Dildagi satrlar

[Nigora Umarova]

Оламда аёл мадҳига достон тугамайдир,
Чин ишқ тугамас, ишқдаги армон тугамайдир.

Назм этди тугал Ҳофизу Саъдию Навоий,
Не қолди, деманг, шоири даврон тугамайдир.

Гар арсаи ашъор эса ишқ баҳсига майдон,
Майдона чавандоз кўпу, майдон тугамайдир.

Ҳусн аҳли учун бўлмас адо нозу адолар,
Ишқ аҳли учун нолаю афғон тугамайдир.

Ҳар неки ёнар, йўқ бўладир, лекин ажабким,
Мангу ёнароқ ишқ ўтида, жон тугамайдир

Эркин Воҳидов

[Nigora Umarova]

Ўзбек онаси

Муштипар ҳам ўзинг, буюк ҳам ўзинг,
Куйинчак ҳам ўзинг, куюк ҳам ўзинг.
Оламга татирлик суюк ҳам ўзинг,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Сени Тўмарис деб, мақтаганим бор,
Сен Темур бешигин тебратган бедор,
Сенсан Бибихоним, Нодираи зор,
Пайти келди айтмоққа, гапнинг хонаси,
Эй, Ўзбек онаси, Ўзбек онаси.

Ватанни Она деб бекор айтилмас,
Она буюрганда йўлдан қайтилмас,
Сен ўзинг Каъбамсан, Байтул муқаддас,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Бошингдан нималар ўтмади ахир,
Ватандек тақдиринг бўлди гоҳ тахир,
Бобур шоҳ бўлсада, қошингда фақир,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Гоҳида балқидинг Барчиндек тўлиб,
Ғўзадек қуридинг Турсуной бўлиб,
Тимсолинг яловда юлдуздек кулиб,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Фарзандинг қувонса – сен ҳам қувондинг,
Фақат болам дединг, яшадинг, ёндинг,
Нокас учраса, ўртандинг, тондинг,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Келажак тойчоғу тойингиздадир,
Жаннат ҳам, албатта, пойингиздадир,
Ватан-ку Сиз турган жойингиздадир,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Сизга таъзим қилиб турибман бу пайт,
Сизга бахшидадир энг шоҳона байт,
Азиз Юртбошимизга дуоларинг айт,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Абдулла Орипов

[Nigora Umarova]

Қаро зулфунг фироқида паришон рўзғорим бор,
Юзунгнинг иштиёқида не сабру не қарорим бор.

Лабинг бағримни қон қилди, кўзумдин қон равон қилди,
Нега ҳолим ёмон қилди, мен ондин бир сўрорим бор.

Жаҳондин менга ғам бўлса, улусдин гар алам бўлса,
Не ғам юз мунча ҳам бўлса, сенингдек ғамгусорим бор.

Агар муслиҳмен, ар муфсид ва гаро ошиқмен, ар обид,
Не ишинг бор сенинг, зоҳид, менинг не ихтиёрим бор.

Фиғоним ошти булбулдин, ғам йўқ зарр бу қулдин,
Басе, Бобур, ўшал гулдин кўнгилда хор-хорим бор.

Бобур

[Nigora Umarova]

Тириклик паноҳисан

Одам Ато наслига
Яратгандан иқболсан.
Бу беором дунёда
Ҳаловатли хаёлсан.

Сен мардона қасамсан,
Муножотсан, висолсан.
Шаҳидларнинг кўзида
Кетган армон-саволсан.

Беланчак қучганингда
Ҳур фаришта мисолсан.
Илон заҳрини кесган
Мўмиё малҳам-болсан.

Чимилдиқ ўтрусида
Жаннатий навниҳолсан.
Гўзаллик кўзгусида
Чарақлаган ҳилолсан.

Аллаларнинг шавқ сири,
Марсиялар оҳисан.
Марду номард, инсу жинс-
Тириклар паноҳисан.

Ойдин Ҳожиева

[Nigora Umarova]

Сизга

Ҳовлингизда шарқираган сой ўтса,
Елкангиздан қуёш ўтса, ой ўтса.
Қошларингиз мангу камон ёй ўтса,
Сарв янглиғ адил қолса бўйингиз,
Тўлармиди ҳеч тўлмаган кўнглингиз?

Бор юлдузлар сизга хизмат қилсалар,
Уммонлар ҳам сиз деб қуриб, тўлсалар.
Гуллар сиздан рангу ифор олсалар,
Чаман бўлса юрган кўча-кўйингиз,
Тўлармиди ҳеч тўлмаган кўнглингиз?

Севинч бирлан очилсалар эшиклар,
Уйингизни тор айласа бешиклар,
Янграсалар армон бўлган қўшиқлар,
Қиқирласа кўрган қизу ўғлингиз,
Тўлармиди ҳеч тўлмаган кўнглингиз?

Еллар қаро зулфингизни қулф этиб,
Елиб турса ҳуснингизни мулк этиб,
Саодату малоҳатни кўрк этиб,
Сарғаймаса ҳаргиз рангу рўйингиз,
Тўлармиди ҳеч тўлмаган кўнглингиз?

Дўстлар келиб ул кун бағрим тилсалар,
Бўғзим юлиб, андин бир най қилсалар,
Ҳаммалари қаторлашиб чалсалар,
Овозалар бўлса ўғил тўйингиз,
Тўлармиди ҳеч тўлмаган кўнглингиз?

Сирожиддин Саййид

[Nigora Umarova]

Мен офтобга алишмаган аёллар

Томиримни тирнар кўҳна саволлар,
Юрагимда гуллар ширин хаёллар,
Эй сиз ўзбекойим, офтобжамоллар,
Мен офтобга алишмаган аёллар.

Миллатнинг эртаси, миллатнинг насли,
Сиз атир нафасли, сиз райҳон сасли,
Кетмас бўлиб келган баҳорсиз асли,
Мен офтобга алишмаган аёллар.

Ўзбакий оҳанг бор кулгуларида,
Дурни талпинтирар ёғдуларида.
Ором ороланар туйғуларида,
Мен офтобга алишмаган аёллар.

Сизлар борсиз, сўзимизда садо бор,
Сизлар борсиз, ишқ аҳлида гадо бор,
Сизлар борсиз, минг бир дардга даво бор,
Мен офтобга алишмаган аёллар.

Офтоб ожиз асли онам олдида,
Бибихоним юрагимнинг ёдида,
Сиз яшайсиз Моҳларойим додида,
Мен офтобга алишмаган аёллар.

Гул узсам тутгунча қўлим гуллайди,
Мен сизга етгунча йўлим гуллайди,
Пойингизда ўлсам ўлим гуллайди,
Мен офтобга алишмаган аёллар.

Маҳмуд Тоиров

[Nigora Umarova]

Muqaddas ayol

Oshiqlaring poyingga gul otib ham bo’ldi,
Xilvatlardan labingdan bol totib ham bo’ldi.
Va bu haqda kimlargadir sotib ham bo’ldi,
Sen bari bir muqaddassan,
Muqaddas Ayol!

Avval: “Kel-ey. Quchog’imga to’l, balq”, dedilar,
Unamading, ayol o’zi ters “xalq” dedilar.
Icholmagach va o’girib sho’r, talx dedilar,
Sen bari bir muqaddassan,
Muqaddas ayol!

Sen daryosan, o’pganini qirg’oq yashirar,
Juftim bo’l,-deb chopganini har toq yashirar,
Jannatim,-deb quvonmasdan qumloq yashirar,
Sen bari bir muqaddassan,
Muqaddas Ayol!

Asli bu bor ermaklarning borar yeri Sen,
Rostu yolg’on ertaklarning borar yeri Sen,
Asov otday erkaklarning borar yeri Sen<
Sen bari bir muqaddassan,
Muqaddas Ayol!

Chorlashganda sen kelsang, goh bekor kelsang-da,
Mast davraga bir sarin yel, bir tor kelsang-da,
Xor kelsang-da, nomardlarga goh xor kelsang-da,
Sen bari bir muqaddassan,
Muqaddas Ayol!

Qimtinasan, astagina ko’tarasan bosh,
Ming yillikdir ko’zingdagi jovdiragan yosh,
Gunohkorlar mingu bitta Senga tegar tosh,
Sen bari bir muqaddassan,
Muqaddas Ayol!

Harir, xushbo’y badaningda toshlar izi bor,
Ko’kragingda egilgan ne boshlar izi bor,
Quyosh izi, kuydirgan quyoshlar izi bor,
Sen bari bir muqaddassan,
Muqaddas Ayol!

Halima Xudoyberdiyeva

[Jahongir Znaxar]

Ayol - bu poklikdan yaralgan ma'vo,
Taqdiriga tinchlik muqaddas savdo.
Tikirlik sut ichgan, suv ichgan daryo,
Bir qo'lida beshik, birida dunyo...

[Narzullayeva Yulduz]

ya dumayu chto kajdiy chelovek imeet pravo viskazivat' svoi vnutrennie chuvstva i ya dumayu chto etot razdel temi ochen' pomog tex lyudyam kotorie xoteli bi virazit' svoi chuvstva s pomoshyu poezii !

[Umida Shodiyeva]

Navro'zing muborak yurtim!

Jiydang gullagan bog'laring qutlug',
Ezgulik ufurgan chog'laring qutlug'.
Go'zallaring qo'ygan o'smalar qutlug',
O'g'lonlaring qurgan qo'rg'onlar qutlug'.


Davradagi yangragan navolar qutlug',
Yusuflaring eslar xayollar qutlug'.
Bul kunda tug'ilgan sof dillar qutlug',
Xalqim tilingdagi shu kalomlar qutlug'.


Osmonimiz to'ldirgan bulutlar qutlug'
Va bulutlardan yog'gan tomchilar qutlug'.
Yeringdagi ungan boychechak qutlug',
Eh jonimni yayratgan ushbu kun qutlug'!
Umida