Dildagi satrlar

[Masud Mahsudov]

Қизга фарқи йўқдек кетяпти кулиб,
Йигит ваъда берди унутишликка.
Ўртада муҳаббат қадди букилиб,
Тақдирнинг кўзига боқмоқда тикка.
Чой тўкилган қоғоз каби заъфарон,
Юзлари бир кунда тўлди ҳасратга.
Қай тараф кетишни билолмай ҳайрон,
Висолни кузатмоқ бўлди рихлатга.
Энди фақат ундан қилишар гина,
Энг катта гуноҳкор бўлиб қолди-ку?
Оҳ, бечора севги, бечорагина,
Аросатда қолиб сўлиб қолди-ку?
Сўлма, парваришлай, сен айбдормас,
Кўрасан барчаси тушади изга.
Фақат раҳмим келар сени тушунмай
Яшаган йигитга, бевафо қизга…

©

[Nigora Umarova]

Sira chidolmayman, quvnoq chehrangda
Qayg’uning sharpasi kezsa bir nafas.
Ko’nglimga tikandek og’ir botdi,
Sening yo’llaringda ko’rsam xoru xas.

Men uni sochim-la supurib olgum,
Poyandoz deb yo’lga jonimni solgum.
Xoh bilgil, xoh bilmagil,
Sadoqatda bir umr qolgum.

Xoh bilgil, xoh bilmagil,
Hammasiga men bo’lay rozi.
Axir nima qilay, axir ne qilay,
Ishq uchun yo’q ekan toshu tarozi.

Saida Zunnunova

[Nigora Umarova]

Bu oyning hech kimga yo'qdir da'vosi-
(Yondirgan o'zgadir, muzlatgan o'zga...),-
Hali gullar hidlar-ketar jafosi-
Qalbining to'ridan boqadi ko'zga.

Sentabr-bir oylik sokingina baxt,
Sentabr-Ollohning mas'um tortig'i.
Ko'z yoshlarsiz qo'shiq, fojiasiz dard,
Kuzakning dunyoga ogoh yorlig'i.

Sentabr eshikda to'nib turibdi,
Seskanmas-falakda turna tizilsa.
Yurak bo'lsa... Yurak to'lib turibdi,
Qaylarga boradi bir barg uzilsa...

Usmon Azim

[AbuMuslim]

Лайлини кўрди халифа, деди: - Хой
Сенимсан Мажнунни ёндирган чирой?
Лекин чиройинг ўзгадан афзун эмас...
Қиз деди: - Бас, чунки сен Мажнун эмас!

Жалолиддин Румий

[AbuMuslim]

гул йиғиси

Қачон гул хидловдим,
қачон сувларда
ёғдулар рақсини томоша қилдим?
насимлар мавжида елган хурлардан
кўзларим узолмай қачон йиқилдим?
билмадим,
хаёлий дунёмидир бул,
жудолиғ бағримни тугатди тамом,
яна бу тубанлиғ даштида мақтул
жисмимни унутиб излайман пайғом.
бу ерда вахшийлар йўл қарар эди
тағин бир валломат қонини истаб,
тунларнинг йиртилган кўлкаларида
валилар сўнгагин ғажирди итлар.
очиқ мозорларнинг қирғоқларида
тиллари иккига айрилган қуллар,
вақтнинг сарғайган чирмобларида
юраги ёрилиб ўлган булбуллар.
сувлар хам ириган,
ириб ётар шарқ
тунларни ёритган майхоналарда,
ёвуз қон гирватин қаърига қараб,
завжалар йиғларди вайроналарда.
осмон йироқ эди
ер эса қаттиқ
тобора олислаб борар қуёш хам.
бўнда ғофилларнинг қисмати аччиқ,
бунда каттолларнинг бошлари тошдан.
вой, куним,
махжарга тўқинган куним,
сўнгги кўзларимдан эриганда ёш,
билолни чақирдим, эй, буюк қулим,
манов хоқонларнинг қулоқларин оч.
аммоки билол йўқ, милён жахл бор,
милён қўлларида қонсираган тош,
зулм зулматининг оғушида хор
битта гул,
ёлғизгул йиғларди холос.
ёвуз бир дарбадар бор эди тағин,
бор эди қўйнида интиқом тиғи,
бор эди ёғдулар синган бетайин
дунёдан юксалган бир гўзал йиғи.
дунёга келдимми ёки қайтдимми,
кимсасиз даштларнинг қаърида нечун
илк бора англадим ёлғиз дардингни
кечалар тубида йиғлаган, эй гул.

(шавкат рахмон)

[Nigora Umarova]

Юрагимда хурликларнинг алами,
Сурсам, дерлар: "Ёзмиш Кудрат калами".
Нечун калам бахтимни каро ёзди?
Не килдим йулимни гумаро ёзди?!
Толеимдан кимга йиглай. дод этай?
Дунё келиб, нени курдим, ёд этай!

Мирзакалон Исмоилий
(Мазкур шеър ёзувчи камокда эканлигида когозга туширилган)

[Nigora Umarova]

Dedim: Ayt, umrning ma'nosi nima?
Dedi: Yo chaqmoq, yo sham, yoki parvona.
Dedim: Bu dunyoga bino qo'ygan kim?
Dedi: Yo go'l, yo mast, yoki devona.

Pahlavon Mahmud

[Nigora Umarova]

Munavvardir quyosh, men nur to'la
To'lqinli ummonman, -
bilmassan.
Zamin tegramdadir,
Dilda yashar osmon,-
bilmasan.
Jahon bo'stonida bir
bolaridek uchganim uchgan.
Asalim ma'nosi lekin senga
pinhon,- bilmassan.
Bilurmen deb, dam urma,
Bilganing yolg'on,-
bilmassan!

Jaloliddin Rumiy "Ma'naviyu masnaviy"dan

[Nigora Umarova]

Zulm zanjirlari sanchilib bo'lgan,
Sevgi chechaklari yanchilib bo'lgan.
Haqorat to'kilgan, Haq dargohida
Haqir jandalari titilib bo'lgan.
Bir isyon qonlarda yetilib bo'lgan.

Osmon eshigini chertgan qo'llarga
kishanlar urilgan, chohlar qurilgan.
Xiyonat darchasi xiyla ochilgan,
Umidlar uzilgan, ahdlar buzilgan.
Yuzimni tuproqqa bosaman, vo-ya,
zaharlar ichilgan, orlar kechilgan.

Ko'ngil g'orat bo'lgan zaminga o'xshar,
Qanday javob beray bu qabohatga?
Yuragimni qora ilonlar chaqar,
Chayon malham qo'yar ko'r jarohatga...

Makr to'rlari bu- tepadan tushgan,
Yerga qoqilganman: hech turolmayman.
nafslar havoga kir nafas qo'shgan,
Bir lahza boshimni ko'tarolmayman.

Ayt-chi, kuchimmi bu yo ojizligim?
"Dod" deyman, bo'g'zimda qotadi faryod.
Qayrilib bir zarba bergim keladi,
Bir zarb-la barini qilaman barbod.

Ulardan qo'rqmayman, bilonihoya,
Har on ko'zimga mil tortsa ham sabrim.
Seni boqib turgan yuzimni bir dam
Sendan o'girishdan qo'rqaman, RABBIM!

Zebo Mirzo

[Nigora Umarova]

To'g'rilik

Sovchi der:- Otajon, beringiz duo,
Juda to'g'ri yigit bo'lg'usi kuyov.
Ota der:- To'g'riligi yaxshi-yu, ammo
Bundaylar ro'zg'orni eplay olmasov...

Abdulla Oripov