[Без оффтопа] Шеър азиз олам аро...

[Aliya]

Assalomu alaykum!
Barcha forumdoshlarni Yangi Yil bayrami bilan tabriklayman. Ishlarida omad, dasturxonlariga to'kislik va qut-baraka, oilalariga tinchlik va baxt-saodat tilayman!!!

Yangi yil tongida yozilgan she'r.

Singan va sindirgan dil o'rtasida
Alam devorini qurib bitkazdim.
Orzu sog'inchida kutilgan kunni
Armon olovida kuyib o'tkazdim...

Mushaklar porlaydi.
Soat o'n ikki.
Kutaman - kimimdir esga olar, deb...
Hech yo'qsa:
"Bayraming muborak!" - deya,
Bittagina xabar yozib qolar, deb...

Yulduzlar porlaydi sukunat aro,
Bayram tantanasi, g'ovuri tingan...
Men hamon yolg'izman o'ylarim bilan:
"Nega umid qildim muhabbatingdan?!"

Afsus-la kuzatdim yana bir yilni,
Yana bir yil keldi Sevgingsiz, Sensiz...
Xudodan so'rayman:
Yanagi yilga -
Yangi yil tongini kutmasam yolg'iz...

Yolvorib so'rayman...
Ohlarimda dard,
Ming bitta g'am ko'char ko'nglim qatidan...
Bilmam, yana nega ishondim Senga,
Umid qilib yolg'on muhabbatingdan?!

Tushundim - bariga sababchi o'zim,
Bariga aybdor ham shu sodda ko'ngil...
Yig'lamasin, - deya, - takror uchrashsak,
Menga G'URUR sovg'a qildi Yangi Yil...

[Minglar]

Юлдуз истаб сакрайсан баланд,
Ўзинг бўйинг ўлчамай ҳарчанд,
Балки бориб етардинг, лекин
Аҳмоқликлар берадилар панд.

Ариқларга ташлайсан қармоқ,
Лаққа балиқ истагинг тутмоқ,
Қуёш ўтиб уфққа ботганда,
Аттанг қилиб сўрасан бармоқ.

Балки шундай яшаб ҳам бўлар,
Киминг йиғлар, кимингдир кулар.
Ҳеч бир нима қилиб улгурмай,
Умр деган паймонанг тўлар…

(c)

[Minglar]

Баҳор дардин тўкар гулларга,
Ёз қиздириб бораверар жим.
Куз – соғинчдан сарғайган ватан
Ҳазонлиғин ўйлаб топган ким!?

Учта фасл ичра тентитаб,
Сени излаб-излаб, сенсираб,
Кетаяпман тўртинчи – оқлик,
Қиш – совуқлик юртига қараб.

Наҳот, кўнглим, топа олмасам!?
Наҳот ишққа етмоқ мумкинмас!?

(C)

[Gulchehra Ibragimova]

Сообщение от Mahmud Jurat

Жумла ўзбек тилига тўғри келмайди, қадр нима қилиниши керак?

Баҳодир Қўшақовнинг юқоридаги шеърлари кўпроқ шева билан ёзилибди, чамамда. Уларнинг шоирликка "даъво" эмас, шунчаки хаваслари бор шекилли..

Майли хато-камчилик ҳаммамизда ҳам бор.. Танқид яхши нарса.Хулоса чиқарарлар...

Аммо Маҳмуд ака мана бу тўртликда қандай камчилик, уни нимаси ёқмади? Мен илғай олмадим. Мазмун жойида..агар иложи бўлса тушунтирсангиз.., раҳмат.

Сообщение от gofurov

Taqvimni devordan yulib otaman,
Agar o‘tgan bo‘lsa bir kunim dardsiz.
Balki butun umrim bilan xatoman,
Ammo men hech kimman xotiralarsiz.

Nosir

[Nigora Umarova]

Сообщение от Gulchehra Ibragimova

Аммо Маҳмуд ака мана бу тўртликда қандай камчилик, уни нимаси ёқмади? Мен илғай олмадим. Мазмун жойида..агар иложи бўлса тушунтирсангиз.., раҳмат.

[MOD]Gulchehra opa, ijozat bersangiz ushbu xabarni "She'r aziz olam aro" mavzusiga joylashtirsam hamda bahsni u yerda davom ettirsangizlar.[/MOD]

[Gulchehra Ibragimova]

Сообщение от Nigora Umarova

[MOD]Gulchehra opa, ijozat bersangiz ushbu xabarni "She'r aziz olam aro" mavzusiga joylashtirsam hamda bahsni u yerda davom ettirsangizlar.[/MOD]

Яхши бўларди, ўзи жуда баҳс талаб "нарса"лар кўпайиб кетяпти..

[Mahmud Jurat]

Сообщение от Gulchehra Ibragimova

Taqvimni devordan yulib otaman,
Agar o‘tgan bo‘lsa bir kunim dardsiz.
Balki butun umrim bilan xatoman,
Ammo men hech kimman xotiralarsiz.

Nosir

Замонавий шеъриятдан балким унчалик хабарсиздирман. Шунинг учун Носир шоирнинг шеърларини ўқимаган эканман. Узр.
Тўртликдаги учинчи қатор ғализ, мубҳам. Шоир балким бутун умрим хатодир демоқчимикан. Умуман, бу тўртликни ҳам ёмон дастхат билан ёзилган мактуб сингари муаллифнинг ўзи тушунтириб бермаса тушуниш қийин.

[gofurov]

Сообщение от Mahmud Jurat

Шунинг учун Носир шоирнинг шеърларини ўқимаган эканман.

Носир шоирнинг шеърларини мана шу манзилдан кўчириб олсангиз бўлади.
http://uforum.uz/showthread.php?p=608437

[Mahmud Jurat]

***
Нақадар нозик бу дунё қаноти,
Тақдир деб ёзилган куйнинг баёти,
Англаб етилмас сир инсон ҳаёти,
Қайдан учиб келдинг нозик капалак.

Гўдаклик – дунёга дод солдик билмай,
Ҳаётни сипқордик текин деб – мўмай,
Қайларга кетдинг сен болалик ҳай-ҳай,
Қайда сайр этдинг сен нозик капалак.

Яшаш шу – мен турган лой супа, дедик,
Сузилдик қошларга: “жон ука”, дедик,
Тўймадик ҳаётдан, не келса едик,
Қайга кетмоқдасан нозик капалак.

Қайдан учиб келдинг нозик капалак,
Қанча учиб елдинг нозик капалак,
Қайга кетмоқдасан нозик капалак:
Келдим, елдим, кетдим, бўлибман ҳалак.

Мен мана бу шеъримни қўйдим, муҳокама қилиб фикр ёзганларга олдиндан миннатдорчилимни билдираман.

[Gulchehra Ibragimova]

Сообщение от Mahmud Jurat

Замонавий шеъриятдан балким унчалик хабарсиздирман. Шунинг учун Носир шоирнинг шеърларини ўқимаган эканман. Узр.
Тўртликдаги учинчи қатор ғализ, мубҳам. Шоир балким бутун умрим хатодир демоқчимикан. Умуман, бу тўртликни ҳам ёмон дастхат билан ёзилган мактуб сингари муаллифнинг ўзи тушунтириб бермаса тушуниш қийин.

Агар даврада ўн киши ўтирган бўлса, бир шоир томонидан бирон шеър ўқилса, шу ўтирган ўн киши мазмунни, мантиқни ўн хил тушуниши, турлича фикрлаши, изоҳ бериши табиий нарса..
Ҳар ким ўзига керакли томонини тезроқ "олади"..