Dildagi satrlar

[Husniddin Ato]

Кумушларни қўмсаб қолар...

Оқ либосда ўтиб қолса келинчак,
Ҳавас билан боқиб қолар сингилчам.
Менинг эса қалбимда ўзга истак,
Кумушларни қўмсаб қолар кўнгилчам.

Кимларгадир ёқмас мендаги ҳолат,
Кимларгадир кулгилидир...-бу одат.
Атрофимга боқсам бўлиб ҳижолат,
Кумушларни қўмсаб қолар кўнгилчам.

Қани энди келса эди қўлимдан,
Асраб қолар эдим уни ўлимдан.
Дугоналар ранжимангиз феълимдан,
Кумушларни қўмсаб қолар кўнгилчам.

Дейман гоҳи мен ҳам бетга чопмасам,
Ким ёпади айбингиз,-мен ёпмасам.
Гоҳи юзингиздан ҳаё топмасам,
Кумушларни қўмсаб қолар кўнгилчам.

Кўзим тушса хиёбону-боғларга,
Ой юзини тўсиб турган доғларга.
Кетгим келар бош олиб узоқларга,
Кумушларни қўмсаб қолар кўнгилчам.

Чигиртка ҳам учар аммо, қуш бўлмас,
Таъна тошдан қаттиқроқ мушт бўлмас.
Бу кетишда ҳеч бир қиз Кумуш бўлмас,
Кумушларни қўмсаб қолар кўнгилчам.

Дерсиз балки замонадан қолган-да,
Мен ҳам фариштамас аслин олганда.
Нетай бундоқ обдон назар солганда,
Кумушларни қўмсаб қолар кўнгилчам.

Узун-узун кокиллари бел қучган,
Қора қоши ўсма сувларин кечган.
Бахтга етдим деганда заҳар ичган,
Кумушларни қўмсаб қолар кўнгилчам.

Сув бўйида сирим айтдим тошларга,
Майсаларни чўмилтирдим ёшларга.
Дейман, худо инсоф бер биз ёшларга,
Кумушларни қўмсаб қолар кўнгилчам.

Шаҳодатбону