Dildagi satrlar

[Nigora Umarova]

Yomg’irlar va ko’zyoshlar

Yillarga ham yomg’ir yog’ar,
Umrimizga o’xshar bog’lar.
Hijron bo’lib qolar tog’lar,
Dillarga ham yomg’ir yog’ar.

Bahoriymi, kuzgimizni –
Biz izlaymiz sevgimizni.
Bu yomg’irlar rahm qilmay
Yuvib ketar izimizni.

Oylarimiz so’lg’in-so’lg’in
Singillarga aylandilar.
Yuzimizdan oqqan sellar
Ko’ngillarga aylandilar.

Sog’inch qoplar xonamizni,
O’ylab yolg’iz jonimizni,
Biz qoldirib ketgaydirmiz
Yomg’irlarga onamizni.

Oq bo’yinli tannoz dunyo,
O’ynar tillo zanjirlari.
Kimni kutar yomg’irlarda
Ona uyning tandirlari ?

Biz orzu hamda armonlarning
Yoqalarin ko’targaymiz.
Tole bir kun yor bo’lsa gar
Yomg’irlarda ko’kargaymiz.

Sirojiddin Sayyid

[olim]

Qiynaladi oftobni kutib...

Qiynaladi oftobni kutib
Yomg'irlarda ivigan shahar...
...Uxlab qolding, yig'lab, qon yutib,
Ko'ringanda ufqda sahar.

Men taqdirdan hech nolimayman,
Gar almashdi shomga tongimni.
Olib keldi bu oqshom bilan
Uzoqlarda qolgan jonimni.

Mening sarson umrimga oydin
Rivoj tilab u chekdi fig'on.
Oyog'ini tavof qildim men -
Dunyoda eng omadsiz o'g'lon.

U hech narsa qilmadi talab,
Ming o'rgildi qoshu ko'zimdan.
Uning qaro sochlarin silab,
Bu tun kechdim hatto o'zimdan.

Yomg'ir yog'di mayda-maydalab,
Mayda-mayda bo'ldi yuragim.
Tong otguncha qayta-qaytalab,
"Sevasanmi" deya so'radim.

Qiynaladi oftobni kutib,
Yomg'irlarda ivigan shahar...
...Sen ketasan qayga qon yutib,
Meni qayga boshlaydi sahar?

Usmon Azim

[Nigora Umarova]

Ketmonchi qizlarga

O’ylasam o’ylarim ko’ksimda kuygan,
So’ylasam so’zlarim bo’g’zimda kuygan.
Barglarday so’lg’in-u, shamlarday ozg’in,
Qovjirab dala-yu tuzimda kuygan.
Oylar gulbog’idan tushgan yaproqlar,
Yulduzlar bag’ridan ko’chgan yaproqlar,
Nursiz paykallarda shu’la yozmayin,
Tuproqqa qorishib o’chgan yaproqlar.
Husnin chechaklarin chanoqlar yulgan,
Sochlarin gardida nasimlar o’lgan,
Sizning tarovat-u gul yuzingizni
Quyoshlar tushlikka tanovul qilgan.
O’ylasam o’ylarim ko’ksimda kuygan,
So’ylasam so’zlarim bo’g’zimda kuygan,
Barglarday so’lg’in-u shamlarday ozg’in,
Qovjirab dala-yu tuzimda kuygan.

Balog’at chog’ida balog’at ko’rmay,
O’n beshdan u yog’I halovat ko’rmay,
Za’faron rayhonday zabun o’tdingiz,
Davr-u davronlardan sadoqat ko’rmay.
Sabohdan sahroga aylanganlarim,
Sarg’aygan sarvlarim, gul, savsanlarim,
Sertashvish turmushning quchoqlaridan
Dalalar qo’yniga taylanganlarim.
O’ylasam o’ylarim ko’ksimda kuygan,
So’ylasam so’zlarim bo’g’zimda kuygan.
Barglarday so’lg’in-u shamlarday ozg’in,
Qovjirab dala-yu tuzimda kuygan.

Tun-kun ko’ksim ichra yong’in- u yong’in,
Yillardan so’raydir yillar so’rog’in.
Shomlarga shimilgan tuproq yo’llardan
Tollarim kelgaylar tolg’in va tolg’in.
Diydam diydiratgan diydorlaringiz.
So’ndi malohat-u dildorligingiz.
Tunlar paykallarda horg’in yuzgan oy
Sizning zor-u mahzun yodgorligingiz.
O’ylasam o’ylarim ko’ksimda kuygan,
So’ylasam so’zlarim bo’g’zimda kuygan.
Barglarday so’lg’in-u shamlarday ozg’in,
Qovjirab dala-yu tuzimda kuygan,
Sonsiz egatlarga tizilganlarim,
Qismati ketmon-la yozilganlarim.

Sirojiddin Sayyid

[olim]

Turg‘un Alimatov xotirasiga

Sho‘x va shan davraga bir kun nogahon,

Kirib keldi mashhur mug‘anniy ustoz.

Bunda xush kayfiyat edi hukmron,

Bari go‘zal edi, bari g‘oyat soz.

Ayvon peshtoqidan yulduzli falak

Bazmga sehrli nurin sochardi.

Bu Sharqning oqshomi, bu nozli malak

Har qanday dilning ham qulfin ochardi.


Mug‘anniy cholg‘usin olib daf’atan,

Ajib bir nag‘mani yubordi boshlab.

Go‘yoki yuz ochdi misli yo‘q chaman,

Go‘yo Majnun keldi ko‘zlarin yoshlab.


Go‘yo sarxush bo‘lib tebrandi dunyo,

Boshqacha tog‘lari, boshqa daryosi.

Yastanib yotardi qarshingda go‘yo

Buyuk Osiyoning dashtu sahrosi.

Avjiga chiqardi ulug‘ kuy, maqom

To‘lishib borgandek ko‘kning hiloli.

Davra-chi, beparvo edi batamom,

O‘zga nag‘malarda edi xayoli.

Abdulla ORIPOV
O‘zbekiston Qahramoni
www.uzas.uz dan olindi.

[Umida Shodiyeva]

Bahor bizni sog'inmaydimi?!

Kelding! Sog'inganim bilib qoldingmi,
Yoki xandon kulgularidan sho'x qizlarni tanib qoldingmi.
Momiqqina boychevhaklaring etaginga taqib olibsan,
Yurakalrning g'am-g'ussasini,g'uborini zumda yuvarsan.

Tomchilaring biram yoqimli,yo kuyimni topib oldingmi,
Shu kuylarda barcha fasldan,sen yoznichi o'rtoq bildingmi.
Qishni doim iliq kuzatib,qaynog'ingni yozga berdingmi,
O'zing har on mo'tadil bo'lib ,barchaga ham birdek yoqdingmi.



Bimaganim ,bildirib senchi yalpizlaring biram sochding-a,
Yoki o'zing sog'inganmiding,yana qaytib gullab ketding-a.
Endi bildim nega kelganing,sen bizni ham intiq kuttingmi,
Chiroyingni ko'z-ko'z qilibchi, rossa meni sog'intirding-a.

Umida

[Masud Mahsudov]

Баҳор гулларига қиламан ҳавас,
Жамалак сочларга тақишса қизлар.
Баҳор гулларига қиламан ҳавас,
Тўйиб ҳидлаганда юзи қирмизлар.

Баҳор гулларига қиламан ҳавас,
Келинчак мисоли безанган гўё.
Оқ ҳарир либос, у - ипакдан эмас,
Кўкламой қўлида яралган зиё.

Баҳор гулларига қиламан ҳавас,
Оламни тўлатар муаттар ислар.
Мусаффо ҳавода оламан нафас,
Жунбушга келади яширин ҳислар.

Баҳор гулларига қиламан ҳавас,
Кўзларга бир фараҳ бахш этади у.
Ва кўнгил розига ҳечбўйин эгмас,
Юрак туб-тубидан отилган туйғу.

Баҳор гулларига қиламан ҳавас,
Ифори тарқалар йироқ-йироққа.
Мўйсафид кўзига суртганича жим,
Шукрона айтади яратган Ҳаққа.

Баҳор гулларига қиламан ҳавас,
Бахтлидим ўхшолсам уларга шояд.
Юз минглаб дилларга шодлик улашиб,
Сўнг кетсам ҳаётдан, розийдим ғоят.

Баҳор гулларига қиламан ҳавас...


Mas'ud

[Nigora Umarova]

Оламда аёл мадҳига достон тугамайдир,
Чин ишқ тугамас, ишқдаги армон тугамайдир.

Назм этди тугал Ҳофизу Саъдию Навоий,
Не қолди, деманг, шоири даврон тугамайдир.

Гар арсаи ашъор эса ишқ баҳсига майдон,
Майдона чавандоз кўпу, майдон тугамайдир.

Ҳусн аҳли учун бўлмас адо нозу адолар,
Ишқ аҳли учун нолаю афғон тугамайдир.

Ҳар неки ёнар, йўқ бўладир, лекин ажабким,
Мангу ёнароқ ишқ ўтида, жон тугамайдир

Эркин Воҳидов

[Nigora Umarova]

Ўзбек онаси

Муштипар ҳам ўзинг, буюк ҳам ўзинг,
Куйинчак ҳам ўзинг, куюк ҳам ўзинг.
Оламга татирлик суюк ҳам ўзинг,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Сени Тўмарис деб, мақтаганим бор,
Сен Темур бешигин тебратган бедор,
Сенсан Бибихоним, Нодираи зор,
Пайти келди айтмоққа, гапнинг хонаси,
Эй, Ўзбек онаси, Ўзбек онаси.

Ватанни Она деб бекор айтилмас,
Она буюрганда йўлдан қайтилмас,
Сен ўзинг Каъбамсан, Байтул муқаддас,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Бошингдан нималар ўтмади ахир,
Ватандек тақдиринг бўлди гоҳ тахир,
Бобур шоҳ бўлсада, қошингда фақир,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Гоҳида балқидинг Барчиндек тўлиб,
Ғўзадек қуридинг Турсуной бўлиб,
Тимсолинг яловда юлдуздек кулиб,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Фарзандинг қувонса – сен ҳам қувондинг,
Фақат болам дединг, яшадинг, ёндинг,
Нокас учраса, ўртандинг, тондинг,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Келажак тойчоғу тойингиздадир,
Жаннат ҳам, албатта, пойингиздадир,
Ватан-ку Сиз турган жойингиздадир,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Сизга таъзим қилиб турибман бу пайт,
Сизга бахшидадир энг шоҳона байт,
Азиз Юртбошимизга дуоларинг айт,
Пайт келди айтмоққа, гапнинг хонаси,
Эй, Ўзбек онаси, Ўзбек онаси.

Абдулла Орипов

[Nigora Umarova]

Қаро зулфунг фироқида паришон рўзғорим бор,
Юзунгнинг иштиёқида не сабру не қарорим бор.

Лабинг бағримни қон қилди, кўзумдин қон равон қилди,
Нега ҳолим ёмон қилди, мен ондин бир сўрорим бор.

Жаҳондин менга ғам бўлса, улусдин гар алам бўлса,
Не ғам юз мунча ҳам бўлса, сенингдек ғамгусорим бор.

Агар муслиҳмен, ар муфсид ва гаро ошиқмен, ар обид,
Не ишинг бор сенинг, зоҳид, менинг не ихтиёрим бор.

Фиғоним ошти булбулдин, ғам йўқ зарр бу қулдин,
Басе, Бобур, ўшал гулдин кўнгилда хор-хорим бор.

Бобур

[Nigora Umarova]

Тириклик паноҳисан

Одам Ато наслига
Яратгандан иқболсан.
Бу беором дунёда
Ҳаловатли хаёлсан.

Сен мардона қасамсан,
Муножотсан, висолсан.
Шаҳидларнинг кўзида
Кетган армон-саволсан.

Беланчак қучганингда
Ҳур фаришта мисолсан.
Илон заҳрини кесган
Мўмиё малҳам-болсан.

Чимилдиқ ўтрусида
Жаннатий навниҳолсан.
Гўзаллик кўзгусида
Чарақлаган ҳилолсан.

Аллаларнинг шавқ сири,
Марсиялар оҳисан.
Марду номард, инсу жинс-
Тириклар паноҳисан.

Ойдин Ҳожиева