14-yanvar Vatan himoyachilari kuni

[мафтун]

Форумдошимиз ўртоқ Долимовга
ва бошқа барча Ватан ҳимоячиларига

Бир кеча қўққисдан уйғониб кетдим,
Соатга қарасам, иккими ё уч.
(Эҳтимол совуқдан) жунжукди этим,
Ташқарига тортди аллақандай куч.

Қандайдир шарпани илғаб ўзича,
Гўё огоҳ этиб бизларни хавфдан,
“Ҳавф, ҳавф”, дея бор овозича
Кучук ҳурар эди қўшни тарафда.

Кўнгил-да, атрофни кўздан кечирдим,
Шукрки, ҳаммаёқ тинч ва осуда.
Тунчироқ нурида кўриб, энтикдим,
Фарзандларим ётар қатор уйқуда.

Ҳовлида ўйноқлаб, куйлайди шамол,
Бир-бирин рақсга тортар хазонлар.
Дарахтлар жимгина сурмоқда хаёл,
Бошини тебратар гулу райҳонлар.

Тинчлик, ҳотиржамлик – эзгу тушунча,
Шаксиз, яратганнинг инояти – бу.
Ва айни пайтда қанчадан қанча,
Бедор нигоҳларнинг шарофати – бу.

Кунни кун, тунни тун, демай, сарҳадда,
Бедор, сергак турган, эй аскар укам,
Сизлар бор, яшаймиз тинч, фароғатда,
Яхшиям сизлар бор – бизларга не ғам.

Тинчлик қадрин билдим ота бўлгач мен,
Шулар бор, кўнаман ҳаёт ғамига.
Бола кулгусига, айтгил, нима тенг,
Дунёни алишмам табассумига.

Сенга кўнгилдаги борини айтай,
Сабру сабот тилай айни чоқда ман.
Яхши ният билан сизларга атай,
Учта ўринбосар ўстирмоқдаман.

Мудомки турибсиз кўкракни кериб,
Йўл йўқ ҳавотирга, йўл йўқ қайғуга.
Энди дилбандларим ёнига кириб,
Уйқуга кетаман, ширин уйқуга.


(с)2012 й.