[Без оффтопа] Шеър азиз олам аро...

[albatros]

Aytgin.

Aytgin...
Ne sababdan istading ketmoq,
Quvonchim almashib, og'u-firoqqa?
Hijronni tutqazib, orzuga yetmoq
Maqsadmi, ayt senga, ketib yiroqqa?

Aytgin
Gunohimni tavbalar qilay,
Vaslingga yetmoq-chun nelar qilay ayt?
Ollohdan ikkimiz uchun baxt tilay,
Qalbimiz yig'latma, kel yonimga qayt.

Aytgin:
"Arazlarim barchasi yolg'on,
"Tuhfa" jafolarim sinov qabul qil.
Men faqat sen uchun yashayman ishon,
Men faqat sen uchun tug'ilganman bil!"

(c)

[Gulchehra Ibragimova]

Сообщение от мафтун

Иқбол МИРЗОнинг қуйидаги шеърига жуда ўхшар экан.

...Белгисиз хилхона, кўҳна мозорни –
Мозорки, қаровсиз харобазорни
Эшитганинг борми, кўрганинг борми?
Дилим вайрон бўлди сени соғиниб.

Саргардонлик мажнун-лайлига эди,
Бизники фақат гул сайлига эди.
Олисда бўлсанг ҳам майлига эди,
Боғим хазон бўлди сени соғиниб.

Нетай, пешонамда шу дард бор бўлса!
Қанийди бу дардга харидор бўлса...
Сени танлармидим, ихтиёр бўлса!
Ҳолим ёмон бўлди сени соғиниб.


Менимча икки бир бирига ўхшаш, аммо алоҳида ва ажойиб шеърлар...

Аввало эътибор учун ташаккур!

Халқда "Азага келган.. ўз дардини айтиб йиғлайди", деган мақол бор..
Яқин йиллар ичида суюкли шоиримиз ҳаётида кутилмаганда юз берган бахтсиз тасодиф..анча йиллар аввал мени ҳам четлаб ўтмаган.. Ўша аччиқ аламу изтироблар..изи сифатида яралган ярадор қалбнинг мунгли садолари эди бу шеър..

..аччиқ қисматимни ёдга солувчи дардчил фиғон-нолаларимдан иборат, аммо сўз тузилма ва топилмалари ўзимга ёққан шеърларимдан бири шу шеър:

...Хажрингда кул бўлдим,
ободим ўзинг,
Садқаи гул бўлдим,
дилшодим ўзинг,
Кўнгилга қул бўлдим,
озодим ўзинг,
Умрим хазон бўлди сени соғиниб..

Сенга увол бўлдим,
ҳилолимсан- сен,
Сенга малол бўлдим,
саволимсан-сен,
Ишқим завол бўлди,
ҳалолимсан-сен,
Кўнглим хазон бўлди, сени соғиниб..

"Чақалоқлар ҳамма тилда бир хил йиғлаганлари" каби..куйган қалблардан сизиб чиқувчи нолалар ҳам ўхшаш бўлса ажабмас..Айрилиқ азобин тортганлар, йўқотишнинг жабрини, хижроннинг юкини кўтариб юрганлар..англаса керак бу дардни..

[мафтун]

Сообщение от Gulchehra Ibragimova

Айрилиқ азобин тортганлар, йўқотишнинг жабрини, хижроннинг юкини кўтариб юрганлар..англаса керак бу дардни..

Дилда дардинг бўлмаса, сардафтаримни кавлама... (Машраб)


ҲАЗИН ҚЎШИҚ

Кўзларимга чўккан дард,
бунча мендан олиссан?
Жонимдан кечаман, шарт,
қара, жондай ёлғизман.

Кўзларимга чўккан дард,
айланмайсан тилимда.
Айт, сен недан башорат,
муҳаббат ё ўлимдан?!

Кўзларимга чўккан дард,
кўзимдан нур аритмай
Аримайсан, сен наҳот,
қаримайсан, қаритмай?!

Кўзларимга чўккан дард,
товонимга оққин сан.
Онамнинг тонгдай бегард
кўнглига энг яқинсан...

(с)

[Aliya]

Nihoyat... Bugun yana she'r yoza oldim...

Rozi bo'l...

Olisdan termuldik...
Lahzalar o'ti
Nigohlar bag'riga sehrlangani...
Shu so'nggi xotira.
Hijron bag'rida
Sog'inchning
Ko'zlarga muhrlangani...

Shunday olis ketdik.
Umidni tashlab,
Taqdirning hukmiga yog'dirib la'nat...
Aybimiz yukini sog'inchga yuklab...
Bizni kechirolmay yig'lar MUHABBAT...

Sevgining ko'zlari ko'r, deding, evoh,
Qalbgamas, aqlga bo'ysunmoq kerak!
Ming yillar poyiga to'kildi ohim,
Ming yillar qa'riga chekindi yurak...

Oq qog'oz bag'rini dog'lab yashadi
Telba barmoqlardan to'kilgan she'rim.
Mung to'la satrlar tilib o'tganday,
Zorillar ko'nglimning allaqayeri...

Samoga uloqib ketsa dardlarim,
Xotiring olovga tutsam maylimi?!
Sevib, hijroningda kuymoqdan ko'ra,
Seni sevmaganday...
Ketsam...
Maylimi?!

Izn ber, voz kechay ozorlaringdan,
Sen mendek kuyinma,
Baxt andozi bo'l!
Mayli, kechirmasin bizni Muhabbat,
Olloh yo'lida...
Sen mendan rozi bo'l...

Olisdan termuldik...
So'nggi xotira...
Nigohlar bag'riga muhrlangani...

[Minglar]

Мен келдим…
Сўнгги бор… юрагим кўтариб.
Эшигинг ортида қизариб-бўзариб,
Ўша сенга таниш сўзларим билан,
Ўша сенга таниш девона , ғариб…

Мен келдим...
Сўнгги бор ғурурим синдириб,
Қайсар вужудимни алдаб, кўндириб,
Ўша сендан кетган адаш йўллардан,
Илинжни дунёча умидга тўлдириб

Мен келдим…
Сўнгги бор , энг сўнгги дафъа,
Пойингга тўкилиб йиғламоқ учун,
Ўша, қачонлардир бағрим тиғлаган,
Муҳаббат ҳиссини илғамоқ учун

Мен келдим…
Севгисиз , совуқ юртлардан.


(C)

[Gulchehra Ibragimova]

Бир муҳаббат изладим

Ҳаловат топмадим
бир лаҳза ёрсиз,
Васлингга етмадим
тунлар бедорсиз.
Ишқда бахт бормикан
азоб - озорсиз-
Бир муҳаббат изладим такрорсиз.

Муҳаббат бормикан
маломат, хорсиз.
Ё висол бормикин
ҳижронсиз, зорсиз.
Истадим бир гўша
бўлса ағёрсиз,
Бир муҳаббат изладим такрорсиз.

Чўққида виқор йўқ,
бўлса гар қорсиз,
Сиз менинг дилимга
қайтмас баҳорсиз.
Бу гўзал бўстонда
наҳот мен ёрсиз,
Бир муҳаббат изладим такрорсиз.

[Gulchehra Ibragimova]

Фикрингиздан қайтманг

Биргина жоним бор, ёрим менинг ҳам
Қийнамангиз бунча ўту - оташларда
Сиз туфайли бошга тушди қанчалар ғам
Сизсиз қолсам бўлмасмиди чўл – даштларда?!.

Занжирланган сўзлар энди кишан узар,
Менга бўлган фикрингизни ўзгартманг ёр,
Эркак собит турса тинчин ким ҳам бузар -
Ёрсиз қолган остонамга қалқондир ор.

Сўнг бор келган фикрингиздан чекинмангиз,
Кечирмасман, ҳатто осмон тушса қулаб…
Кимдир ортга чалғитса гар бўйсунмангиз,
Дил кўникди бир жонини минг бор улаб.

Фурсат етиб тан оласиз “бой” бердим деб -
Ўтмоқ бўлиб ёниб битган "кўприк"лардан.
Йиғлайсиз-у, ўрни тўлмас пушаймон еб,
Фойда кўрмай атрофдаги “кўпик”лардан.

Дунё кезиб тополмайсиз битта дардкаш,
Хижрон надур, тушунарми ҳиссиз "қоқбош".
Дардингизга дардбон бўлган биздек яккаш
Куйимизда бўлибсиз-да, сиз Аламкаш.

Сўнгги фикр - ўша бўлсин Олий ҳакам,
Кўролмассиз ўйлаб ётиб тушларда ҳам.
Осонгина - тақдир, денг-у, куйинмангиз,
Бағри бутнинг ўзи қайда, дунё бир кам.

Синган қалбни бутламоқни ўзи душвор,
Орзуимиз бисёр эди, бўлдилар хор,
Ул фикрни айтиб қўйиб тонмоқлик - ор,
Икки дунё Гулчеҳрангиз топмангиз ёр...

[Gulchehra Ibragimova]

Келмадингиз

Келмадингиз,
кундузим қаро бўлди,
Васлингиз истагида бир кўнгил яро бўлди.
Шубҳалар панжасида умидим адо бўлди,
Келмадингиз, сиз нечун?

Келмадингиз,
мағрур юрак тиз чўкди.
Чақмоқ бўлиб сўзларим ашкнинг чокини сўкди,
Музлар ёғди, нажот йўқ, чўлпон кўзлар дур тўкди,
Келмадингиз, сиз нечун?

Келмадингиз,
қуёшим ботди қайга,
Дардларимни топширдим ҳазин навога, найга,
Кўнглимни тошга урдим қарамайин “ҳай-ҳай”га,
Билмадингиз сиз нечун?!.

* * *

Тун қаро, йўл қаро, қошлар қоп-қаро,
Қарашлар жабридан кўнгиллар яро,
Чанқасам, муҳаббат чашмаси яқин,
Ва лекин жонимга кирмагай аро.

Ўнгда тош, сўлда тош, юракларда тош,
Тошларнинг зарбига ким беролар дош?
Умр ёш, гўдак ёш, кўзлар тўла ёш,
Минг бир ўй комида чатнаб кетар бош...

[Minglar]

Men keldim... she'rini boshqacha tekislab yozib chiqdim. Ertalab sal shoshildim chamamda sizlarga taqdim qilgani...


Мен келдим…
Сўнгги бор… қалбим кўтариб.
Эшигинг ортида унсиз бўзариб,
Ўша сенга таниш сўзларим билан,
Ўша сенга таниш девона , ғариб…

Мен келдим...
Сўнгги бор қаддим синдириб,
Қайсар вужудимни алдаб, кўндириб,
Ўша сендан кетган адаш йўллардан,
Илинжга дунёча умид тўлдириб

Мен келдим…
Сўнгги бор , энг сўнгги дафъа,
Пойингга тўкилиб йиғламоқ учун,
Ўша, қачонлардир бағрим тиғлаган,
Муҳаббат ҳиссини илғамоқ учун

Мен келдим…
Севгисиз , совуқ юртлардан.
Мен келдим , муҳаббат, қошингга яна,
Яна оловингда куймoқлик учун,
Яна ўлмоқ учун ёна ва ёна!

Мен келдим...

[Gulchehra Ibragimova]

Сообщение от Minglar

Мен келдим...

Хуш кўрдик!