Dildagi satrlar

[Gulinoz]

Qadrimni toptashga urinmang,
Balandlab ketaman aks holda.
Ozgina yon bersam, suyunmang,
Daraxt ham bo’y cho’zar shamolda.

Yo’l bermang birovni qarg’ashga,
Gullarga o’qraymoq gunohdir.
Haqliman xotirjam yashashga.,
Shu zamin menga ham pahohdir.

Yoy kabi egsangiz qaddimni
Ulug’lab oylarga mengzayman.
Men yerdan topmasam baxtimni,
Huv baland osmondan izlayman.

Men nafas rostlay deb inchunun
Ozgina yon bersam suyunmang.
O’zimdan kechmayman siz uchun,
Qadrimni toptashga urinmang!

Birovning qaddini tiklash-chun
O’z qadring tuproqqa tenglama,
Ko’nglingni asragin bus-butun,
Sen uni osmonday keng dema.

Yog’dular sochilar tinimsiz
Ochilsa muhabbat daftari.
Ko’kdagi bir dardday ko’rimsiz
Tuyular dunyoning dardlari.

Goh daryo ko’nglingga qil sig’may
Bir qatim nur tushsa o’t ketar.
Kichrayar hech kimga bildirmay-
Quyunday yoprilsa xavf-xatar.

Birovning qaddini tiklash-chun
Yiqilgan kunlarim ertakmas.
Ololsam-olaman bus-butun-
Menga ham yarim dil kerakmas.

Yo’lingda kamonday egilgan
Dardlarni ichingga yutmagin.
O’zini ardoqlay bilmagan
Ko’ngildan ro’shnolik kutmagin!

Zamira Egamberdiyeva