзу қилди холос зурриёдларим -
Қайтар деб бир кун.
Бошлаб борар, деди, Худо хоҳласа,
Ҳаммасини тўнғич ўғлим Ҳумоюн.
Ўлим тўшагида ётар, лекин, мана, у,
“Инна лиллаҳи ва инна илайҳи рожиъун”.


Эй, тақдирга тадбир йўқ деган гап бекор,
Нимаики сўрама, бераман деган
Аллоҳнинг ваъдаси бор.
“Ол менинг жонимни, ўғлим ўрнига,
Ҳумоюнни эса, қайтар ҳаётга,
Ўзинг меҳрибонсан, ё Парвардигор!
“Инна лиллаҳи ва инна илайҳи рожиъун”.

Ва Бобур ибодатдан кўтармади бош,
Нола қилди эрта-кеч ўғли қошида.
Ҳаста фарзанд болишлари йиртилди чириб
Тўккани кўз ёшидан
Ва ижобат бўлди дуоси шундоқ:
Соғайди-ю фарзанд Ҳумоюн ўктам,
Вафот этди Бобур тез кунда оғриб.
“Инна лиллаҳи ва инна илайҳи рожиъун”.


Ва лекин армон бор, нафақат Бобур,
Халқим ўзбек туйган армон – талх-тахир:
Йироқ Ҳиндистондан ота юртига
Қайтмади Ҳумоюн Мирзо бари бир.
Нафақат Ҳумоюн Мирзо, Акбаршоҳ,
Жаҳонгир, Шоҳ Жаҳон, то Баҳодиршоҳ...
Авлодлардан ҳеч ким , э воҳ, то шу кун
Она ватанига қайтолмади, оҳ!
Қайтмас энди,аён, бундан кейин ҳам,
Бордир лекин улар ҳақда қиссалар.
Ватан тўғрисида бораркан суҳбат,
Чиқармоқлик керак энди ҳиссалар.

1 ҳисса
Аввало, Қуръони Каримдан калом:
“Инна лиллаҳи ва инна илайҳи рожиъун”.
Андижон ҳавоси топилганида,
Соғайиб кетарди лекин Ҳумоюн.

2 ҳисса:

Бобуршоҳдек шоир жаҳонда битта,
Бобуршоҳдек подшоҳ жаҳонда битта.
Ота-чи? Бобуршоҳдек ота?..Акс-садо -
Қайтарар сўлу соғ: “Жаҳонда битта!”

З ҳисса

Худо кўрсатмасин, оғриганимда
Давосиз дард билан агар ногоҳон,
Бугун мен ўйлайман, Бобуршоҳ мисол
Отам менга фидо этармиди жон?

Мен-чи? Мен бирон- бир фарзандим учун
Ҳаётимни қурбон қила олгумми?
Ҳумоюндек фарзанд бўла олмадим,
Бобуршоҳдек ота бўла олгумми?..

21.1О.11 й.

Шукур ҚУРБОН

[Gulchehra Ibragimova]

Achchiq xotiralar bo‘ldi-ku tilak,
Og‘ir ayriliqqa ko‘ndi bu yurak,
Nima bo‘lsa hamki tan olish kerak,
Sevdim, sevayapman, sevaman seni.

O‘tkinchi havasga berildik goho,
Boshga sinovlarni soldi bu Dunyo.
Dilim to‘la nafrat bo‘lsa ham ammo,
Sevdim, sevayapman, sevaman seni.

Har on xayolingsiz o‘tmaydi vaqtim,
Seni o‘ylasam, bas, ortadi zavqim.
Bilmam, armonimmi va yoki baxtim,
Sevdim, sevayapman, sevaman seni.

Bu qanday tuyg‘uki, seni o‘ylasam,
Pinhona o‘rtanib noming kuylasam.
Kecham ham bugunim, ertamdan qasam,
Sevdim, sevayapman, sevaman seni.

Nafosat Sodiqova

[albatros]

Сообщение от Gulchehra Ibragimova

Kecham ham bugunim, ertamdan qasam,
Sevdim, sevayapman, sevaman seni.

Nafosat Sodiqova

Оффтоп:

Mana yana bitta shunga o'xshash she'r

Qasam.

Muhabbatdan dedim men nima desam,
Ishqimda bog’ladim o’ylasam neni.
Kecha-yu, bugun ertamdan qolsam
Sevdim! Sevayapman! Sevaman seni!

Ko’nglimning tubida fazolar topdim,
Ishqsiz dunyolarda qazolar topdim.
Marhamatlar topdim,jazolar topdim,
Sevdim! Sevayapman! Sevaman seni!

Boshim osmondadir tovonim yerda
Kamolim ko’kdayu,zavolim yerda.
To’fonim samoda, shamolim yerda,
Sevdim! Sevayapman! Sevaman seni!

Qalb sevgiga teng bo’lsang yetar,
Ko’ksim ikki dilga keng bo’lsang yetar.
Diloro habibim sen bo’lsang yetar,
Sevdim! Sevayapman! Sevaman seni!

Himmati qistadi motam dunyoning
Kulgusi qistadi motam dunyoning
Qaynoq ruh o’tida vujudim yonib,
Sevdim! Sevayapman! Sevaman seni!

Ko’zimni sipqorib keldim chanqasam,
Ruh qasam,jon qasam,qolsa tan qasam
Kech-yu,bugunim,ertamdan qasam
Sevdim! Sevayapman! Sevaman seni!

Orif To’xtash.

[Gulchehra Ibragimova]

Sarv qadlar sarvari gulchеhradur, yor-yor,
Dilrabolar dilbari gulchеhradur, yor-yor.
Gulchеhralar birla bog` gulshan erur, yor-yor
Gulshan aro siz mudom gulxan erur, yor-yor.
Gulchеhralar isidin to`ldi jahon, yor-yor,
Boshdin oyoq muattar bo`ldi jahon, yor-yor.
Gulchеhralar qomati to`bi erur, yor-yor,
Jannat aro to`bining xo`bi erur, yor-yor.
Sarvi sahiydеk bo`yi nozik emish, yor-yor,
Bo`yi kabi ham xo`yi nozik emish, yor-yor.
Mеhrki guldin ayon bo`lg`usidur, yor-yor,
Bulbulu gul mеhribon bo`lg`usidur, yor-yor.
Bir-birining qadrini bilsa kеrak, yor-yor,
Aylagusi shukrini qilsa kеrak, yor-yor.

Ubaydiy

[мафтун]

ЯНГИ ЙИЛ

Қор заррасин тутиб қололмас нигоҳ,
Гоҳ зарра нигоҳдан бағрим тилинди.
Қор ёғсин – ёпилсин изларинг, гуноҳ.
Янги йил, яхши йил бўлиб кел энди.

Қорми – кул остида милтирайди чўғ,
Кетганлар жон узиб кетмаганлар, йўқ!
Сенга етганлар бор, етмаганлар йўқ,
Янги йил, яхши йил бўлиб кел энди.

Деҳқоннинг уйини тўлдир буғдойга,
Сабр бер мискинга, инсоф бер бойга.
Тинчлик, кўнглитўқлик шоху гадойга,
Янги йил, яхши йил бўлиб кел энди.

Қирқ йилда бир йигит келар оламга,
Йигит юрагимни кўмма аламга.
Яна қирқ йил хизмат қилай онамга
Янги йил, яхши йил бўлиб кел энди.

Арчажон, юмшатгил игналарингни,
Кел, ташла, аразу гиналарингни.
Кўкка чиқай босиб зиналарингни,
Янги йил, яхши йил бўлиб кел энди.

Кўк тоқига ҳилолчироқ илинди,
Ёруғ ғуссаларга ошно дил энди.
Киприклар ҳам оппоқ, атиргул энди,
Янги йил, яхши йил бўлиб кел энди.

2006

Иқбол Мирзо

[Nigora Umarova]

Yer daraxti

Nur yo'lida men izlagan baxt,
Hech kim bilmas hayotim - ko'kda.
Men- chaqmoqlar urgan bir daraxt,
Tik o'saman qorong'ulikda.

Umringizga qilmayman ta'ma
Va kirmayman ko'nglingiz bosib.
Mening sevgim- eng yorug' ta'na,
Mening ko'nglim- ishqqa munosib.

Dovullarda silkinsa umrim,
Yillar o'tsa bir-bir pichoqlab.
Men zaminga kuchim beraman,
Men zaminni mahkam quchoqlab.

Qo'llarimni tirab osmonga,
O'g'irlayman tog'lar hushini
Va tinglayman
Ko'ksimga botgan-
Boltalarning zil tovushini.

Yog'dularning sirli jarangi
Barglarimdan o'tsalar suzib,
Ko'zyoshimning mevalarini
Yulduzlarga beraman uzib...

Hayotimdan nur yo'lin to'sgan-
Bandi bo'lsam bandi yo'qlarga:
Shoxlarimga to'r solib o'sgan
Har xil nomsiz chirmovuqlarga.

Men, baribir, o'saman adl,
Shamollarda silkinib, yashnab.
Shovullayman tunlari ko'kda
Uchayotgan oqqushga o'xshab.

Men-shu yurtga to'kilgan bir baxt,
Mayli, izlang, ildizim-ko'kda.
Men-chaqmoqlar urgan bir daraxt-
Tik o'saman qorong'ulikda.

Zebo Mirzo

[Kavsar]

Shu latofat, shu go'zallik, shu chiroy bilan,
Olganmisiz Sheroziyning shirin jonini.
Yashirmangiz oy chehrani yuz hayo bilan,
Band etursiz, Sheroziydek, mening jonimni...
(c)

Batafsil ma'lumotlar Fikr.uzda.. ))

[Nigora Umarova]

Сообщение от Kavsar

Shu latofat, shu go'zallik, shu chiroy bilan,
Olganmisiz Sheroziyning shirin jonini.
Yashirmangiz oy chehrani yuz hayo bilan,
Band etursiz, Sheroziydek, mening jonimni...
(c)

Oy yuzin parda to'ssa, taralur nur ziyosi,
Go'zalni go'zal etgan uning ibo, hayosi.