[Без оффтопа] Шеър азиз олам аро...

[Masud Mahsudov]

Куз;
Хазон япроқлар ғамларни ёпар,
Шу олтин фаслдан келмайди кетгим.
Излаган ҳар ондан ҳикматни топар –
Кузни, деб менчалик куймайди ҳеч ким.

Ўзимни аямай, сўзим авайлаб,
Бисотимда калом асраб атайлаб,
Ҳаққа охир билмас шукрона айлаб,
Завқ-шавққа менчалик тўймайди ҳеч ким.

Танага жо этиб меҳр конини,
Бахт учун қидириб бор имконини,
Ёмғирларга идиш қилиб жонини,
Бағрини менчалик ўймайди ҳеч ким.

Замонлар алмашар,
Йил кетар ўтиб,
Ёшликдан бир зум-да, келмайди кечгим.
Хазонрезгиларни интиқиб кутиб,
Ҳаётни менчалик суймайди ҳеч ким...

(с)

[Aliya]

Имкон.

Ҳақ суйган бир мағрур малика эдим,
Тиз чўкдим бир нигоҳ оловларига.
Оташда куйдириб не кўнгилларни,
Енгилдим кўнгилнинг синовларига.

Битта нигоҳимга зор этдим кимни,
Яна ким мен сабаб юраги хаста...
Оёғим остида хор бўлган севги
Осмонга туташди наҳот бир пасда?!

Ҳа, мен мағрур эдим!
Энди шу ғурур –
Бошимга тош бўлиб ёғилди наҳот?!
Қанча шаҳзодларни гадо этган қалб
Бир ишқ қаршисида эгилди наҳот?!

Ё хато қилдимми, ҳаёт, айт, нега
Кўнглимни ишқ деган ўтда доғладинг?!
Бу менга жазоми ё Ҳақдан туҳфа?
Кимнинг йўлларига кўзим боғладинг?!

Йўллар тугамайди интилган сари,
Бағрида яширин минг битта синов.
Ҳеч йўқса, етмоққа имкон бер, ҳаёт,
Қалбимни ўғирлаб кетган-ку биров...

[Aliya]

Ҳасрат.

Тўй базмини ёритади тун чироқлар,
Лек қалбимни ёритолмас бу чироқлар,
Юрагимни ёндиради дард-фироқлар,
Кўзларимдан суратингиз кетди, ёрим,
Бахтли бўлинг, юрагида ўзга борим!
Билмам, қачон сўнганини умидларим,
Билмам, қачон ботганини хуршидларим,
Билмам, қачон хазон бўлди Беҳиштларим,
Юрагимдан ҳисларингиз кетди, ёрим
Бахтли бўлинг, ўзга ёрга вафодорим!
Қайғуларни ҳис қилмайди, ҳур келинчак,
Тахтидан шод, бахтидан масрур келинчак,
Ҳаётингга сўраганим нур, келинчак...
Ғамларингиз менга ҳамроҳ бўлди, ёрим,
Ишқ боғидан кетиб булбул, қолди сорим.
Хазон бўлди – муҳаббатни унутдингиз,
Муҳаббатга садоқатни унутдингиз.
Маҳшар – сўров, қиёматни унутдингиз,
Армонларим сизни излаб кетди, ёрим,
Хазон бўлди, кузга айланди баҳорим.
Сизга теккан саболардан қизғанардим,
Рашк ўтида минг ёниб, минг ўртанардим,
Бугун қалбни куйдирмоқда ўша дардим,
Юрагимни баҳорим тарк этди, ёрим,
Бахтли бўлинг, боқишлари сеҳркорим!
Унутмайман ул беғубор ҳазилингиз,
Энди излаб боролмайман манзилинигз,
Ўзгага гул тутмоқ экан тақдирингиз,
Видолашув куни келди, хайр, ёрим,
Йўлларимиз айро бўлди, жафокорим!
Хотиралар тинч қўярми ҳаёлингиз?
Қай офтобга алмашдингиз ҳилолингиз?!
Тарк этдингиз, севги қолди – уволингиз,
Етим ишқни менга ташлаб кетинг, ёрим...
Бахтли бўлинг, юрагида ўзга борим!

[Aliya]

Номсиз... шеър.

Соям каби яқинсан – тутолмайман ҳеч...
(Қўшиқдан.)

Соя бўлдим – изингингиздан етолмадим,
Қалбингиздан мени узоқ тутаяпсиз...
Кетолмадим... Кўнглингиздан кетолмадим,
Сиз-чи, мени ташлаб, қайга кетаяпсиз?

Соя бўлдим – изингингиздан етолмадим,
Кўзингизда ойни олиб кетаяпсиз...
Ўзга ёрни “ёрим” дея айтолмадим,
Сиз бу дардга айтинг, қандай чидаяпсиз?

Соя каби ёнгинамдан жилмадингиз,
Йиғлаб кутдим – севги изҳор қилмадингиз,
Юрагимда не ҳис кечар – билмадингиз,
Ўзга қалбда не бор – қайдан билаяпсиз?

Қайда энди бахтим – ҳеч ким билолмайди,
Менсиз ўтган қай лаҳзада кулмоқдасиз?!
Қалбим сиздан ўзга дардни деёлмайди,
Сиз-чи мени зор йиғлатиб... Севмоқдасиз!

Соя каби ортингиздан қололмадим,
Изингизда бахтни сарсон этаяпсиз...
Кўзингиздан кўзларимни ололмадим,
Сиз-чи, мени ташлаб, қайга кетаяпсиз?

Соядан ҳам яқинимсиз...

[Aliya]

Учаётган хазон.

Очилган лолага бурканди адир,
Олчалар гуллади баҳор чоғида.
Гўзал бир боғдаги азим чинорнинг
Япроғи ёзилди умр боғида.
Доимий назорат жонига тегди,
Чинорга сўз қотди, ҳусусан, деди:
– Эй, азим чинорим, белга мадорим,
Мен сендан сўрайман эрк-у оромим.
Чинор дер: – Ўйлаб кўр менинг сўзларим,
Ҳар нарсани кўрар ожиз кўзларим.
Шабадалар сени эрмак қилади,
Зарларнинг қадрини заргар билади.
Дилдаги сўзларинг айта олмассан,
Хуллас... Ёнимизга қайта олмассан.
Япроқ бу сўзларни қилмади писанд,
Руҳсат сўраб кетди – учди шод-хурсанд.
Шамолларда учди беланчакдайин,
У ўзгара борди кун ўтган сайин,
Аввалги ҳолидан қолмабди пича,
Яшил либос эди устида кеча.
Тамомила кирди олтин рангига,
Секин назар солди теварагига.
Йўлларда эзилиб, топталди роса,
Ёзиши биздан-у, сиздан хулоса.
Бу мисол оддий бир япроқ тақдири,
Аслида инсонлар кўнглин таъбири.
Ўз она юртини ташлаб кетган чоқ,
Эзилди, топталди шу кичик япроқ.
Инсонлар, сиз асло юртни тарк этманг,
Ватанни соғиниб, армонда ўтманг!

Оффтоп:

14 ёшимда ёзган шеърим. Бироз саёз, аммо, ўзгартиришга кўзим қиймади

[Masud Mahsudov]

Битмас ўйларимга ёмғир чоҳ қазир,
Узоқларга кетиб қолар хаёлим.
Булутлар зиёни қилишган асир,
Майда томчиларга айланар жоним.

Ҳар бир донасига ҳижрон қўшилган –
Висол умидини ташлаб кетмаган.
Ҳар бир донасига армон қўшилган –
Азалдан орзуга инсон етмаган.

Бир улкан шаршара – жудаям ажиб –
Сабринг соҳили ҳаддан ошмоқда.
Барча ғуборлар-у, чангни опичиб,
Осмоннинг чашмаси ерга тушмоқда.

Кейин...
Соғинчлар ҳам ёшга айланиб,
Ёғинга ҳамоҳанг томчилар бир-бир.
Нозик ҳисларимни танимай-таниб,
Қанча сувлар кечди бечора тақдир.

Фалак ва заминни боғласа сувлар
Дийдорга юракнинг келади рашки.
Недандир чанқаган дилим ҳувиллар,
Ёмғирлар – соғинган қалбимнинг ашки..

(c)

[Masud Mahsudov]

Ҳижрон ҳоким бу дунё, aсли бир кам яралган.
(қўшиқдан)

Ҳаёт – паст-баланддан иборат сўқмоқ,
Унга гоҳ гул, гоҳи тикан ўралган.
Ойнинг-да, юзида азал эрур доғ,
Бу дунё аслида бир кам яралган.

Эзгуликка абад ёндошдир мушкул,
Шукрки, оқибат яшар ҳартугул.
Олами фонийнинг устунлари ул –
Яхшилар негадир мулзам яралган.

Инсонни букади туҳмат тошлари,
Йиғидан емрилар тоғ бардошлари...
Гўдакнинг тинмайин тўккан ёшлари
Йиғилиб, сўнг оби зам-зам яралган

Кун ўтар, қоврилиб турмуш ўтида,
Баъзан шукр қилиб, баъзида чидаб...
Бахт дея аталмиш уйим четида,
Мунғайиб, ҳеч кетмас ғуссам яралган

Кўнгил яримларнинг маъвоси бўлиб,
Чин дўстликнинг асил маъноси бўлиб,
Ҳижронлар азобин давоси бўлиб,
Меҳр, деб аталмиш малҳам яралган

Ҳаёт мазмунини қайдан билардик?
Кимга ҳавас қилиб, кимга кулардик?
Нима ҳам деярдик, не ҳам қилардик?
Бу дунё аслида бир кам яралган...

(c)

[Aliya]

Алвидо.

Армон қучган рўёларни сенга ташлаб,
Ёлғизликнинг кўчасидан ўтаяпман.
Излаганинг – дунёларни сенга ташлаб,
Фаришталар диёрига кетаяпман...

Баҳоналар излаб, қочдинг керагингда,
Сенсиз ҳижрон дардларини ютаяпман.
Юрагимнинг ҳокин ташлаб юрагингда,
Фаришталар диёрига кетаяпман...

Тушларингга кирмагайман, бўлма бедор,
Малак бўлиб, самоларга учаяпман.
Энди сенинг холинг сўраб қилмам безор,
Фаришталар диёрига кетаяпман.

Ҳа, биламан, изламайсан мени сира,
Синган қалбни сенга тухфа этаяпман.
Шу сабабдан қолдирмасдан бир хотира,
Фаришталар диёрига кетаяпман.

Буюрсин-эй Сенга мендан қизғонганинг,
Вафо қилсин ўша дунё – ишонганинг,
Тенгинг бўлмай, майли, бўлсин дунё – Сенинг,
Мен кетайин...
Фаришталар диёрига...

[Alisher Asror]

Ёнар қора кўз билан,
Юрак-бағрим куйдирдинг,
Яна ширин сўз билан,
Суйдирдинг-а, суйдирдинг...

Жой топмадим ўзимга ,
Қайга бошимни урай,
Дунё тордай кўзимга,
Сенсиз яшаб на қилай!?

Кунимда ҳаловат йўқ ,
Тунлар уйқу тарк этган,
Дилимни куйдирган чўғ,
Ҳаёлим олиб кетган....

....Қора кўзчи бепарво,
Қора кўзнинг иши кўп,
Муҳаббат унга ғавғо,
Макрдан юмуши кўп.

1986 йил

(С)

[Hero]

Men sening yodingda qolmoqchi edim

Fuzuliy lutf etib ketgan bir zamon,
Go‘zallar vafosiz, aldoqchi dedim.
Yoningda qolishga yo‘q edi imkon,
Men sening yodingda qolmoqchi edim.

Negadir istardim qiynalishingni,
Yuragingga kamand solmoqchi edim.
Onangga aytolmay qolsang tushingni...
Men sening yodingda qolmoqchi edim.

Do‘stlar kechib qo‘ygan edi bahrimdan,
Kimlardandir qasos olmoqchi edim.
Haydab chiqardilar hayotlaridan,
Men sening yodingda qolmoqchi edim.

Alamim, hasadim, ginam tufayli,
Ehtimol ustingdan kulmoqchi edim.
Sog‘insang, o‘rtansang, yig‘lasang mayli,
Men sening yodingda qolmoqchi edim.

Ko‘zingni ko‘zimga bermading sira,
Ishondingmi, yo‘qmi, bilmoqchi edim.
Seni ko‘p o‘yladim. She’r yozdim qara,
Men sening yodingda qolmoqchi edim

(C)