[Без оффтопа] Шеър азиз олам аро...

[Gulchehra Ibragimova]

***
Бир кўрсатув бўлар эди “Бегойим” деган. Ўшанда ўтган-кетгандан “Сиз турмуш ўртоғингизни уйда ким деб чақирасиз?, Ким дея мурожаат қиласиз”, дея савол беришган эди..Кимдир “адажони”, “ойижониси”, “бегим”, “Исми билан”, “бош фарзандимнинг отини айтиб чақираман..ва ҳоказо”..жавобларини беришганди..

Айримлар эса “эй” дейман.., “Ҳеч нима демайман..” каби қўпол жавоблар ҳам бўлганди..

Ўшанда Бошловчи шу мавзуда шеър ёзиб беришимни сўраганда ёзилган шеър:

Ёстиқдошимга эркалик

Бегим мени эркалангиз нозигим деб,
Тақдиримга битган тилло узугим деб,
Атиргулдай хушрўйим денг, хушбўйим денг,
Барча дилбар ахли ичра тузугим денг.


Бағрингизга босинг маҳкам оху дея,
Самолардан нур таратган моҳим дея,
Сенинг билан бахтим, вақтичоғим дея,
Юпатингиз сен яшнаган боғим дея.

Сўнг бошимга-бошни қўйиб чечагим денг,
Оғир, сендан, жоним-менинг кечмагим денг,
Сўз топмайин қийналсангиз майли бегим –
Йўлларимга чирмашган гулпечагим денг.


Бегижоним, эркалангиз меҳр билан,
Кўзларимга боқинг севги, сеҳр билан.
Кўнгил бердим, кўнгил беринг бир сир билан,
Вафо бизни боғлаб турсин бир нур билан.


Эркалангиз бегим мени нозигим деб,
Пешонамга битган тақдир ёзиғим деб,
Қўлларимни боғлаб олган узугим денг,

Эрка кийик, кўзи хумор, сузугим денг.

(с)

[Masud Mahsudov]

Уммон бўлиб улгурган дардларим қатра-қатра,
Аслида бедор тунлар оққан манглай терларим.
Юрагимнинг қаъридан чиққан ҳар битта сатри –
Ҳеч кимга айтолмаган нолаларим – шеърларим...

Ёлғизлик дарёсининг тошқин сувини ичган,
Ифорларин қоғозга гупиллаб, ёйиб, сочган,
Кўнглимнинг гулзорида ийманишиб юз очган,
Қизғалдоғу, настарин, лолаларим – шеърларим.

Сут бирла қонга кирган меҳр оҳанги, сози,
Яхшиликка чақирган илтижо ҳам ниёзи,
Гудакликда онамнинг хазин наво овози –
Қулоғимда янграган аллаларим – шеърларим.

Қалбга яқин қаторлар хаёлда такрор-такрор,
Байтларни сотгувчи мен, ҳамда яна харидор,
Ўзим қўшиғин куйлаб, ўзим бўлиб бастакор,
Кўнглим куйига баста, яллаларим - шеърларим

Дилда не кечар эрса, сўйлагувчи забоним,
Кимлар учун яхши-ю, кимлар учун ёмоним,
Кетсам-да бу, оламдан, қолдиргувчим нишоним –
Бири шўх, бири ғамгин болаларим – шеърларим...

(c)

[Colorado]

Оффтоп:

Ажоиб каллиграфия. Ухшаш намуналар кимда бор, бу усул кандай номланади?

[Aliya]

Bugun.

Bugun Seni ko'rdim...
Milyon yillarning
Qa'riga berkingan Sog'inchlar kuydi...
Yonog'imni yuvgan shabnam taftiga
Hijronning sezgisi dosh bermay qo'ydi...

Har kunning zalvori asrga tengdosh,
Besh yuz yil yelkamni shu yuk ezdimi?!
Sen tomon qadamlar yetmadi ammo,
(G'urur ko'lankasi yo'lim to'sdimi...)

O'rtada qadamlar...
Yettimi-sakkiz...
O'rtada g'ururning shaffof ko'zgusi...
Nigohlar yashirin...
So'zlar aldamchi...
Qarshimda diydorning muz qadar yuzi...

Hatto, hol so'rmoqqa jur'atlar ojiz,
Bitta so'z aytmoqqa hojat qolmagan...
Ammo, yuraklarda allanima bor...
Boqishlar nazdida mehr o'lmagan...

O'rtada qadamlar...
Yettimi-sakkiz...

Оффтоп:

DAVOMI BOR...

[Gulchehra Ibragimova]

Севгимни айтмабман

Ичдан эзилсам-да, тўкилиб, сўлиб,
Меҳрингга интизор ўкиниб, тўлиб
Ҳажрингда бир куни йиқилиб, ўлиб -
Қолсам-да, айтмасман севгимни ошкор.


Бормадим ёнингга ғурурим букиб,
Бормабман оҳ чекиб, - кўз ёшим тўкиб,
Соғинчлар қалбимнинг чокини сўкиб,
Кетса-да, айтмасман ошиқлигимни...


Кутдим, севавердим, чидадим фақат,
Тиландим ишқимга лойиқ муҳаббат.
О, сенга етмоқ чун қанча уқубат
Кўрсам-да, айтмасман севгимни ошкор.


Васлингга етмоққа фурсат ҳам битмас.
Билки бу аламнинг доғи ҳеч кетмас.
Ишқим ўлдирмоққа журъатинг етмас -
Ёнсам-да, айтмасман ошиқлигимни.


Фожиам аёндир-ҳисларим ўжар,
Бу фоний дунёдан номим ҳам ўчар.
Сийратим бир гулга, ё нурга кўчар
Сен шунда англаб ет-ошиқлигимни.

(С)1990 й

[Lobar AZIZ]

Tashlanmagan uch qadam qoldi,
So`ng yetaman,
ostonangizga.
Hech bo`lmasa,
o`limim oldi-
Bir bor boqing devonangizga…
Yig`lab o`tdim,
vaslingiz so`rib,
Jannatidan kechdim.
Netaman?
Ko`zingizni bir lahza ko`rib,
Jahannamga qaytib ketaman…
Mehr istab ko`nglimni tutib,
Hadya oldim-
kuydirguvchi muz.
Siz uxlaysiz.
Shu tob qon yutib-
Ko`changizda yig`lamoqda kuz…
Qaray-qaray ko`zlarim toldi,
Yot bitilgan peshonangizga.
Hech bo`lmasa…
O`limim oldi-
Bir bor boqing, devonangizga.

Tashlanmagan…
uch qadam qoldi…
(c)

[Alisher Asror]

Орзу яқин сизни кўрмакдан,
Ҳаёлимни тута олсам бас...
Шунда бўлиб бахтга ёр , ҳамдам,
Бу ишқ ичра абад қолгум маст.

Оҳ, сиз мендан шунча узоқда,
Умрча йўл камлик қилса-я,
Интилсаму ета олмасам,
Ета олмай паймон тўлса-я.

Талпинаман ёлқин бир нурга:
Балки ўша нури-зиё - Сиз,
Юзингиздан тушган шуладир,
Балки боқиб турган кўзингиз !?

(C)

[Gulchehra Ibragimova]

Кетаман

Тан олмай ул "булбулгўё” ни
Ип қилиб эшасан рўёни.
Мен сенга қолдириб кетаман -
Ёлғонлар ин қурган дунёни.

Севган-ла яшамоқ бир ширин,
Дилларда не ҳислар яширин?!
Очмадим қалбимнинг туб сирин -
Кетаман бу олчоқ дунёдан.

Чопасан икки ўт ичида,
Халоват - игнанинг учида.
Азизим, тақдирга кўн, чида,
Кетаман, аросат, дунёнгдан.

Мен кетар осмоним кўп баланд,
Ундаги орзулар сарбаланд.
Ишқ дилни боғлади бандма-банд.
Кетаман бу ночор дунёнгдан.

Ғурурсиз вужуд бу-ўликдир,
Бу кўксим орларга тўлиқдир.
Менсиз ҳам ул кўнглинг синиқдир,
Кетаман мен ўзга дунёга.

Кўз очиб кўрганим ёлғонми,
Ичаман ул оби-ёвғонми.
Бу дунё бувангдан қолганми,
Кетаман мен бошқа дунёга.

Истасанг кетиб кўр мард бўлиб,
Кимнидир куйдирар дард бўлиб.
Қолсанг қол, илашма гард бўлиб,
Кетаман ёлғизлик дунёмга.

Кетаман, ютқаздим, юрт бердим,
Не қилсам, не берсам бут бердим,
Сўнг сўзим, унутгин дўст, дердим -
Кетаман мен дўстсиз дунёнгдан.

..кетаман
(с)

[Lobar AZIZ]

Қара -
Кўраяпти сенсиз ҳам кўзим,
Ҳар оқшом сабримга тиланиб тўзим,
Мен сенга бахтларни соғиниб,
Ўзим-
Кўнглимни музларга бериб яшадим…

Йиқилсам ортимдан суяди тақдир,
Йиғламоқ ёлғондир,
Кўникмоқ – ҳақдир!
Сенга умр тилаб,
Кўксимдан бир-бир-
Сен отган тошларни териб яшадим…

Тиканни гул атаб,
Аламни суйиб,
Армоннинг отини Муҳаббат қўйиб…
Исмингни айтганда пичирлаб,
Куйиб…
Кўнглимга бир муштлаб,
Уриб яшадим…

Ачинма!
Қошингда титрамоқ бекор,
Пойингга сочилса-
соғинчлар беор!
Сен бахтдан барқ уриб кулганингда ёр-
Мен дарддан сарғайиб,
Қуриб яшадим…

Ўкинма!
Тушингда изғисам дайдиб,
Ўксинма!
Ҳушингга келмайман қайтиб…
Исмингни минг бора такрорлаб айтиб-
Сувратинг сурмадек суриб яшадим…

Фалакни тарс ёрди лабдаги титроқ…
Дил қаттиқ. Ер қаттиқ.
Осмон ҳам йироқ…
Сочилдим.
Тўкилдим…
Билмадинг, бироқ!
Мен ишқдан юзимни буриб яшадим!

Сўз дема…
Сўрама шу ҳаста ҳолим.
Игнанинг учида турибди жоним…
Сен менинг исмимни билмадинг, золим!
Мен сени ўзимдан қўриб яшадим!

Қара,
Кўраяпти, сенсиз ҳам кўзим…
(C)

[Gulchehra Ibragimova]

****
Дардкашим мен бу кун соғиниб кетдим,
Бу отмас тонглардан оғриниб кетдим,
Сизга етолмадим, қоқилиб кетдим
Мен Сизга етмадим жоним Онам-а?!..

Борилмас йўлларнинг баҳонаси кўп,
Остонаси мўлў, хилхонаси кўп
Қалбдаги истакнинг шоҳонаси кўп
Сизга боролмадим жоним Онам-а?!..
Сизга етарманми
онам, Онам-а?!

(с)
***

Иқрорман, мен букун этмайман инкор
Иқболим кулмайин қўйди иқрорман..
Ул ўтган кунларнинг бариси бекор
Мен бугун ўзга бир дарддан беморман..


Ул дард-ки, бағримни ёндирар чўғдек,
Ул ғам-ки, кўксимга ботади ўқдек..
Гоҳида тан бору, руҳим ҳам йўқдек
Онам-ла юрардим шод, кўнглим тўқдек..


Ушбу кун бир дийдор қўмсайди кўнгил,
Ул кўнгил хазондек тўкилган бир гул
Оҳ, энди онам йўқ, эй кўнглим кўнгил
Онасиз нетарман сингин-а, сингил..

..Эй кўнглим меҳрсиз сингин, тўкилгил..

(с)