Bulutlar ko`k kezar kunda piyoda
Ufqqa oftob botar qizil gulxanday.
Armonim ekansiz yorug` dunyoda,
Sizni o`ylamasdan yasharman qanday?

М.Ю

Yig'lamaymu, o'tti umri, ayo shohim,
Qabsob keldi qarong'uluq, chiqqil, mohim.
Sendin o'zga yo'q panohim, takyagohim,
Kecha-kunduz tilaganim iymon erur.

Ahmad Yassaviy

Ruhim cho'kib borar, g'ururim horir,
Tuhmat zavollari egdi boshimni.
Ishonch siniqlari kesar doshimni,
Ruhim uchib borar...
Yuragim og'rir...

Ruhim qilich bo'lib qolsa-yu,
O'z-ozimni chopib tashlasam.
Tilka-tilka qilib bag'rimni,
Yuz bo'lakka bo'lib tashlasam.
Yerda yotgan har bo`lakda,
Sening isming bo`lar namoyon.
Tilkalangan majruh yurakda,
Qon o`rniga oqadi isyon.

Zulfiya Mo'minova

Nega qarab turibsan osmon,
Boshimdan gul yog‘ib bersan-chi!?
Yuzlarimdan o‘pmaysanmi oy,
Bulutdan baxt sog‘ib bersan-chi!?

Oqaverdi suvdek yillarim,
Hatto o‘ylab ko‘rmabman bir oz.
Shu so‘zni deb o‘tibdi umrim,
Shu so‘zni deb yashabman xolos.
Men bu so‘zni qanchalar kutdim…

Behzod Fazliddin

***
Мен - замон жонига пичоқ ботирган,
Ишқ на деб тинмайин бошин қотирган,
Ўзим кимники деб оҳ тортганлардан,
Дардман юрагига ҳамдард орттирган.

Мен ўша, дардманнинг кўнглин овлаган,
Мен ўша, Айюбдек яра ковлаган,
Ўз бошин бепулга бозорга солиб,
Сароблар ортидан тинмай қувлаган.

Фақат ўзингизни изладим бекам,
Тану жонингиз деб бўзладим бекам,
На осмон сас берди, на ердан овоз,
Бу сўз нелигини айтинг менга ҳам.
(С)

Meni holi qo’ying,
tinchimni buzmang,
Dardsiz hamsuhbatga ehtiyojim yo’q.
Shundoq ham yarador yuragim ezmang,
Sizni tinglamoqqa hech ilojim yo’q.

Bandman:
Hislar aqlim bilan tortishayapti;
Doim bir-biridan ular norozi.
Yolg’iz qolmoqligim istagan payti,
Mening tuyg’uimga kerakmas qozi.

Uzr,
Halovatni istayman shu on,
Ko’ngil sahrosiga bolib surgunlar.
U damda huzurni xohlar ekan jon,
Kiprigim qoqmasdan o’tadi tunlar.

Ma’zur tuting,
Endi keting yonimdan,
Xayolimni yig’ib, tinglayin o’zni.
Istehzo aralash boqmangiz zimdan,
Va so’ng hayronlikdan tikmangiz ko’zni.

Meni holi qo’ying, buzmang tinchimni,
Baribir bilmaysiz dil sog’inchimni...

(c)

...Инсон бир йўловчи, узоқдир манзил,
Етгунча учрайди қанча ғов-довлар.
Турмушнинг юки зил, оғир шуни бил,
Чекинсанг атрофда кўпаяр ёвлар.

Мағрур бўл, яшасанг бургутдек яша!
Қарға “минг йил” яшаб фақат гўнг ковлар.
Насибанг топилар ризққа яраша,
Шер бўлсанг тулки ҳам мушукдек “мовлар”.

Баъзан номард юриб, мардлар ўлгуси,
Дард чексанг яқининг юзини товлар.
Бу кураш майдонда нелар бўлғуси –
Ёки бир муттаҳам қалбингни овлар.

Чидасанг бўлгани, барига фақат,
Гоҳо кутмаганинг изингни пойлар.
Тоълеинг кулгуси бир кун қатма-қат,
От изин босади албатта тойлар.

Сен талпин чўққига, эзгулик деб ён,
Машаққатсиз ҳаёт – номардга сийлов!
Ҳушёр бўл, ағёрнинг ҳолидир аён –
“Яхшилик қилсанг-да, ниш урар чаён”!

Узоқни кўра бил, эгилмасанг бас,
Қуёшим, Сен борар йўлинг олдинда.
Олға кет, йўлингни тўсмасин ҳеч кас,
Иймони бут бўлмоқ сабоқдир динда!

Ва сўнгги Гулчеҳра сўзим ушбудир: -
Ҳунарни эгалла, бўлмагайсан хор.
Доимо маърифат йўлини қидир
Омадинг от чопсин, толъей бўлсин ёр!

***
Рангсиз кузнинг рангсиз бўёқлари бу,
Оҳиста учади узилган барглар.
Мени ҳам бу барглар куйлатиб қўйди,
Қайтмас баҳоримдан келтириб хабар.

Хазон тўдалари шивирлар сокин,
Офтоб этагини ёпинган дала.
Уватда чўзилиб ётар аллаким,
Уватдай ажинлар соябон унга.

Эриниб ўтлайди қияда говмиш,
Сохта сўналарга силкийди қуйруқ.
Ғунажин хўрсиниб қайтарар куйиш,
Илк бор оналикка кутади буйруқ.

Қоғозга тушмоқда рангсиз бўёқлар,
Менинг ҳам қалбимда кезмоқда мезон.
Ҳойнаҳой кузда бу, қақшар оёқлар,
Мана, кечки шомга айтилар азон.
(С)

Navro'zguli, boychechagim, bormisan,
Men senga zor, sen menga ham zormisan?
Muz ichida asradim men ko'nglimni,
Sen o'zingni asrab, baxtiyormisan?

Omonliqsan, to'tiyosan ko'zlarga,
Sevgi maktubisan ma'sum qizlarga.
Suykalasan dudoqlarga, yuzlarga,
Bitta o'zing bir butun gulzormisan?

Ninachining qanotidek barging bor,
Asal va sut bo'yi kelar atring bor.
Qadrim bilib yo'qladingmi, qadring bor,
Yolg'izginam, yolg'izlarga yormisan?

Ay, ko'ngilni qitiqlagan erka gul!
Ay, olamni ko'mgan orzu-sirga, gul!
Qayga desang, men ketarman birga, gul!
Sen ham mendek dardga xaridormisan?

Oy ham kulcha ko'rinarmish ochlarga,
Bulut ko'rpa bo'lib zor-muhtojlarga.
Tashna dilu ruhi yalang'ochlarga -
Birdek tansiqmisan, madadkormisan?

Jonim gulim, o'tinaman, so'lmay tur,
Dunyo yashnaganda hazon bo'lmay tur.
Meni yetim qilma, ketma, o'lmay tur,
Sen ham mendek dunyodan bezormisan?

Iqbol Mirzo