Afsuski, topilmas hamdam bu damda,
Bir vafoli yor yo'q aslo olamda,
Odamlardan vafo istama zinhor,
Vafo odati yo'q bani odamda.

Pahlavon Mahmud

Ariq lablarida uyg‘onar yalpiz,
Boychechak qitiqlar shaffof saharni.
Nega indamaysan, gapirgin, hoy qiz,
Men nima qilaman sensiz bahorni...

...Аслида дунёда танҳо нима бор?
Пахта ўсмайдими ўзга элда ё?
Ёки қуёшми севгимга сабаб?
Ахир қуёшли-ку, бутун Осиё.
Мен нечун севаман Ўзбекистонни,
Боғларин жаннат, деб кўз-кўз этаман.
Нечун ардоқларкан тупроғини мен,
Ўпаман, тупроғинг бебаҳо Ватан.
Аслида тупроқни одил табиат,
Тақсим айлаган-ку, ер юзига тенг
Нечун бу тупроқ, деб йиғлади Фурқат,
О, Қашқар тупроғи, қашшоқмидинг сен?
Мен нечун севаман Ўзбекистонни?
Сабабин атгин, десалар менга.
Шоирона, гўзал сўзлардан олдин,
Мен таъзим қиламан она халқимга:
Халқим, тарих ҳукми сени агарда,
Мангу музликларга элтган бўлсайди,
Қорликларни макон этган бўлсайдинг,
Меҳрим бермасмидим ўша музларга?
Ватанлар, Ватанлар,
Майли, гулласин,
Боғ унсин мангулик музда ҳам, аммо,
Юртим, сени фақат бойликларинг чун
Севган фарзанд бўлса, кечирма асло!

Oy yana beparvo ko‘chamdan o‘tar,
Shoshib Vaqtdan oldin qoshingga yeldim.
Ko‘zlaringni ochgin, pardani ko‘tar,
Qara, tushlaringdan chiqib men keldim!

Men bilmayman, tushgan yo'lim xatomi, xayrli,
Rostin yozay tun zulmati o'rab kelgan choq.
Garchand tushmagan bo'lsam ham bir lahza ayru,
Bir lahza ham yashamadim siz bilan biroq.

Halima Xudoyberdiyeva

Qalbim nozik misoli shishadurmen,
Fig'on etsam-da serandishadurmen,
Ko'zim yoshi agar qondur ajabmas,
Firoqida dilimni teshadurmen.

Bobo Tohir

Navoiy abasdir, Pushkin ham abas,
Rim yo'q, Samarqand yo'q, dahshat, alhazar.
Moziydan biror nom qolarmidi, bas,
Kelajakning o'zi bo'lmasa magar.

A.Oripov.

Rabim, tilima kalomi xush joriy qil,
Ma'ni guharini kilkim iysori qil,
Har so'zki, sahifa uzra tahrir etsam,
Ko'rgan kishi ko'nglini giriftori qil.

Munis

Lekin men tirikman,xavotir olmang,
Umid uzganim yo’q hayot gulimdan.
Sizsiz yashamoqni o’rgandim,demak,
Sizni sevmay yashash kelar qo’limdan

Malika Mamadaliyeva

Nadomat nimaga va afsus nechun?
Olamda neki bor o'char beshafqat.
Bizning vazifamiz ko'nikmoq beun,
Bizning vazifamiz unutmoq faqat.

Abdulla Oripov