[Без оффтопа] Шеър азиз олам аро...

[Gulchehra Ibragimova]

Куз

(Антипатия усулидаги туркум шеърдан)
..Қизиқ, нимаи-ки топган бўлсам, кузда топганман.
Яна шуниси қизиқ-ки, ўша топганларимни кузда йўқотганман.

***
Тўзғиган баргларинг бошингдан қолсин,
Сап-сариқ сочлари таралмаган куз..
Ўрнингни гул-чечак, ёз, баҳор олсин,
Сен менинг бағримни яралаган куз.

Тўкилган баргингни бошимдан сочма,
Ранглари синиққан эй касалманд куз.
Яшил хаёлларнинг бағрини очма,
Ортиқча мақтовдан умидингни уз.

Хазонли боғларинг бунчалар файзсиз,
Кўчангда эзилиб сарсон юраман.
Тушларимда ёрни омон кўраман,
Сен—сариқ алвасти, ёмон кўраман.

Сўлғин далаларга юзим бураман,
Совуқ юлдуз каби титраб тураман.
Ҳувлаган боғингда хазондан бўлак
Ҳеч вақо тополмай оҳлар ураман.

Хазонларинг тўзғир атрофда гир-гир,
Ҳар қайси япроқдан сўрадим бир-бир: -
Бағрингда яшринган, айт, қандайин сир? –
Биз сендан бахтсизроқ, - келди бир шивир.

Бағрингдан бахт топдим, девдим, ҳар тугул,
Хазонли қўйнингга қайта топширдим...
Чекил, куз, ўрнингни баҳорга бергил,
Икки гул ғунчамни сендан яширдим.

Кет энди боғимдан, эй хазонли куз,
Балки бахт юз очур баҳор очса юз.
Боламни кафтимда олиб юраман...
Куз, сени севаман...
Ёмон кўраман!..
(с)

[Mahmud Jurat]

***
Кузнинг хазонлари жонимга тегди,
Ранглар жилосила алдайди мени,
Умримнинг тиғ кузи қаддимни эгди,
Қулоқга ярашмас тақдирнинг эни.

Ландавур мезонлар учади пастқам,
Умрмнинг бир исқирт кунлари каби.
Энди қариликнинг оҳ воҳи ҳамдам,
Микробдай беҳисоб дардлар насаби.

Куннинг қовоғидан қор ёғар мудҳиш,
Совуққа ҳарорат беролмайди тоб.
Дераза ортидан кўринади қиш,
Қайга кетди бирдан мен севган офтоб.

Биргина умиднинг жилоси майин,
Қотган юрагимга беради илинж.
Куз ҳам ўтиб кетар, ўтиши тайин,
Эрта қиш келади кўтариб қилич.
(С)

[Masud Mahsudov]

Куз ҳам, мана, кетмоқда изсиз,
Енгил шамол,
Барглар тўзони...
Оқшом кўки ҳафа юлдузсиз,
Хорғин ўйлар кезар фазони.
Туманлар-у, ғуборни ютар,
Кўҳна замин; далалар, тоғлар.
Мунғайганча кўкламни кутар,
Либослари эскирган боғлар.
Ёмғир ёғар, титраб йиғлайди,
Хўрсинганча она табиат.
Юрагимга қил ҳам сиғмайди,
Армонларга айланар ният...
Кўнглим гўё япроққа ўхшар,
Сарғаяр-у, тўкилар аста.
Яшилимдан қолмаган асар,
Дардим уммон, юрагим хаста.

Куз-чи, секин кетмоқда изсиз,
Енгил шамол, барглар тўзони...

(c)

[мафтун]

ЙЎНАЛИШ

Бугун юрагимда бўронлар кезар,
Тўфонлар безовта қароғларимда.
Ким мени англайди, ким дардим сезар?!
Бир дарддош муттасил сўроғларимда.

Ҳақиқат ямлади ҳайратларимни,
(Этак ой юзига бўлолмас парда).
Тишларим қаритди ҳасратларимни,
Ҳолбуки, тилимнинг юраги зада.

Кўнглимдан кўзимга қуйилмоқда нур,
Ташқарида зулмат, ташқари – рўё.
Оғзимни пойлашдан чарчади охир,
Дунё — ҳасратимга харидор дунё.

Ҳеч қандай афсун-ла очилмас дилим,
Дардимни ёдингдай тутаяпман мен.
Шаксиз, кипригингга туташдир йўлим,
Шубҳасиз, кўзингга кетаяпман мен.

(c) 1996

[Alisher Asror]

Самога элтгувчи йўлимда
Мен ҳамон бир ўзим кезаман,
Кундан-кун, ойдан-ой, йилдан-йил,
Ёлғизлик азобин сезаман.

Сендами истагим мазмуни,
Кўнгилнинг дардига даволар?
Оҳ , сенсиз татимас рангин гул,
Булбулнинг куйидек наволар.

Ўрнимдан мен базўр тураман,
Кўтармак оғирми ҳавони ?
Не гуноҳ қилибман , эй , Тангрим,
Етмаслик орзумга равоми ?

Қўлларим осмонда муаллақ,
Ўзингдан ёлбориб сўрайман:
Дилимга дилдош бер, тушунган
Тенгимни ёнимда кўрай ман...


(C)

[Masud Mahsudov]

Сени кутиб-кутиб чарчадим ғоят,
Соғинмасдан қўйдим висолингни ҳам.
Армонларни туйиб, мана, ниҳоят,
Тақдирга тан бердим. Кўзларимда нам.

Кўзим эмас, менинг йиғлайди қалбим,
Юрак ҳам бир меъёр урмайди сира.
Сенга аён эмас сўнгсиз дардларим,
Билмасдинг эканин ҳислар бокира.

Севгандим...Иложсиз ишқимдан кечдим,
Ҳаётга қизиқиш йўқолди тугал.
Севганим – гуноҳим, умидим – айбим,
Ноумид хаёллар бошимда чигал.

Сен бошқа келмайсан – бу менга аён,
Сени эслаганда дардга тўламан.
Кун келиб сен мени қўмсаган чоғинг,
Ҳижрон азобида ўлган бўламан.

(c) 2006

[Mahmud Jurat]

***
Эркни эркинлар билади,
Қуллик не у қуллар билмас.
Эҳ қуллар кўп йўқ адади,
Қулларда ҳеч ҳавас бўлмас.

Қул қалбида зўр очкўзлик,
Пул, маишат унга орзу.
Имкон бўлса қулда зўрлик,
Унда йўқдир тош тарозу.

Қул интилар юқорига,
Унга имкон, илож керак.
Ана энди оч қоринга,
Ютади у ҳатто терак.

Қул мансабнинг асли қули,
Мансабга у минса борми,
Ўзидан ҳам кутар улгу.
Озод қул ҳам асли қулку.
(С)

[Masud Mahsudov]

Сени ўйлаяпман,
Қайдадир сен ҳам,
Олис юлдузларга
Термуласан жим.
Кимнидир кутасан
Интиқиб шу дам,
Мен ҳали билмаган,
Дилгир малагим.

Кичик бир нуқтада,
Жамулжам хаёл,
Йўл қараб чарчаган
Нигоҳинг ғамгин.
Толиққан қарашда
Сон мингта савол,
Ораста қалбингга.
Бермаяпти тин.

Ичинг анор каби.
Қизилликка ғарқ,
Ҳар битта донаси –
Азобинг, дардинг.
Айт нега жим тилинг,
Сарвинози Шарқ,
Бунчалик сабрни
Қаердан олдинг?

Битмас матонат-у
Туганмас тоқат
Ва жиндек табассум
Кўзларингда жо.
Юрагинг ақлингдан
Истайди шафқат,
Ҳар битта зарбаси –
Юзта илтижо.

Бас, етар!
Қийноқли дамларинг
Ортда,
Унутиб ғамларни,
Шодон куламиз.
Эзгуликка тўла
Кўркам ҳаётда
Албатта иккимиз
Бахтли бўламиз...

Соғиниб, ўртаниб,
Энтикиб ёниб,
Сени ўйлаяпман...

(c) 2006

[Aliya]

Biz go'yo...

Biz - go'yo hech kimmiz bir-birimizga,
Ortiqcha bir so'z ham kelgudek malol...
Tutash yo'l bitgandek taqdirimizga,
Bizni bog'lab turar nedir, ehtimol...

Bilmaymiz - qayerda biz uchrashganmiz,
Balki jannatdadir...
Yo koinotda...?
Go'yo bir lahzaga suhbatlashganmiz,
Ming yillar avvalgi o'zga hayotda...

Qiziq, ertaklarga ishonganmidik,
Nur rangida ko'rib taqdirimizni?!
Ko'ngil og'rig'idan yo tonganmidik,
Yoki, sevganmidik bir-birimizni...?

Biz go'yo sevganmiz birimizni...

[Aliya]

Va`da.

Ortiq bitta so'z ham aytmayman Sizga,
Bugun har va'dadan tamom qaytganman.
Bir bor uchrashmagan yillarimizga
Sizga aytarimni yig'lab aytganman...

Ortiq bitta so'z ham aytmayman Sizga,
Gar, malol kelmoqda qalbim salomi...
Mayli, jazo bo'lsin gunohkor qizga
Go'yo Siz qizg'angan sog'inch kalomi...

Ortiq bitta so'z ham aytmayman Sizga,
So'zlarim uvoli tutmasin, hayhot!
Yuragim dor bo'lib bu yetim hisga,
Dilimda o'ladi birgina faryod:

"Men sizni sevardim...
Sevaman hamon..."
Ortiq...
Bitta so'z ham aytmayman Sizga...