[Без оффтопа] Шеър азиз олам аро...

[Mahmud Jurat]

***
Мен қишлоққа қайтар эмишман,
Байроқ қилиб юракни бир кун.
Шаҳарларда бутун эришган
Ютуқларим бўлармиш кукун.

Охирги бор йўлга чиққанда,
Кузатармиш созанда шаҳар.
Нафосатин қилмайин канда,
Қайтиш куйин чалармиш саҳар.

Увиллармиш ўжар шамоллар,
Таранглашиб лифтлар асаби,
Асфалтларда ётган қовунлар,
Гунг тилларда айтар кесати.

Тинглаб кўрсам қайтиш куйини,
Юрагимда увиллайди мунг.
Ёзилган бу тақдир ўйини,
Ечимсиз бир жумбоқли тугун.

Вужудимнинг қонин қақшатиб,
Айро тушиб кетарми танам.
Ҳар бир шеърим асфалтга тушиб,
Шаҳарликка айланиб кетган.
(С)

[Alisher Asror]

НАЙЧИ ДЎСТИМ КЎПАЙСИННИ
ТИНГЛАБ ДЕГАНЛАРИМ...

Куюниб най йиғлайди,
оҳанглари сел қилар,

Оҳанг ичра тўла дард
юрагимга йиқилар...

Бунчалар мунгли овоз,
чўлдан Мажнун додими!?

Ёки замон зайлидан
Отабек фарёдими!?

Ёки Лайлони истаб
юрган саҳро нидоси,

Кумушига етсин , деб,
эзилган йўл дуоси!?

Бу на қайғу, на алам ?
Бир қамишнинг оҳими!?

Ё машшоқни куйдирган,
қайтмас севги доғими!?

Қамиш бағридан дамсоз
чиқарар ғамгин наво,

Жудолиқлардан мажруҳ
юракка шудир даво...

(C)

[Aliya]

Siz borsizki...

Bu dunyoda Siz borsizki, men ham borman,
Hayolingiz baxti bilan Baxtiyorman...
Siz izlagan orzu bo'lib qolsam, deyman,
Nigohingiz panohida bo'lsam, deyman...

Izlaringiz tafti aro Jannat ko'rdim,
Nahot dilga hijronlardan panoh berdim?!
Diydoringiz va'dasidan darak bormi?!
Yuragimda Sizdan yuksak tilak bormi?!

Rahm etmassiz - malagingiz Arshdan kelgan,
Ko'kdan mag'rur nigohlarin hayo yenggan...
Hayotimni yoritsangiz Quyosh kabi,
Ko'nglingizga singib ketay...
Ko'z yosh kabi...

Baxtiyorman - hayotimda toki Siz bor...

[Gulchehra Ibragimova]

СЕН ЭСА..

..кел, кўр мени ишқ найлади (Юнус Эмро)


Боламни демабман, онам демабман,
Ҳеч кимни севмабман мен сендан ортиб.
Сен эса..кетолдинг
Ва лекин ишон-
Мен сени оламан ҳаммадан тортиб!

Оҳ, сендан топганим
алам ва ҳижрон,
Бўлса-да, боримни айларман тортиқ.
Кўрганим сен бўлдинг,
дардим сен бўлдинг
МЕН СЕНИ СЕВАМАН ҲАР НЕДАН ОРТИҚ!

..Сен эса, кетолдинг,
Мендан воз кечиб,
Ишқ деган азобдан битмас тўн бичиб.
Аросат йўлига қўйдинг-да, ўзинг-
Ўзгага кетолдинг қасамлар ичиб!

Ҳижронинг эзади
кўксимга ботиб
Қанча шомлар ўтиб,
неча тонг отиб,
Бир сўз юрагимга михланди қотиб-
Мен сени ўзингдан оламан тортиб!!
Кетмассан
ўзимдан ўзгага
ортиб...

..мен сени оламан ҳаммадан тортиб!

(С)

[pipicron]

Jilib-jilmas to'lin oy,
Bulut xayolday yengil,
Oy anhorda qulun toy,
Gilosda shig'il-shig'il.

Yaxlit oynaday bo'lib,
Hovuzga yoyilgan u.
Egilsam-tubdan to'lib
O'zim chiqdim ro'baro':

Atrofim to'la saf-saf,
Ming-ming yulduz ora man.
Barin sidirg'a chayqab,
Yerga sudrab boraman.

Yerda: novda, gul, barglar,
Aksi kashta singari.
Sel unutgan ko'lmaklar
Misli oyning singani.

Yonadi parcha-parcha.
Shabnam naq yel sochgan chog'.
Har nurda shodlik qancha,
Har soya sirga to'lig'.

Sayxonlar naq nur maydon,
Uyquda barcha tovush.
Inida uxlar nodon,
Latofatni sezmas qush.

O'zimga tashlayman ko'z:
Ko'ksim, qo'limda shu'la.
Osmonga tutaman yuz,
Yel silar yog'du qo'l-la.

Eh, umr yarmin yutib,
O'tgan tunlardami ayb?
Endi bu ko'rkni tutib,
Kunduzga bermasam hayf?

Zulfiya

[Aliya]

Rashk.

Sizni osmonlardan qizg'anmoqdaman,
Osmon to'la orzu, siz-chi - Yagonam,
Hur orzular ichra yolg'iz devonam,
Sizni osmonlardan qizg'anmoqdaman...

Sizni bahorlardan yashirsam, deyman,
Hiylakor gullari mast etolmasin,
Sehrli kuylari qasd etolmasin -
Sizni bahorlardan yashirsam, deyman...

Sizni osmonlarga bergim kelmaydi,
Qadringiz bilarmi yorqin yulduzlar?!
Oyda jodu ko'zlar, ishvakor so'zlar -
Sizni osmonlarga bergim kelmaydi...

Sizni osmonlarga ishonolmayman -
O'rgatib qo'yadi hijron kuyiga,
Giriftor etadi armon o'yiga,
Sizni osmonlarga ishonolmayman...

Men Sizni osmonga... Bermayman!!!

[Gulchehra Ibragimova]

Юрагимга деганларим..

Етмай туриб ўттиз ёшимга, оҳ юрагим ёмон санчдинг-ей..(С.Т)

Яна озроқ қолди, чида эй юрак,
Мен сен-ла мақсадга етмоғим керак.
Қирқ йилки, дўст бўлдинг, кўксимда уриб,
Куйдирди бедилга бир дилни бермак.

Нечун безовтасан, “гурс”- “гурс”лар нечун,
Қўй, санчма, “тиғ”ларнинг ўзи етарли.
Осуда кунлар ҳам келар сен учун,
Ҳаётда ўз йўлинг бор-ку, айтарли!.

Бир умр сирдошим, ҳамроҳим юрак,
Забардастим менинг, дилдошим юрак.
Шодлигу, ғамимда йўлдошим юрак
Озгина сабр қил, чидашинг керак.

Яна озроқ чида, мен ёрни топиб-
Унинг рухсорига термулай, тўяй.
Алдоқчи кўзига сўнгги бор боқиб-
Алдоқчи нигоҳдан майлига куяй?!...

..атиги бир сония, бир сония чида
Бир ҳовуч сув каби тўкилай, тўлай.
Бемеҳр бўлса ҳам майли сўнгги бор-
Тошбағир кўксиига
бош қўйиб ўлай?!.
..атиги бир сония..чидагин юрак..

(с)

[pipicron]

Сообщение от Gulchehra Ibragimova

..атиги бир сония, бир сония чида
Бир ҳовуч сув каби тўкилай, тўлай.
Бемеҳр бўлса ҳам майли сўнгги бор-
Тошбағир кўксиига
бош қўйиб ўлай?!.
..атиги бир сония..чидагин юрак..

Ming yillar chidaydi qalbdagi yurak,
Agarki siz unga quloq solsangiz.
Abadiy ko'ksingiz qiladi halak,
Siz unga ishonib yashay olsangiz!!!!
(C)

[Alisher Asror]

Yaxshi bo’lar edi, gulzor chamanda,
Bulbul sayrasayu zog’lar bo’lmasa.
Yaxshi bo’lar edi, telbadek sevsang,
Aql o’rgatuvchi sog’lar bo’lmasa.

Yaxshi bo’lar edi, do’st deb suyansang,
To’kilib ketmayin tursa qoyadek,
Yaxshi bo’lar edi , kimga dil bersang,
Xech qachon ajramay yursa soyadek.

Yaxshi bo’lar edi, tez-tez yo’qlasak
Darvozaga qarab yo’l kutganlarni,
Yaxshi bo’lar edi… biz ham unutsak,
Bizni allaqachon unutganlarni…


(С)

[Gulchehra Ibragimova]

Сообщение от Alisher Asror

Yaxshi bo’lar edi, telbadek sevsang,

Шеърингиз яхши чиқибди, қутлайман..Айрим шоирларимизнинг шеърлари билан андак сўз ўйини сифатида жавоб ёзгим келди...

Юқоридаги "Yaxshi bo’lar edi, telbadek sevsang" сатрингизга:

Адо қиладиган муҳаббат қани?
Фидо бўладиган муҳаббат қани?
Қани Отабекни сарсон қилган ишқ?
Гадо бўладиган муҳаббат қани?.. (Б.Туропова шеъридан)
**

Сообщение от Alisher Asror

"Yaxshi bo’lar edi, tez-tez yo’qlasak
Darvozaga qarab yo’l kutganlarni,

Сизни йўқлар номалар ҳам чўлоқ бўлди,
Нега, нечун? саволлари сўроқ бўлди.
Йўллар қараб кутган кўзлар қаро бўлди
Қалб қургурнинг бир чеккаси яро бўлди..
..келасизми? (Ч.Б)

Сообщение от Alisher Asror

Yaxshi bo’lar edi… biz ham unutsak,
Bizni allaqachon unutganlarni…

"Бизни унутгани унутмоқ керак", дейдилар Бобур ҳазратлари ҳам..

Бизни унутганлар
омон бўлсинлар,
Бизни унутганни унутмоқ керак.
Майли, феълимизни
ёмон десинлар,
Бизни кутмаганни кутмоқ не керак?

..Бизни унутганни унутдик биз ҳам
Гарчи хоҳласак-да, келмас хушларга.
Ҳатто кўз гавҳари бўлолмас малҳам,
Етти ухласак-да, кирмас тушларга.

Унутмоқ матонат,
УНУТМОҚ АЗОБ,
ХОТИРА УМИДЛАР
ЖАНГИДА ТАЛАШ.
ФАҚАТ БИЗГА БАХТДИР,
БИЗГА ИЗТИРОБ -
БИЗГА ИЧИККАНГА
ИЧИКИБ ЯШАШ.

(Фарида Афрўз)

Шеърингиз ёққанини ва "туртки " берганини жавобдан ҳам билсангиз бўлади, шоир ака