[Без оффтопа] Шеър азиз олам аро...

[мафтун]

ЯШАСАЙДИМ

Кўзларимга бундай боқма савол билан.
Мен юрибман гўё телба хаёл билан.
Узун тунлар тиллашаман ҳилол билан,
Яшасайдим сендай яхши аёл билан.

Гоҳ йиғига ўхшаб кетар кулгуларим,
Кимлар учун кулгулидир қайғуларим.
Аммо ишон самимийдир орзуларим,
Яшасайдим сендай яхши аёл билан.

Гар нолисам, ношукурман ҳаётимдан,
Фақат қувонч бўйи келар баётимдан.
Нетай тақдир боғлаб олган қанотимдан,
Яшасайдим сендай яхши аёл билан.

Кошки эди биров дардим англасайди.
Ё дардларим қўшиқ бўлиб янграсайди.
Ул қўшиқни тошюраклар тингласайди:
“Яшасайдим сендай яхши аёл билан.”

Қайда хато қилдим, қачон адашганман?
Бир адашдим, аммо ёмон адашганман.
Бир хатога умрим товон, адашганман,
Яшасайдим сендай яхши аёл билан.

Яшагим йўқ, атай қасддан яшаяпман.
Қўлларингдан ўполмасдан яшаяпман.
Айбим нима, тополмасдан яшаяпман,
Яшасайдим сендай яхши аёл билан.

Сиримсан сен, кимса билмас, ичимдасан,
Ҳаётимда йўқсан, фақат тушимдасан.
Биламан ҳеч учрамайсан ҳушимда сан.
Яшасайдим сендай яхши аёл билан.
Яшаяпман шундай телба хаёл билан.

[мафтун]

СЕНИ УНУТОЛМАЙМАН

Ҳамма нарса бўлиши мумкин,
Менга омад кулиши мумкин.
Мен ҳайрон, лол:нимаям дейман?
Билолмайман аммо не учун
Сени унутолмайман...

Ҳамма нарса бўлиши мумкин,
Кетган қайтиб келиши мумкин.
Мен ҳар нега тайёрман, шайман,
Лек қийналиб ёнаман, чунким
Сени унутолмайман...

Ҳамма нарса бўлиши мумкин,
Ёмон эрта ўлиши мумкин.
Ғам емайман, ичга олмайман,
Аммо ечим топмас бир тугун:
Сени унутолмайман...

Ҳамма нарса бўлиши мумкин,
Кемтик кўнглим тўлиши мумкин.
Биламан, лек тан ололмайман,
Балки узоқ яшашим учун
Сени унутолмайман...

[мафтун]

ХХХХ
Кўнглимни ёритган нурли қиз,
Соддадил ва лекин сирли қиз,
Севаман самимий ва холис,
Юлдузсан энг ёруғ, лек олис,
Самоларимдасан.

Чорласанг, ёнингга учгайман,
Ва сени гул мисол қучгаймен.
Висолинг майидан қучгаймен,
Сен учун қўлларим очгаймен,
Дуоларимдасан.

Сайратиб мудраган торимни,
Эритдинг қалбдаги қоримни,
Шеър қилдим нолаю зоримни:
Сен учун бергайман боримни
Савдоларимдасан.

Сувратман, сийратим ўзингсан.
Ғайрату журъатим ўзингсан.
Бирдан бир ҳайратим ўзингсан.
Илҳомим, санъатим ўзингсан,
Наволаримдасан.

Айт, дунё бор йўғи бир камми?,
Бир олам ғам босди елкамни.
Сенсизлик қуритди тинкамни,
Етаклаб олиб кел кўкламни,
Саболаримдасан.

Юрагим кўйингда девона,
Оловга урилган парвона,
На илож шу бўлса пешона?
Ёлғизман, ғарибман, бегона
Дунёларингда ман.

[мафтун]

ЮЛДУЗИМ

(туркум)

1. Юлдузим, бош олиб кетайлик десак,
Бизга қучоқ очган осмон қайдадир?
Бахтманзилга бирга етайлик десак,
Йўл қайда, сарбону карвон қайдадир?

Ҳикмат тополмадим аломатлардан,
Ҳилват тополмадим маломатлардан.
Дардим достон қилсам дўсту ёронга,
Улар гап бошлайди буромадлардан.

Қўрқдим—қафас дедим ҳою ҳавасни,
Аммо кечир мендай севгипарастни.
Сенга етаман деб ҳар шому саҳар
Ҳатто санаб юрдим ҳар бир нафасни.

Кечикиб борган мен бахт улашганда.
Қайда қолган эдим вақт улашганда?
Тақдир насибамни нася қилди хўп,
Наҳот мен йўқ эдим нақд улашганда.

Не деса майлига оғзи полвони,
Асли сен берасан асл баҳони.
Аммо ишқ бобида, севги бобида
Мендай яхшиси йўқ, мендан ёмони.

[мафтун]

2. Қадрдон қалдирғоч инига қайтди,
Мени дуо қилиб “вал фажр” айтди.
Қиличдай қошингни солди ёдимга
Бошимда гирёна айланган пайти.

Айни ҳаётимнинг кўклам фаслида,
Англадим, чин нажот ёрнинг васлида.
Адашиб қолмадим, ёруғ дунёга
Мен сени ахтариб келдим аслида.

Хаёллар шамолдай қувди уйқуни,
Номи нима экан ушбу туйғуни,
Сирли нигоҳларинг, майин табассум
Мумдай эритди-я эски қайғуни.

Тун бўйи йиғлаган юраккинамни—
Титраб-титраб ёнган ярадор шамни,
Кўриб раҳминг келиб парволар қилиб,
Ўзинг авраб-алдаб юпатмайсанми?

Дарвозаси қайда чорбоғларингни?
Ҳижронми куйдирган қароғларингни?
Дудоғим ловуллаб куяр ҳасратдан
Ўйласам оловранг яноқларингни.

Юлдузим, тўрт томон етмади бизга.
Еру етти осмон етмади бизга.
Кўнгил томонларга қайтайлик десак
Вақт етмади, имкон етмади бизга.

[мафтун]

3.
Юлдузим, чўчитма осмонинг билан,
Осмондай поёнсиз имконинг билан.
Сенга берган кўнглим—омонатимни
Эзғилаб ташлама товонинг билан.

Зар кўнглим қадрига заргар етмади,
Ё зўрим бўлмади, ё зар етмади.
Муроду мақсадга етардим, аммо
Осмонимга сендай ҳулкар етмади.

Гулойим, гулларинг, гулзоринг гўзал,
Ойдан гўзал, гулдан рухсоринг гўзал.
Яратганнинг тугал санъати сенсан,
Ҳатто дилга берган озоринг гўзал.

Борлигинг билганим омаддир, омад,
Сенга дуч келганим—кўкдан иноят.
Яшаш учун боис топдим ниҳоят,
Ниҳоят, ниҳоят, ниҳоят...

[мафтун]

БОРЛИГИНГНИ

Шундоқ ҳам дилгинам сим-сиёҳ эди,
Ёлғизлик жонимга берарди озор.
Балки билмаганим яхшироқ эди,
Сенинг борлигингни дунёда, дилдор.

Асли-ку умидни узиб бўлгандим.
(Осмон паст, ер эса жудаям энсиз)
Момақаймоқ мисол тўзиб бўлгандим,
Жимгина яшардим севгисиз, сенсиз.

Қадр кечасидай осуда тунлар,
Кунлар ҳам кечарди бир нав, ҳасратсиз.
Қаҳ-қаҳ отиб кулса бағрибутунлар,
Мен ҳам жилмаярдим синиқ, ҳасадсиз.

Гарчи умид сўниб, эгилдим, синдим,
Кўниб ҳам бўлгандим тақдирга ночор.
Яхшиям сен борсан, яхшиям билдим
Сенинг борлигингни дунёда, дилдор.

[мафтун]

ЎЧИРОЛМАЙМАН

Майлига мен сени кечирдим, аммо
Асло ўз-ўзимни кечиролмайман.
Қушдай қўлларимдан учирдим, аммо
Сени юрагимдан ўчиролмайман.

Кутмасдан кузатдим баҳор-кузларни,
Қор кўмди қанчадан қанча изларни.
Қум босди нечалар қаро кўзларни
Сени юрагимдан ўчиролмайман.

Ким менга ёмонлик тилади, майли.
Нафсига ёмонлик қилади, майли.
Билганлар устимдан кулади, майли,
Сени юрагимдан ўчиролмайман.

Етти мучам соғу ғамнок, ҳолсизман,
Сенсиз бу оламда ғариб, ёлғизман.
Нетай нотовонман, нетай ожизман,
Сени юрагимдан ўчиролмайман.

Майли борлигингни асло билдирма,
Ҳоҳи тушимга кир, ҳоҳласанг кирма.
Мен сени бир умр ахтарадурман,
Сени юрагимдан ўчиролмайман.

[мафтун]

Тўртликлар
1.
Дилим сенга интиқ, яхши кўраман,
Борим сенга тортиқ, яхши кўраман.
Сени сендан кўра яхшироқ англаб,
Сени сендан ортиқ яхши кўраман.
2.
Кўзу қошинг, айт, гулим, недин қаро?
Анор юзингдаги ҳолинг тим қаро.
Ҳаққимга дуо қил, оқкўнгил дилдор,
Менинг юзим соруғ ва бахтим қаро.
3.
Қувдим дунё ортидан тинмай,
Пояфзални фақат чанг босди.
Уни артсам кетади, нетай
Кўнгилниям роса занг босди.

[Mahmud Jurat]

***
Birgina muammo - bu mеning o’zim 1
O’ngga boray dеsam chapni tanlayman.
Dunyo shaldir shuldir tortadi ko’zim
O’zimni bitta dеb o’zim talayman.

Birgina muammo - bu mеning o’zim
Shohlarga adolat so’zin tutqazib
Ko’zimda ko’zyoshlar go’yoki uzum
Adolat bobida poyga yutqazib.

Birgina muammo - bu mеning o’zim
Kamalak nuriga ranglar chaplayman.
Yon atrof do’stlarga tilayman to’zim
Tovuslik rolini o’jar eplayman.

Birgina muammo - bu mеning o’zim
Qachon qaramayin yuragim timda.
Ey olam nahotki qolmaydi izim
Amalda suyuqman buyukman tilda.

Birgina muammo - bu mеning o’zim
Ey hayot tinch qo’ygin tizginimni bеr.
Osmon boshim sila yupatgin o’zing
Gunohim shuncha ko’p ko’tarolmas yer.

Birgina muammo - bu mеning o’zim
Ishgamas gapimga olqish aytaman.
Birgina muammo - bu mеning o’zim
So’roqqa mеn o’zim kеlsam qaytaman.

Birgina muammo - bu mеning o’zim
Nahot mеn o’zimdan mеn o’zim kеchdim.
Mеn o’zim tilayman o’zimga to’zim
Mеn o’zim muammo - mеn o’zim еchim.
1. Musallambonu so’zi