Талабалар ижоди намуналарининг муҳокамаси

[Tulqin Eshbekov]

ZAMONA ZAYLI…MI?

Iste’dodli yosh qalamkash Nursora Adashboyeva 1992-yilda Toshkent viloyati O`rta Chirchiq tumanida tavallud topgan. “O`zbekiston mustaqilligiga 20 yil” ko`krak nishoni bilan taqdirlangan. Maqolalari turli gazetalarda yoritilmoqda.

* * *

Dilnora yigitlar bilan gap-so`zga qoldi. Buvim: “Shu qiz telefonini qulog`idan qo`ymay, pichir-pichir qilganidan keyin gap-so`zga qoladi-da”,– dedi bir kuni. Dilnoraning onasi buvimga hasrat qilibdi: “Qizimdan vaqti-bemahal xabar olib turamiz, deb sotka olib beribmiz-u, oxirini o`ylamagan ekanmiz. 8-sinfda o`qiyotgan qizim telefon orqali allaqanday yigit bilan tanishib, sevishib ham ulgurganini bilmay qolibman. Endi afsusdaman…”.
Buvim bir xo`rsindi-yu o`z zamonasi, o`tmishi haqida gapira ketdi. “Bizning davrlar boshqacha edi, buvang bilan bir-ikki oy deganda ko`rishsak ham, dillarimiz doimo yaqin, tuyg`ularimiz, tilaklarimiz birga bo`lgan. U paytlar “sotka” degan balo yo`q edi. Nigohlarimiz bir zum to`qnashdi, deguncha ikkimiz ham so`zimizni yo`qotib qo`yar edik. Qancha olisda bo`lsak, shuncha qadrdon bo`lganmiz. Hozir-chi, bu qurib ketgurlar bir kunda o`n marta gaplashmasa, hisob emas-a. Uyingga bug`doy to`lgur, yosh bo`lsang, o`qi, biron kasbning etagidan tut, hayotda o`z o`rningga ega bo`l, hali hammasiga ulgurasan…”. Buvim yana allanimalar deya pichirladi. Men esa sochlari qordek oq, yuzlaridagi taram-taram ajinlari o`ziga yarashgan buvijonimning kuyinishlari bejiz emas, deya xayolga tolaman.
Axir, mana shu sotka emasmi kuni kecha bir baxti bekam oilaning xotirjam kunlariga qora bulut tarqatgan? Mana shu sotka emasmi ikki ko`ngilga g`ulg`ula solgan?.. Allakimningdir sevgi izhori bitilgan SMSi, telefon raqamining bittasi noto`g`ri bosilgani bois, yangi kelinchakning telefon raqamiga kelib tushadi… Ko`ngillarga oralagan shubhalar, ishonchsizlik. Endigina bog`langan ko`ngillarga sovuqlik tushishi uchun bundan ortiq xatolik bo`lmasa kerak…
Mana shu holatlarni eshitib, ko`rib, oddiy hoy-u havasni muhabbat deb bilib, adashayotganlar Alpomishni o`qimagan, Barchinoyning mag`rur va qat`iyligini hech qachon bilmaganliklaridan afsuslanaman.
Muhabbat… U har qanday qismatga zarba beradi. Axir u tuyg`ularning eng musaffosi. Faqat buyuk qalblargina muhabbatni ulug`lashga qodir.
Sevgining quvvatli, shiddatli shakli “ishq” deyiladi. Haqiqiy ishq – Husni mutlaqqa, majoziy ishq odam va olam go`zalligiga bo`lgan oshiqlikdir.
Faylasuflarning: “Chin muhabbat na o`ta dadillik va na yengiltaklikdir; tortinchoqlik uni ehtiyotkor qiladi; muhabbat ko`p narsaga jur`at etmaydi, chunki borini ham yo`qotib qo`yishdan qo`rqadi”, degan purma`no hikmatlari ham Muhabbat atalmish oliy his hech narsa bilan o`lchanmasligi, tenglashmasligi, u – oliy tuyg`u ekanini isbotlaydi.

Nursora ADASHBOYEVA

[Tulqin Eshbekov]

ОШКОРАЛИКНИ ТАЪМИНЛАШНИНГ МУҲИМ ОМИЛИ

Теран фикрли ёш қаламкаш Ирода Норбоева 1988 йилда Тошкент шаҳрида туғилган. Ранг-баранг мавзудаги кўплаб мақолалари турли газета-журналарда чоп этилган. Публицистик ижод билан бир қаторда илмий тадқиқотлар ҳам олиб бораётган ёш истеъдод соҳибаси айни пайтда “Тошкент хақиқати” газетасида фаолият кўрсатмоқда.

* * *

Жаҳондаги кўплаб давлатларда жамоатчилик билан алоқалар шу қадар яхши йўлга қўйилганки, бу ҳам иқтисодий-сиёсий, ҳам ижтимоий соҳадаги ютуқларни таъминламоқда. Аслида, жамоатчилик билан алоқалар (Publik Relations) ўтган асрнинг бошларидёқ ривожланиб улгурган.
Паблик Релейшнзнинг фан сифатида шаклланишида америкалик олим Эдвард Бернайзнинг хизматлари эътирофга лойиқ. У ўзининг хусусий «пиар-бюро»сини очиб, жамоатчилик билан алоқаларнинг самарасини амалиётда кўрсатиб берди. Шунингдек, у «Жамоатчилик фикрининг кристаллашуви» номли китобини чоп этиб, фаннинг назарий пойдеворини яратди. Бундан ташқари, Сэм Блэк, Валентин Королько, Евгений Пашенцев, Айви Ли каби олимлар бу борада тадқиқот ўтказганлар. Шу-шу, жамоатчилик билан алоқалар ижтимоий, сиёсий, иқтисодий, маданий, илмий соҳалар билан узвий алоқада ривожланмоқда.
Дарвоқе, тадқиқотчиларнинг фикрига кўра, ривожланган давлатларда жамоатчилик билан алоқалар ўз хизматларининг 65 фоизини турли даврий нашрларда чоп этилган мақолалар орқали амалга оширар экан. Қолган 35 фоизини эса тадбирлар, конференция ва матбуот анжуманлари ташкил этади.
Мамлакатимизда ушбу соҳа муҳим ижтимоий институтга айланмоқда. Сўнгги йилларда юртимизда ҳам Паблик Релейшнз фани назариётчиларининг сафи кенгаймоқда. Буни журналистика факультети профессор-ўқитувчилари Қудрат Эрназаров, Файзулла Мўминов, Тўлқин Эшбеков, Гулнора Нишонова илмий изланишлари, тадқиқотлари мисолида ҳам яққол кўриш мумкин.
Муҳим аҳамият касб этаётган дунёвий фаннинг юртимизда тараққий этишини таъминлаш мақсадида қабул қилинаётган ҳукумат қарорлари ишни тўғри ташкил этиш, жамоатчилик билан алоқаларнинг мақсад ва вазифаларини белгилаб берди. Негаки, жамоатчилик билан алоқалар давлатда амалга оширилаётган сиёсий, иқтисодий ва ижтимоий ислоҳотлар хусусида кенг жамоатчиликни хабардор қилиш, шунингдек, давлат ва хўжалик бошқаруви органлари фаолиятининг ошкоралигини таъминлашда алоҳида ўрин тутади.

Ирода НОРБОЕВА

[Tulqin Eshbekov]

TAFAKKURNING UCHQUR MAHSULI

Ulug`bek Asrorov 1981-yilda Navoiy viloyatining Nurota tumanida dunyoga kelgan. Tog`ning fusnkor tabiati uni qo`lga qalam olishga undadi. U she’riyat bo`stoni nihollaridan biridir.

* * *
O`z davrida jamoatchilikni hayratga solgan har qanday yangilik yoki ixtiro kun o`tib oddiylik kasb etishi tarixiy haqiqat. Ilk bor poyezdni ko`rib dahshatga tushgan, samoda uchgan samolyot parvozini mo`jizadek kuzatgan, mo`jazgina qutichadek matohdan taralayotgan ovoz yoxud tasvirni hayajon bilan tinglab, tomosha qilgan ajdodlarimizning hayratlari hamon bizni tark etganicha yo`q. Zero, bu hayrat ta'sirida yana minglab ixtirolar yaratildiki, bular sivilizatsiya uchun xizmat qilmoqda. Shulardan biri — bu, bugun dunyoni qamrab olgan internetdir.
1960-yilgacha dunyo bo`yicha 7 mingga yaqin kompyuterdan foydalanilgan. Oradan 33 yil o`tib, 1993-yili tarixiy burilish davri boshlandi. Bunga sabab, ilk marotaba personal kompyuterlar engil avtomashinalarni ishlab chiqarish ko`lamidan oshib ketdi va 35,4 million donaga etdi. 1995-yili esa ularning soni taxminan 60 millionni tashkil etdi. Dunyoning turli mamlakatlarida kompyuter texnologiyalari rivoji har xil tezlik va variantlarda jadallik bilan o`zgara boshladi. Butun jahon xalqaro kompyuter tarmog`ini ushbu jarayonning asosiy katalizatori deb tan oldi. Aynan u millionlab odamlar va yuzlab mamlakatlarni birlashtirdi, geografik masofani qisqartirdi, shuningdek, madaniyat, fan va bilim sohasidagi turli ko`rinmas devorlarni olib tashladi.
Xalq uchun an'anaviy xizmatlar ro`yxati yangi turdagi elektron-moliyaviy va xilma-xil o`yinlar bilan boyib bormoqda: Internet-magazin, elektron auksionlar, Internet yordamida ko`chmas mulk bilan bog`liq turli xil operatsiyalar, bank operatsiyalari, personal moliyalarni boshqarish, interaktiv televidenie, video-musiqa, videoo`yinlar va hokazo. Bu xizmatlarga talabning yuqori darajada bo`lganligi uchun unga kirish tez, oson va arzon. Bugungi kunda barcha davlat muassasalari Internetda o`z «sahifasi»ga ega. Bu esa demokratik jarayonlarning barkamolligiga, aholi siyosiy faolligining oshishiga, davlat va jamoatchilik o`rtasidagi dialogning samaradorligiga olib keladi. Internetning «biznesga-biznes» tarmoqli bozori (V2V) hamda virtual magazinlar faol rivojlanmoqda. Bank va moliyaviy xizmat turlarining yangi usullari paydo bo`layapti. Intellektual ishlab chiqarishning mahsuloti yangi telekommunikatsion texnologiyalar yordamida yig`iladi va tarqatiladi, iqtisodiyotning boshlang`ich tarmog`iga aylanadi.
Alqissa, Internetning dunyo bo`ylab keng miqyosda ommalashishi sivilizatsiya jarayoniga sezilarli ta'sir etmoqda. Jismoniy va ruhiy masofalar tobora qisqarmoqda. Bu jarayon yanada tezkorlik va keng ko`lamda davom etishiga shubha yo`q.

Ulug`bek ASROROV

[Tulqin Eshbekov]

ЖУРНАЛИСТ ИХТИСОСЛАШУВИ

Изланувчан журналист Ғуломжон Бобожонов Хоразм вилояти Урганч шаҳрида туғилган. Унинг мақолалари республика газеталарида ёритилган. Жамоатчилик билан алоқалар бўйича илмий тадқиқотлар олиб бораётган ёш истеъдод соҳиби айни дамда Тошкент Ислом университети Ахборот хизматида фаолият кўрсатмоқда.

* * *

Бирон ташкилотнинг жамоатчилик билан алоқалари асосан унинг матбуот хизмати орқали амалга оширилиши маълум. Муассасаларнинг матбуот хизматлари ўз соҳасининг моҳир мутахассиси бўлиш билан бирга ўша тармоқ бўйича ҳам муайян билимларга, назарий ва амалий кўникмаларга эга бўлган журналистлардан ташкил топиши зарурлиги алоҳида аҳамият касб этади.
Матбуот хизмати ходими бутун фаолияти давомида ўзи ишлаётган ташкилот ҳаётига доир маълумотларни оммага тақдим этувчи (шу билан бирга жамоатчилик фикрини ҳам етказиб берувчи) асосий шахс ҳисобланади. У соҳага оид зарурий билимларга эга бўлиш орқалигина ўз фаолиятини тўғри ва самарали ташкил эта олади. Матбуот хизматлари маълум бир соҳа бўйича маълумотларни журналистик ижод маҳсули тарзида тайёрлайди ва жамоатчиликка тақдим этади. Бу ўринда матбуот хизмати ходими жамоатчилик орасида соҳа бўйича қандай ахборотга эҳтиёж борлигини ва унга қай йўсинда жавоб қайтариш лозимлигини илғаб олиши зарур. Буни амалга ошириш учун албатта журналистдан мазкур соҳага оид масалалар, муаммо ва унинг ечимларини билиш талаб этилади. Жамоатчиликнинг эҳтиёжини масъулларга тўғри, тўлиқ ва батафсил етказиб бериш журналистдан бевосита шу соҳа бўйича етарли маълумотга эга бўлишни тақозо қилади. Шунингдек, жамоатчилик орасидаги мутахассис бўлган ва бўлмаган кишиларга бирдай тушунарли ахборот тақдим этиш масаласи ҳам ниҳоятда муҳим.
Мисол тариқасида таълим соҳасига ихтисослашган матбуот хизмати ходими ҳам олий маълумотли педогоглар учун, ҳам эндигина шаклланиб келаётган ўқувчи-талабалар учун, ҳам уларнинг турли савиядаги ота-она ва қариндошлари учун бирдай тушунарли бўладиган ахборотни тўплаш ва тарқатишга масъулдир. Бу ўринда журналистнинг битта жойда узоқ вақт муқим ишлаб қолиши ҳам етарли тажриба тўпланиши ва ихтисослашишига ёрдам беради.

Ғуломжон БОБОЖОНОВ

[Tulqin Eshbekov]

Ўзбекистон Давлат Санъат институтига қадам ранжида қилган киши ўзини чинакам санъат оламига кириб қолгандек ҳис этади. Санъат соҳаси сирларини назарий жиҳатдан пухта эгаллаётган талабаларнинг аксарияти амалиётда истеъдодларини намоён этаётганлари қувончли ҳол. Санъат журналистикаси йўналишида таҳсил олаётган талабаларнинг ранг-баранг мавзудаги мақолалари, бадиий асарлари турли газета-журналларда ёритилаётган бўлса, актёрлик соҳасини танлаган йигит-қизлар ҳозирданоқ театр саҳналарида, ҳатто, кинофильмларда ўзларига хос образларини намойиш қилаётганлари умид уйғотади. Муҳими, бу даргоҳда талабаларнинг пухта билим олишлари, амалиёт ва маҳорат сирларини чинакам эгаллашлари учун кенг имкониятлар яратилмоқда. Келгусида миллий маънавиятимиз, санъат ва маданиятимиз тараққиёти шу ёшларнинг интеллектуал салоҳиятларига, фаол фуқаролик позицияларига, шунга монанд саъй-ҳаракатларига боғлиқдир. Яна бир муҳим масала шуки, дунё миқёсида жадал тус олаётган глобаллашув жараёнида гоҳо юртимизга нисбатан уюштирилаётган “ахборот хуружлари”, “оммавий маданият” ҳамда мафкуравий таҳдидларга қарши курашадиган ҳақиқий ватанпарварлар ҳам шу соғлом фикрли, маънавий етук йигит-қизлардир! Айни пайтда ЎзДСМИ талабалари “Маънавият асослари” дарсларида ана шу фазилатларини намоён этаётганлари эътиборга моликдир. Амалий машғулотларда улар ёзган машқларни ўқиб, санъат ва ижоднинг нечоғли уйғунлигини яна бир карра ҳис этдик. Санъат журналистикаси йўналишида таҳсил олаётган бўлғуси қаламкашлар ўз ижодий машқларидан тақдим этган бўлсалар, актёрлик, режессёрлик, операторлик мутахассислиги бўйича таълим олаётган талабалар асосан турли адабиётлар ва мавзуга оид манбалардан олган сабоқларини хулоса тарзида қоғозга тушуришга ҳаракат қилишган. Бу уларнинг келгусида танлаган соҳаларида илмий тадқиқотлар олиб боришга ҳам қизиқишлари, таъбир жоиз бўлса, интеллектуал салоҳиятларини кўрсатади. Айрим ижодий машқлар жузъий камчиликлардан ҳоли эмас. Амалий машғулот сифатида нашрга тайёрланган ушбу тўпламдан ўрин олган машқлар орасида услубий ғализ, мазмунан саёзроқлари ҳам учрайди. Умид қиламизки, келгусида ижодкор талабаларнинг қаламлари қайралиб, маҳоратлари ошиб, ижодий ишлари такомилига етиб бораверади. Муҳими, бу талабаларнинг бугун дадиллик билан ижод ва илмга киришганларидадир!
* * *
Фикри теран, қалби тоза, холис форумдошларимиздан бўлғуси санъат ва маданият ходимлари бўлмиш талабаларимизнинг ижодий машқлари ҳақидаги мухтасар фикрларини кутиб қоламиз.

[Tulqin Eshbekov]

ҚАЛБДА ЮРТИМ ИФТИХОРИ

Истеъдодли ёш қаламкаш Ҳулкарой Ғаффорова 1988 йилда Сурхондарё вилояти Олтинсой туманида туғилган. Мақолалари “Сурхон тонги”, “Қалдирғоч” газеталарида ёритилган. Шеър ва ҳикоялардан иборат “Қалб туғёнлари” тўплами нашр этилган. У Санъатшунослик журналистикаси ихтисослиги бўйича таҳсил олмоқда.

* * *

Жаҳонда олам аҳлини ҳайратга соладиган кўплаб қадимий ва замонавий иморатлар, тарихий обидаларни яхши биламиз. Кўҳна Самарқанд шаҳридаги Регистон, Бухоро ва Хивадаги ўнлаб миноралар, Миср Эҳромлари, Буюк Хитой девори, Париждаги “Эйфел” минораси, Америкадаги “Озодлик” монументи шулар жумласидан. Гўзаллиги ва улуғворлиги билан асрлар оша олам аҳлини лол қолдириб келаётган бу тарихий обидаларни кўрганда кўз қувонади. Бу гўзал санъат асарлари инсонни орзулар оламига етаклайди. Асл санъат асарлари умуминсонийликка даҳлдор бўлиши билан биргаликда, аввало, у ўз халқининг ғурур ва ифтихоридир. Негаки, ҳар бир маънавий ва маданий мерос, аввало, ўз ери ва халқининг мулки ҳисобланади. Айтмоқчи бўлганимиз, она ватанимиздаги маънавий ва моддий мерослардан баҳра олиб, қадрига етиб, қалбимиз юксалгандагина улар бошқа халқлар учун ҳам муқаддас бўла бошлайди. Тарих зарварақларидан 2500 йил илгари ўрин олган қадимий Термиз дунёга довруқ солган буюк табиблар, ҳадисшyнос олиму алломаларга бешик бўлган маскан! Мустақиллигимиз туфайли юртимиздаги кўплаб шаҳарлар қатори Термизда ҳам бемисл ўзгаришлар рўй берди. Янги-янги барпо этилган гўзал иморатлар, муҳташам мажмуалар шаҳарнинг кўркига кўрк бағишлади. Сўнгги йилларда шаҳримиз таниб бўлмас даражада гўзалликка бурканди. Юртбошимиз ташаббуси билан улкан спорт мажмуаси барпо қилиниши шаҳримиздаги минглаб болажонлар ва уларнинг оилаларини қувонтирди. Маҳобатли спорт майдони ва тунни ҳам кундуздек ёритгувчи улкан чироқлари барчага ҳузур бахш этиб келмоқда.
Шаҳримизнинг диққатга сазовор энг гўзал масканлардан – Ҳаким ат-Термизий зиёратгоҳи муқаддас қадамжолардан биридир. Бу ерга ташриф буюрганлар бетакрор гўзалликдан маънавий завқ олиши асносида қалбларида ғурур ва ифтихор туйғулари жўш уриши табиий ҳолга айланган.
Шундай гўзал, жаннатмакон юртга кимдир ғаразли кўзи билан қараши ва “ахборот хуружи” қилиши мумкинми? Асл маданиятга қандайдир “оммавий маданият” соя солишига бефарқ қараб турамизми? Асло! Қалбида ифтихор туйғуси жўш ураётган биз, ёшлар Ватанимизни, миллий қадриятларимизни абадул-абад кўз қорачиғидек асрашга қодирмиз!

Ҳулкарой ҒАФФОРОВА

[Dilya Hasanova]

[MOD]Домла, "Бўлғуси санъат ва маданият ходимлари" ҳам талаба бўлганлари учун, шу мавзуда уларнинг ижоди билан таништираверинг. [/MOD]

[Tulqin Eshbekov]

ҚАҲРАМОН ЗАМОНДОШИМ!

Ёш истеъдод соҳибаси, теран фикрли қаламкаш Нигинахон Корчиева 1991 йилда Тошкент шаҳар Мирзо Улуғбек туманида туғилган. Лицейда таълим олиб юрган кезлари турк тилидан фан олимпиадасида 2-ўринни эгаллаган. Ранг-баранг мавзудаги шеърлари ва мақолалари матбуотда ёритилган. Айни пайтда санъатшунослик журналистикаси йўналишида таҳсил олмоқда.

* * *

Бугун замонамиз қаҳрамонлари қиёфасини ёрқин акс эттирадиган, қалб кечинмаларини чуқур очиб берадиган саҳна асарларини яратиш муҳим аҳамиятга эга. Қадриятларимизни эъзозлаш, жамиятимизда юксак маънавий муҳитни қарор топтириш, “оммавий маданият”нинг зарарли таъсирларига қарши туришда ижодкорларнинг ҳиссаси айниқса улкандир. Замондош образи қандай инсон бўла олишини шеър орқали тасвирлашга ҳаракат қилдим.
Кимдир қирқ жонини асраб яшайди,
Кимдир бўлиб яшар ёлғиз жонини.
Замондошлар ичра, вақтлар оша,
Излаймиз бугуннинг замондошини.
Қаҳрамон ким ўзи, у қандай одам,
Унинг хаёлида яшайди нелар?
Эҳтимол, қўлини кетмон қабартган,
Эҳтимол, қўлларин ўпгандир гуллар.
Эҳтимол, бугуннинг қаҳрамонидир,
Кимки шаън сафларга бўлиб юрса бош.
Балки қаҳрамондир сафларга кирмай,
Ўз юртин жонидан севган замондош.
Қаҳрамон меҳрини миннат қилмайди,
Мен демас ўз-ўзин кўксига уриб.
Ҳақиқий қаҳрамон мағрур яшайди,
Халқининг ғамида сочи оқариб.
Дўстим, ҳеч шарт эмас, баҳслар, низолар,
Бор ахир чин сўзни айтмоққа ҳаққим.
Ҳақиқий қаҳрамон эрур аслида
Қаҳрамонлар туққан шу азиз халқим!

Нигинахон КОРЧИЕВА

[Tulqin Eshbekov]

КАСБ ҲАҚИДА ЎЙЛАР

Чарос Садинова 1991 йилда Қашқадарё вилояти Китоб туманида туғилган. Қалами “Сарчашма”, “Янги газета”, “Китоб тонги” ҳамда “Маърифат” газеталарида чархланган. НТТ телерадиоканалида фаолият кўрсатган. Айни пайтда “Моҳият” газетаси мухбири.

* * *

Журналистика машаққати ҳақида кўп фикрлар айтилган. Мен ЎзМУ Журналистика факультети талабасиман эканлигимдан жуда бахтиёрман. Лекин, баъзи нашрларни кузатиб, баъзан ранжийман. Нега оқсаяпмиз, деган оғриқли савол пайдо бўлади. Аввало ҳар бир журналист қандай машаққатли ва масъулиятли касб танлаганини тушуниб етмоғи лозим. Ҳаётимиздаги айрим муаммоларни матбуот, радио, телевидениеда ёритиб, улар ечимини топишига ёрдам берсак мақсадга мувофиқ бўларди. Муаммоларимизни ўзимиз ҳал этмасак, бизга бошқалар ҳал этиб бермайди-ку...
Журналист касби учун тезкорлик ниҳоятда муҳим. Олма пиш, оғзимга туш, деб ўтирганлар ютқазади. Изланувчан ва кузатувчан бўлиш, улкан масъулиятни ҳис этиш, воқеа-ҳодисаларни тўғри баҳолай олиш журналист учун жуда зарур. Факультетимизда таълим олиш жараёнида шунга амин бўлдимки, ҳар бир журналистнинг ўзига хос йўналиши бўлиши керак экан! Сабаби омма эътиборини бир хиллик билан эмас, ўзига хослик билан кўпроқ жалб қилиш мумкин. Минглаб журналистлар ичида бўлгандан кўра, ўша мингларнинг аълоси бўлиш афзалроқ!
Етук журналист бўлиш учун меҳнат, меҳнат ва яна меҳнат талаб этилади. Ёзувчи Хуршид Дўстмуҳаммад таъкидлаганидек, “Журналист муносабатлар, ҳолат-вазиятлар кескин ўзгарувчан фавқулодда шароитларда ишлайди. Боши берк кўчаларга кириб қолиши, таҳликали ҳолатларда ўзини йўқотиб қўйиши ҳам ҳеч гап эмас”... Йўлимиздан ҳатто одам қиёфасидаги шайтонлар ҳам чиқиши мумкин, аммо нафсни енгсак, шайтонларни ҳам енгга оламиз! Вақт кутиб турмайди, эртага нима бўлишини эса ҳеч ким билмайди, бироқ журналист эртага нима бўлишини керак бўлса, чамалаб билиши лозим. Мавзуга тўғри ёндашиш, касбига фидоийлик – буларнинг ҳаммаси журналистлар учун зарур. Шу заминда яшаб туриб, унинг равнақи учун ҳеч бўлмаса озгина ҳисса қўшмаслик уят! Таассуфки, уни айрим журналистлар ўйлаб кўрмаяпти... Муаммо сизни изламайди, сиз муаммони изланг ва албатта ижодий изланинг. Тинимсиз изланишлар, ҳаракатларгина бирор чўққига чиқа олишимизга ёрдам бериши мумкин, чунки биз тарихга ўчмас из қолдираётган энг улуғ дақиқалар билан бирга нафас олмоқдамиз!

Чарос САДИНОВА

[barlos]

Ундов белгилари кўп-у, лекин бироз эркин фикр, фидойилик бор. Мақола аниқ факт билан ёритилган бўлса чиройли чиқади. Чамамда охирги вергул ўрнида нуқта қўйилгани маъқул эди. (ВА)