Dildagi satrlar

[Nigora Umarova]

Meni esla, tashvish tushsa boshingga,
Meni esla, og`u tomsa oshingga;
Meni esla, gar adashsang yo`lingdan
Meni esla, baxting uchsa qo`lingdan.
Meni esla, gar eshitsang shum xabar;
Gar oldingda tursa olis, zo`r safar;
Meni esla, do`sting tashlab ketganda
Nomardlardan mehr-u shafqat kutganda.
Labbay, deya men qoshingga borurman,
Yelka tutib, yonginangda tururman.
Yo`lda yo`ldosh,
Ishda qo`ldosh bo`lurman,
Og`ir yuking bir tomonin olurman!
Qo`zg`almasman yaxshi kuning kelguncha,
Yaxshiligin amin bilib bilguncha!

Lekin...

Yaxshi kunlar eslamasang, mayliga,
Oydin tunlar eslamasang, mayliga.
Mayli, aytma, hatto orzu to`yingga,
Oyda bir bor kelmay esu o`yingga,
Zarra qadar, ishon, gina qilmasman,
Bu ginani o`zimga ep bilmasman.
Senga mehrim birday bo`lur hamisha,
Garchand ko`nglim noziklikda bir shisha!

Shuhrat(G'ulomjon Alimov)

[Nigora Umarova]

Yo Tangrim, Sen menga kuch ber,
Ber chidam-
Xuddi daraxtlarday ko'tarayin qad.
Ichimga qor yog'ib turganida ham,
Men kulib turishim kerak hamma vaqt.
Qushlar daraxtlarni aylasa ham tark,
Chidar. Ayozlardan o'tar tippa-tik.
Shunda ham olmalar yozaverar barg,
Shunda ham gullaydi bechora o'rik.
O'rgat, toshlarga ham gapiray mayin,
Ayolman! Xudoyim, keltirmayin shak.
Men ham daraxtlarday gullayverayin,
Men ham daraxtlarday yozayin kurtak.

Xosiyat Rustamova

[Alisher Asror]

Кўп кезма дарахтлар, боғлар ичинда,
Дарахтлар дил сўзинг бўлолмас сенинг,
Чорласанг келолмас, ёниб қучолмас,
Сен фақат менинг бўл , меники, менинг...

Кўп турма жаранг сув - булоқ бўйинда,
Булоқ ҳам дил сўзининг бўлолмас сенинг,
Қайнашим чашмадан теран жойдандир,
Сен фақат менинг бўл , меники, менинг...

Кўп титма муҳаббат китобларини,
Китоб ҳам дил сўзининг бўлолмас сенинг,
У ишқнинг дафтари менинг қалбимда,
Сен фақат менинг бўл , меники, менинг...


Омон Матжон

[Gulchehra Ibragimova]

Ҳаёт қўшиғи

Боғ қўйнида икки дарахт -
Бир-бирига интизор.
Сен - бир дарахт,
Мен - бир дарахт,
Куйиб-куйиб ўтдик, ёр.

Аммо баҳор келганида
Очилиш керак экан.
Гулу мева, хазон бўлиб,
Сочилиш керак экан.

Шамолларга дилим ёрдим,
Гул-япроқлар тилида.
Ел кафтида олиб келган
Ҳар шивиринг дилимда.

Аммо баҳор келганида
Очилиш керак экан.
Гулу мева, хазон тўкиб,
Сочилиш керак экан.

Ерга боғлаб қўйилганман,
Илдизим ер остида.
Кечалари шовуллайман,
Боқиб бўйи бастингга.

Аммо яшаш керак экан,
Очилмоқ керак экан,
Гулу мева хазон тўкиб,
Сочилмоқ керак экан.

Боғ қўйнида икки дарахт -
Бир - бирига интизор.
Сен - бир дарахт,
Мен - бир дарахт,
Куйиб-куйиб ўтдик, ёр!

Усмон Азим

[Nigora Umarova]

Саҳар ўтиб кетмасин, дейман,
кўксимда урилиб туради –
бир қўрқув, ғамини хўб ейман,
кўксимдан кўзимга юради –

Очаман, шарпамас, улкандир,
одамдан, оламдан, жаннатдан.
Покиза кўнгилдан ул камдир,
ул камдир ризою раҳматдан.

Уйқуда ўтмасин бу саҳар,
ғафлат саҳарида тўлғониб.
Бу тонгда тонг қотган бесамар
қуёшни кўрмасам уйғониб.

Йўлдош Эшбек

[Nigora Umarova]

Девона кўнгилга севги шоҳ,
жаҳолат - нафратнинг тошидир.
Кўнглимда қайнайди бир булоқ ,
муҳаббат – кўзимнинг ёшидир.

Нур келар, ҳур келар сўзимга,
муҳаббат – кўнглимнинг тожидир.
Шуълавор жимирлар кўксимда,
муҳаббат кўзимнинг ёшидир.

Ҳижрон ҳам, висол ҳам бари у –
ҳисларнинг охири бошидир.
Кўзларга тошса ҳам бу туйғу –
муҳаббат кўнгилнинг ёшидир.

Йўлдош Эшбек

[Gulchehra Ibragimova]

* * *

Кел, яшириб қўяйин сени
юракнинг энг чуқур ерига.
Кейин сен ҳам яширгин мени
юракнинг энг чуқур ерига.

Тополмасин бизларни биров!

* * *

Дунё ҳали норасо, ҳали
ўртамизда чопар айрилиқ,
чақирамиз бир-биримизни,
оғзимизни ёпар айрилиқ.
Нафрат яшар дунёда, ҳали
ёзилгандай қайси китобда
Муҳаббатнинг асрини кутиб,
ўтирибмиз икки қутбда...

***
МУҚАДДИМА

Бутун умрим тайёргарликдир,
ҳали кўпдир битмаган ишим,
англанмади ҳозирча кўп сир,
ҳали вужуд ичида ишқим.
Йилдиримдай лаҳза сувратин
яширинча асрар хотира.
Мени бор ҳам йўқ қиладиган
лаҳза порлаб турар олдинда.

Шавкат Раҳмон

[Gulchehra Ibragimova]

Одам дарахт

Ўсаётган
кучли дарахтман,
шохларимда пишар сўзларим,
ўйчан кузак келгувчи йўлга
икки тоғдай боқар кўзларим.
Фурсат эса —
шошқалоқ бола,
меваларнинг хуш бўйин туйиб,
атрофимда тинмай айланар,
гоҳ кундузни, гоҳ тунни кийиб...


* * *

Узум йиғлар,
йиғлар буралиб,
йиғлайверар қишгача дилдан,
биллур каби мўлдир турланиб,
кузда дўнар олтин шингилга.
Поёни йўқ куз оғушида
қандай гўзал йиғлайди узум!
Шундай бўлар ҳақиқий йиғи.
кўриб қўйгин,
эй, ношуд кўзим

Шавкат Раҳмон

[Romiy]

Мен ҳам "дилдаги сатрлар"имни баҳоли қудрат қоғозга туширган эдим. Лекин менинг адабий билимим йўқ деярли. Шунинг учун фикрларингизга ва маслаҳатларингизга муҳтожман.

Арзи ҳол.

Ҳаётимнинг бари хато
Бирла ўтди қаддим дуто.
Гар иноят қилсанг ато,
Ҳайрон ўлай қодир якто.

Намозларим ман тарк этдим,
Рўза тутмай нафсга кетдим,
Ўларга ман охир етдим,
Нолон ўлай қодир якто.

Номаҳрамда кўзу қошим,
Ҳаром луқма ичмиш ошим,
Оғригайдур ваъздин бошим,
Вайрон ўлай қодир якто.

Қилмай ҳурмат отам-онам,
Сўз қайтариб ўтдим ҳар дам,
Қобил фарзанд бўлмай манам,
пушмон ўлай қодир якто.

Қинғир йўлда ман юрубон,
Қалбға шайтон уй қурубон,
Қилди мани хор, урубон,
Сарсон ўлай қодир якто.

Ман гуноҳга чандон ботдим,
Кўп исёнлик сўзлар қотдим,
Иймонимға ўқлар отдим,
Сўзон ўлай қодир якто.

Уқбо нафъин кўзламайин,
Зикри худо сўзламайин,
На учун ман бўзламайин,
Гирён ўлай қодир якто.

Айла ё Раб қалбим сафо,
Кўргузмағил жабру-жафо,
Бу Ромийға бергил шифо,
Қурбон ўлай қодир якто.

[Romiy]

Кўз очиб қарасам, ёруғ дунёға келибман,
Кўз очиб қарасам, ул мосувоға келибман,
Кўз очиб қарасам, юз минг балоға келибман,
Кўз очиб қарасам, дард-бедавоға келибман,
Кўз очиб қарасам, ул бебақоға келибман.

Тоқат йўқ, бул кўҳна дунёни ташвишлариға,
Тоқат йўқ, ул малакни суол қилишлариға,
Тоқат йўқ, бу золим фалакни гардишлариға,
Тоқат йўқ, жаҳонни заҳр-заққум емишлариға,
Кўз очиб қарасам, минг ҳасратоға келибман.

Юрсам қаландар сифатлиғ, қилурлар маломат,
Ғариб бўлсам ҳақларимға этурлар хиёнат,
Бул ғарибликдин номусим қолмади саломат,
Шул сабабдин сочар кўзларим ашки надомат,
Кўз очиб қарасам, вовайлатоға келибман.

Ушбу дарду ҳасратларим мани этди вола,
Ҳоли-аҳволларим барчаға этиб ҳавола,
Қалбимдаги иймонларим заиф мисли тола,
Жайҳун сифатлиғ кўзда ёшларим бўлуб жола,
Кўз очиб қарасам, ман бул шақоға келибман.

Таним ариғ, зарраи мадор йўқ, рангим сомон,
Халойиқнинг дашномларидин бўлмадим омон,
Дардларим айтурға рафиқим йўқ ушбу замон,
Ҳаста Ромий, сўзни қисқа қил, ортуғи ёмон,
Кўз очиб қарасам, бир бевафоға келибман.