"Интернет-менинг ҳаётимда" мавзусида танлов

[Nigora Umarova]

https://img.uforum.uz/images/zzjulpt3188271.jpg

"Ўзбекистон" радиоканалининг «Маданий-маърифий, бадиий эшиттиришлар»муҳарририяти, Ўзбекистон Халк таълими Вазирлиги, ZiyoNET ахборот ресурс тармоғи, шунингдек, «Гулхан»журнали, ҳамда «Тонг юлдузи» газетаси ҳамкорликда «Интернет-менинг ҳаётимда» мавзусида танлов ташкил этмоқда.
«Интернет — менинг тасаввуримда», «Интернет тармоғи-менинг нигоҳимда» каби расмлар чизиш ҳамда «Интернет-менинг нигоҳимда» мавзусида иншо ёзиш танловида умумтаълим мактабларининг 6-9 синф ўқувчилари иштирок этадилар.Танлаб олинган ижодий иш намуналари «Гулхан», «Тонг юлдузи» газеталарида ҳамда «ZiyoNET» порталининг «fikr.uz» сайтида батафсил ёритиб борилади.

Азиз ўқувчилар!
Мазкур танловда иштирок этинг ва махсус совғаларни қўлга киритинг. Тафаккур оламингизни бойитувчи, билимларингизни чархловчи, яхши дўст ва ҳамкор сифатида қайси интернет сайтларидан оқилона фойдаланаётганингизни биз билан ўртоқлашинг.
Шу мазмундаги мулоҳазаларингизни изоҳли расмлар ва ижодий иншоларингизда кутиб қоламиз. Бизнинг электрон манзил bolalar@mtrk.uz
Тошкент — 47, Истиқлол кўчаси 49-уйга ёки Toшкент шаҳар, 100011, Навоий кўчаси, 28-Б уйга жўнатинг. «Болалар учун радио танловига» деб ёзишни, иншоларни қўлёзма тарзда тақдим этишни унутманг! Танлов 1 мартдан то 25 майга қадар давом этади.

[Tulqin Eshbekov]

Мазкур кўрик — танловда иштирок этинг ва махсус совғаларни қўлга киритинг.

Танловда форумимиз ҳам қатнашиши мумкинми? Бу борада қандай ҳаракатлар бор?

[Anvar Atakhanov]

Танловда форумимиз ҳам қатнашиши мумкинми?
Нечанчи синфда укийсиз? :-)

[Tulqin Eshbekov]

Нечанчи синфда укийсиз?

Саволингизни ўқиб, ёшариб кетдим! :) Эсиз, биз мактабда ўқиган замонларда бунақа тараққиётни ҳатто тасаввур ҳам эта олмасдик...
Танлов масаласида эса форумдошларимиз бўлган мактаб ўқувчиларини назарда тутгандим...

[Hero]

Танлов масаласида эса форумдошларимиз бўлган мактаб ўқувчиларини назарда тутгандим...


Азиз ўқувчилар!
Мазкур кўрик — танловда иштирок этинг ва махсус совғаларни қўлга киритинг.

Албатта бу хақда тўлиқроқ маълумот берсангиз

[Nigora Umarova]

Азиз ўқувчилар!
Мазкур кўрик — танловда иштирок этинг ва махсус совғаларни қўлга киритинг.

Албатта бу хақда тўлиқроқ маълумот берсангиз

"Syurpriz". :)
Tanlov ishtirokchilari sog'ani qo'lga kiritib tushgan rasmlarida sovg'aning nimaligini bilasiz. :)

[Bekmirzo]

...
Мазкур кўрик — танловда
...
Fikri ojizimcha, yuqoridagi ta'rifda "ko'rik" so'zi noto'g'ri qo'llanilgan... ;)

[Nigora Umarova]

Muhtaram forumdoshlar!
Siz qaysi rasmga, nima uchun ovoz bergan bo'lardingiz. Rasmning raqamini keltirib o'z sharhingizni bersangiz, biz mukofotlarni shunga ko'ra ajratardik.


1) https://img.uforum.uz/images/mpzomzm1085848.jpg

2) https://img.uforum.uz/images/oiznjog3008222.jpg

3) https://img.uforum.uz/images/owwuwow2854262.jpg

4) https://img.uforum.uz/images/nhemqtf6713044.jpg

5) https://img.uforum.uz/images/swvddnx9976798.jpg

[Nigora Umarova]

6) https://img.uforum.uz/images/aknvsec1905580.jpg

7) https://img.uforum.uz/images/fcjavyj1465135.jpg

8) https://img.uforum.uz/images/pmmdswl414377.jpg

9) https://img.uforum.uz/images/pfdhuav904046.jpg

[Nigora Umarova]

10) https://img.uforum.uz/images/vyfskma2468883.jpg

11) https://img.uforum.uz/images/odpwxpl7301404.jpg

[Anvar Atakhanov]

1-расм. Манимча хамма расмларни ичида табиийроги, яъни мактаб укувчиси чизгани билиниб турибди ва мавзуга моси хам шу булса керак, хуллас манга ёккани шу.

[Tulqin Eshbekov]

Барча расмларда беғубор болаликнинг ширин орзулари акс этган... 5-расм муаллифига овоз бераман.

[Nigora Umarova]

1-расм. Манимча хамма расмларни ичида табиийроги, яъни мактаб укувчиси чизгани билиниб турибди ва мавзуга моси хам шу булса керак, хуллас манга ёккани шу.

Ўқувчи логотип ўйлаб топганга ўхшайди. Расм ҳам ноанъанавий тарзда чизилган.

[Nigora Umarova]

Барча расмларда беғубор болаликнинг ширин орзулари акс этган... 5-расм муаллифига овоз бераман.

5-расмдаги - "Ота-боболарими дунёга юксак илмлари билан танилишган, биз ҳам дунёга билимимиз орқали таниламиз"-мазмуни мужассам.

[Asqar Xalilov]

Siz qaysi rasmga, nima uchun ovoz bergan bo'lardingiz.
Men 10-rasmga ovvoz bergn bo'lardim. Rasmdagi yozuvlar internetga juda mos deb o'ylayman.

[Bakhtier Tukhtaev]

Яна вариантлар борми? Агар иложи булса, хар бир вариантни эгасини номини езсангиз. Иктидорли ешларни номини чикаришимиз керак деб уйлайман.

[Nigora Umarova]

Яна вариантлар борми? Агар иложи булса, хар бир вариантни эгасини номини езсангиз. Иктидорли ешларни номини чикаришимиз керак деб уйлайман.

Bakhtier aka, juda ko'p variantlarni kutgandik. Biroq o'qituvchilar kam tashabbus ko'rsatishdi. Shu sababli...
12-uyun, seshanba kuni, soat 10.00 da UZINFOCOM markazida g'oliblarni taqdirlash marosimini o'tkazamiz. Shunda rasmning muallifi haqidagi ma'lumotlarni batafsil berib fotohisobot topshiramiz.

[Anvar Atakhanov]

Shu sababli...
12-uyun, seshanba kuni, soat 10.00 da UZINFOCOM markazida g'oliblarni taqdirlash marosimini o'tkazamiz. Shunda rasmning muallifi haqidagi ma'lumotlarni batafsil berib fotohisobot topshiramiz.
Иби, бугун 5-июнку!

[Nigora Umarova]

Иби, бугун 5-июнку!

;) "12-iyun" deb o'qilsin.

[Nigora Umarova]

Assalomu alaykum, hurmatli tanlov tashkilotchilari,
Sizlar e'lon qilgan tanlov juda ham menga yoqdi. Men Internetni qanday o'rganib, qanday ishlatayotganim haqida yozishga harakat qildim.
Sizlarning fiklaringizni onam va ustozlarim bilan kutib qolaman.
Salom bilan Shahlo Ahmedova.

Internet mening hayotimda

Birinchi bor internet bilan uchrashganimni juda yaxshi eslayman. O’shanda men Marg’ilon shahridagi 5- maktabda o’qir edim. Maktabimizga kelgan mehmon barcha o’quvchilar oldida so’zga chiqib, hohlovchilarni Toshloq tumanidagi 11- umumiy ta’lim maktabi qoshidagi Kompyuter- internet markaziga taklif qilib, bu markaz yozgi ta’til paytida bepul ish olib borishini aytdi. Lekin juda ko’pchilik o’quvchilar va o’qituvchilar bu taklifni aldov deb tushundilar. Bu xabar haqida onamga aytganimda, onam hayratlandi va ertasiga ertalab onam bilan shu maktabga bordik. Maktab internet markazi rahbari, ingliz tili o’qituvchisi Rustamjon Badalov bilan uchrashib, internet markazi bilan yaqindan tanishdik. Tanishuv davomida haqiqatdan ham internet markazining faoliyati bepul ekanligini bilib oldik. Men esa 2009 -yil oktabr oyidan boshlab shu maktabga qatnab, internet markazida kompyuter saboqlarini o’rgana boshladim. Keyinchalik esa internet tarmog’ida ishlashni o’rgandim. Internet men uchun boshqa bir olam bo’ldi. U boshqa bir sayyoraga o’xshaydi, bu sayyorada faqat kompyuterni tushunadigan, u bilan ishlay oladigan va internet sayyoraning barcha burchaklariga bir zumda etib borishni biladigan kishilargina yashar ekan, degan tasavvurga keldim. Bu menga ertaklar olamini eslatdi. Chunki kompyuterdagi tugmachalarini bosib, ma’lum soniyalar ichida boshqa mamlakatlarga borib қolganimni, yoki darslarni yaxshi o’zlashtirish uchun kerakli bo’lgan ma’lumotlarni kattalar va ustozlar yordamida tezda topib olganimni eslasam, quvonib ketaman. Albatta, kompyuter va internetdan foydalanishni yaxshi o’rganib olishimda shu markaz rahbari R.Badalov domlaning roli katta bo’lganligini doim dilimda saqlab kelyapman.
2009- yil noyabr oyida ustozimiz R.Badalov Amerika Qo’shma Shtatlarida ish olib borayotgan www.epals.com ta’lim portali e’lon qilgan xalqaro internet tanlovi haqida xabar berdi. Ko’pchilik o’quvchilar qatnashish istagini bildirdilar, ammo internet markaziga qatnaydigan 3ta o’quvchi – men, Jasur, Mahliyo opa o’z ishlarimizni yozib, ustozga ko’rsatdik. O’qituvchimiz yozgan ishlarimizni ko’rib, yo’l qo’yilgan hato va kamchiliklarni to’g’rilash kerakligini tushuntirdilar. Hatolarimizni to’g’rilab, insholarimizni www.epals.com tanlovga yubordik. Bu tanlov global isib ketishing oldini olish va planetamizni saqlash haqida edi. Yozgan ishlarimiz dunyodagi ko’pgina o’quvchilarning ishlari qatori ko’rib chiqildi. 10 dekabr kuni ustozimiz R.Badalov bizni tabriklab, ishlarimiz tanlov hay’atiga ma’qul kelganligini aytdi va men yozgan insho esa birinchi o’ntalikka kirib, maxsus diplom bilan mukofotlangani bilan tabrikladi. 2009- yil dekabr oyida Kopengagenda bo’lib o’tgan global isib ketish muammolariga bag’ishlangan xalqaro Konferenstiyada, bu insho boshqa g’olib insholar qatori dunyo olimlariga o’qib berilishi meni quvontirdi. Men bundan juda g’ururlandim va ustozimiz Badalov domlaga, kompyuter saboqlarini o’rgatgani uchun minnatdorchilik bildirdim. Xalqaro internet tanlovda mukofotli o’ringa ega bo’lgan bu insho hozirgi kunda mana bu internet manzilda turibdi: http://www.epals.com/media/g/studentsspeak/tags/Uzbekistan/default.aspx

[Nigora Umarova]

Bu quvonchli voqea meni internet tarmog’iga yanada mustahkamroq bog’lab qo’ydi. Shundan so’ng internet markazi men uchun darsdan keyingi asosiy mashg’ulot joyimga aylandi. Har kuni darsdan so’ng shu erga kelib, internet orqali turli tanlovlarni izlab, ustoz yordamida darslarimga kerakli ma’lumotlarni topib, ularni qayta ishlab, o’z bilimlarimni mustahkamlab, turli internet tanlovlarda qatnashib kelyapman.
Internet tarmog’dan foydalanish keyingi yillarda juda ham rivojlandi va kishilarning asosiy ehtiyojlaridan biriga aylanib qoldi. Kompyuter va internet tarmog’idan keng foydalanish juda ham foydali ish ekanligini ko’pchilik qatori men ham aniq tushunib yetdim. Ayniqsa, bu boradagi tushunchalarim 2010 yil iyun oyida MAPRYAL tashkiloti va “Russkiy Mir” jamg’armasi tomonidan e’lon qilingan xalqaro internet tanlov paytida yanada aniqlashdi. Bu tanlov Birinchi Xalqaro Rus Tili Festivali doirasida bo’lib, u butun dunyodagi millati rus bo’lmagan va rus tilini o’rganayotgan yoki bu tilni biladigan kishilar uchun e’lon qilindi. Mana shu voqeaning o’zi ham internet tizimida xalqaro miqyosdagi katta shov-shuvga asos bo’ldi. Jahon Rus tili festivalida qatnashishga talabgor bo’lgan internet foydalanuvchilar har kuni juda ko’p martalab http://mirfest.russkoeslovo.org saytiga kirib, festival doirasidagi tanlov shartlarini bajara boshladik. Bu tanlov shartlariga ko’ra 4ta, ya’ni - kattalar, rus tili o’qituvchilari, talabalar va maktab o’quvchilari nominastiyalari belgilangan edi. Men ham ko’pchilik o’quvchilar singari internet orqali, onlayn usulda, test savollariga javoblar berdim. Bu borada internet markazi ustozi amaliy yordam ko’rsatdilar. Rus tili festivaliga bag’ishlangan tanlovning birinchi turida g’olib bo’lganimni internet orqali festival saytidan bilib oldim.
Tanlovning 2-tur topshiriqlari dekabr oyida boshlandi va 2011 yil may oyigacha davom etdi. Bu turda qatnashish jarayonida internet resurslaridan keng foydalandim, zarur bo’lganda ustozimiz Rustam Badalovdan yordam so’radim. Bu tur shartlariga ko’ra “Men Rus tili festivalidan nimalarni kutyapman” degan mavzuda insho yozib, internet orqali festival qo’mitasiga yubordim. 2011 yil iyun oyi boshlarida tanlov natijalari e’lon qilindi. Bu quvonchli xabarni men avvaliga festival saytida ko’rib, juda ham xursand bo’ldim. 2011 yil 9 iyun kuni esa mening elektron pochtamga Sankt-Peterburg shahridan, Birinchi Xalqaro Rus tili festivali tashkiliy qo’mitasi nomidan tabriknoma va taklifnoma kelganda, onajonimning ko’zlaridan yoshlar to’kildi. Bu xursandchilik yoshlari edi. Onajonim ko’z yoshlarini artib: “Mening a’lochi qizim, mana ko’rdingmi a’lo o’qiganing uchun, kompyuterni bilib, internetdan foydalanganing uchun bu yutuqlarga erishding”, - deb erkaladilar. Keyin yana, “Men seni hech qachon bunday uzoq va go’zal joylarga sayohatga olib bora olmas edim, bolajonim, bunday baxtga sen o’z bilimlaring bilan erishganingdan juda ham mamnunman!” deb, qo’shib qo’ydilar. Men o’ylaymanki, bu katta ғalabani qo’lga kiritishimda internet, kompyuter saboqlari bergan va internet tizimidan keng foydalanishni o’rgatgan ustozimiz R.Badalovning xizmatlari juda katta bo’ldi. Chunki men kabi uy sharoitida kompyuteri va internet tizimi yo’q o’quvchilarga Toshloq tumanidagi 11- maktabda tashkil etilgan internet markazi ayni mudao bo’lganligini alohida aytib o’tishni hohlayman. O’tgan yili yozgi ta’til davrida ham bu ustoz internet markazida ish olib bordilar va juda ko’p o’quvchilarga kompyuter saboqlarini berdilar. Men esa festival boshlangunga qadar har kuni maktab internet markaziga kelib, Xalqaro Rus tili festivalining saytiga kirib, kundalik yangiliklardan xabardor bo’lib turdim.
Internet tizimining imkoniyatlari juda ham cheksiz va beqiyos ekanligi meni yana bir bor xursand qildi. 2011 yilning 13 sentyabr kuni mening elektron manzilimga quvochli xabar keldi. Bu xabarga ilova qilingan fayl bog’lamida Sankt-Peterburg shahriga samolyotda borib kelishim uchun taqdim etilgan elektron chipta qo’yilgan edi. Bu voqea maktabimiz jamoasini ham quvontirdi. Ushbu elektron biletda 2011 yil 25 oktyabr kuni Farg’onadan Rossiya poytaxti Moskva shahriga uchib ketishimiz, so’ngra Moskvadan Sankt-Peterburg shahriga uchib borishimiz ko’rsatilgan edi. Bu yangilikni ustozimiz R.Badalovga ma’lum qildim. Ustoz ham bu yangilikdan xabardor ekanligini aytib, biz bilan festivalga birga uchib borishini ma’lum qilganda men yanada hursand bo’ldim.
Haqiqatdan ham 2011 yil 25 oktyabr, seshanba kuni Farg’onadan Moskvaga “Boing” samolyotida parvoz qildik. Birinchi bor samolyotda parvoz qilishim bo’lgani uchun meni anchagina hayajon bosdi. O’zimni yomon his qilgan paytimda Marina ismli styuardessa darhol “Fanta” ichimligi bilan siyladi. Samolyotimiz kechki payt Domodedova aeroportiga qo’ndi. Kechasi, soat 10 yarimlarda biz Sankt- Peterburg shahriga qarab uchdik. Tungi soat 12da Pulkovo aeroportiga qo’ndik. Bizni kutib olgan yo’lboshlovchi hamrohligida Pulkovo aeroporti yaqinida joylashgan “Park Inn Pulkovo” mehmonxonasiga joylashdik va bu mehmonxonada 12 kun davomida yashab , festival tadbirlarida faol qatnashdik. Internet tarmog’idan keng va o’rinli foydalanish menga va men singari juda ko’p o’quvchilarga foyda keltirganini Sankt-Peterburg shahriga borganimda guvohi bo’ldim.
Festivalning tantanali ochilish marosimi Rossiyaning shimoliy poytaxtidan 50 km masofada joylashgan Pushkin shahridagi “Tsarskoselskiy” madaniyat saroyida bo’ldi. Festivalning tantanali ochilish marosimida jonajon O’zbekistonimiz nomini sharaf bilan himoya qildik. Festivalga jahonning 80ga yaqin davlatlaridan 500dan ortiq g’oliblar tashrif etdilar. Ular orasida 100 dan ortiq g’olib o’quvchilar bor bo’lib, bizlar qadrdon do’stga aylandik. Men Qozog’istondan kelgan o’quvchi qiz Taisiya , Tojikistonlik Farangis , Mongoliyalik Bilgunsayhan, Moldovalik Olga kabi tengdoshlarim bilan do’stlashib qoldim va xozirda biz internet orqali do’stlik aloqalarini davom ettiryapmiz. Men bilan birga Farg’onadan kelgan g’oliblar orasida Marg’ilon shahridagi 23-maktab o’quvchisi Jasurbek, 25-maktab o’qituvchisi K. Zinatulina, 27-maktab rus tili o’qituvchisi I. Zinatulin, Toshloq tumanidagi transport kolleji o’qituvchisi Sh.Nizomov, nafaqadagi pensionerlardan Sanobar opa Umarova, Shohida opa Isaeva va shifokor Gulnora opa Ro’zimatova, hamda mazkur festivalning Farg’ona viloyatidagi targ’ibotchisi, bizlarni internet saboqlari bilan tanishtirgan ustozimiz R.Badalovlarning borligidan xursand bo’ldim. Festival qatnashchilarning barchasi kompyuter va internet tizimidan keng va unumli foydalangani uchun bunday katta yutuqni qo’lga kiritganliklarini yana bir bor tushunib yetdim.
Festival davomida juda ko’p diqqatga sazavor joylarni maroq bilan tomosha qildik. Dunyoga mashhur Ermitaj muzeylar majmuasini, ulug’ rus shoiri Pushkin muzeyini, mashhur “Avrora” kemasini, hukmdor Ekaterina saroyi, Pushkin shahridagi Pavlov muzeylarini borib ko’rdik. Nevskiy prospekti bo’ylab qilgan piyoda sayrimiz davomida ko’pgina tarixiy binolar bilan tanishib, ko’pgina suratlarni oldik. Rossiya hukmdori bo’lgan Petr Birinchi davrida qurilgan me’moriy yodgorliklar bilan tanishdib, Smolniy va G’alaba maydonlarini borib ko’rdik. Birinchi Xalqaro Rus tili festivalini tashkil etgan MAPRYaL tashkiloti joylashgan Sankt-Peterburg Rus tili universitetida bo’ldik va festival tashkiliy ko’mitasiga O’zbekistondan olib kelgan milliy sovg’a-salomlarimizni topshirdik. Festivalning yopilish marosimi Mariinskiy teatrida bo’ldi va u erda biz katta konstert dasturini tomosha qildik.

[Nigora Umarova]

Xulosa qilib aytsam, bu festivaldan men juda katta taassurot oldim. Bu taassurotlarni olishimda va bunday sermazmun anjumanda qatnashib kelishimda kompyuter hamda internetdan foydalanishim katta rol o’ynadi. Shuning uchun ham o’z tengdoshlarimga aytib qo’ymoqchiman: Aziz do’stlar, kompyuter texnologiyalaridan keng va unumli foydalaning, ayniqsa internet manbalaridagi qimmatli ma’lumotlarni dars jarayoniga tadbiq etib, a’lochi o’quvchilar safidan joy oling. Kompyuterdagi turli-tuman, befoyda va dahshatli o’yinlarni o’ynashga behuda vaqtingizni sarf qilmasdan, qimmatli vaqtingizni badiiy kitoblar o’qishga, internetdagi foydali bo’lgan manbalardan foydalanishga va qiziqarli tanlovlar, o’quv dasturlarida qatnashishga sarf qiling! Internet orqali do’stlar izlab toping, ularga jonajon O’zbekistonimiz va uning go’zalligi haqida maktublar yo’llab, serquyosh va jannatmakon o’lkada yashab turganimizni bildiring! Aziz tengdoshlar, bu ishlarni amalga oshirishda kompyuter texnologiyalaridan keng foydalanish biz yashab turgan zamonning zarur talabi ekanligini chuqurroq tushunishga xarakat qilaylik va o’z tengdoshlarimizga ham bu haqda tushunchalar berib, ularni internet degan sayyorada yashashga va ishlashga o’rgataylik! Chunki bu sayyora XXI asr “sayyorasi”dir!
Shahlo Ahmedova – Marg’ilon shahridagi 5-umumiy ta’lim maktabi 6-sinf o’quvchisi.

[Nigora Umarova]

Assalomu alaykum, hurmatli Tanlov hay'ati!
Men ham o'z fikr mulohazalarim bilan sizlar e'lon qilgan tanlovda qatnashishni hohlab, ushbu inshoni yuboryapman.

Salom bilan Jamoldin

Internet tizimi - XXI asr taraqqiyotining garovi

Men,Yo’ldashev Jamoliddin Axatjon o’g’li 1996-yil 2-dekabrda Farg’ona viloyati Toshloq tumanida tug’ilganman. 2003-yili Toshloq tumanidagi 11-umumiy o’rta ta’lim maktabining 1-sinfida o’qiy boshladim. Hozirda shu maktabning 9-“A”sinfida oq’iyapman.
Maktabda o’qish mobaynida darslarni yaxshi o’zlashtirib,berilgan topshiriqlanri bajarish bilan bir qatorda darsdan so’ng juda ko’p faol sinfdoshlarim bilan maktabimiz qoshidagi kompyuter va internet markazi xizmatidan keng foydalanib kelyapman. Internet markazidagi imkoniyatlardan foydalanib, o’tilgan mavzularga oid ma’lumotlarni internet manbalardan izlab topib, ko’proq qiziqarli va kerakli ma’lumotlarni bilib olyapmiz. Ayniqsa internet tizimidagi va electron darsliklardagi ma’lumotlar bizga juda ham ma’qul bo’lyapti. Natijada o’zlashtirishimiz va baholarimiz a’lo bo’layotganidan o’zimiz ham, ustozlarimiz ham xursandmiz.
Kompyuter vositalari va internet tizimi hozirgi hayotimizda asosiy o’rinni egallab kelayotgani katta ahamiyatga ega. Qaysi sohaga qaramang, barcha yerda kompyuter yoki internet tarmog’i zarur bo’layotganini guvohi bo’lyapmiz.
Men 6 - sinfdan buyon maktabimizdagi internet markazga qatnab, kompyuter vositalari bilan ishlashni o’rganib olganman. Hozirgi kunda esa internet markazida yetakchi-volonter sifatida o’quvchlarga kompyuter saboqlarini o’rgatip kelyapman.
Albatta, kompyuter saboqlarini olib, internet tizimida qiynalmay ish olib borishimga ustozlarimdan R.Badalov domla va Q.Usupjonovlar sabab bo’lishgan. O’tgan yili yozgi ta’til davomida bu ustozlarimdan kompyuter sirlarini to’liq o’rganib oldim. Maktabdagi internet markazi orqali darslarimizga tegishli bo’lgan turli ma’lumotlarni izlab topishdan tashqari, chet eldagi maktablar bilan ham do’stlik aloqalari o’rnatganmiz. Masalan, Hindiston poytaxti Dehli va Kalkutta shaharlaridagi maktablar bilan internet aloqalarimiz yaxshi yo’lga qo’yilgan. Hatto hindistonlik do’stlarimiz bizga o’z davlatlarining bayroq va gerblarini ham yubordilar. Maktabimiz internet orqali Argentina, Avstraliya, Yaponiya, AQSH, Braziliya, Beliz, Turkiya, Gretsiya, Rossiya, Buyuk Britaniya, Kosta Rika kabi mamlakatlardagi maktablar bilan aloqa o’rnatgan. Internet orqali olib botayotgan ishlarimiz haqida quyidagi saytimiz orqali bilib olishingiz mumkin:http://tashlak11fergana.zn.uz Do’stlik aloqalarimizning ramzi sifatida maktabimizga kelgan bayroqlar va turli yodgorliklar maktabimiz muzeyida saqlanyapti.
Maktabimizdagi internet markazini tashkil etishda ingliz tili ustozimiz, kompyuter texnologiyalari fidokori, Amerika Qo’shma Shtatlarida malaka oshirib kelgan Rustamjon Badalov katta rol o’ynagan. Ularning sa’y-harakatlari bilan tashkil etilgan bu markaz xizmatidan tumanimizdagi juda ko’p maktablar va hatto Marg’ilon, Quva shahar maktablari ham naf ko’rishgan. 2009 yildan beri internet markazining to’lovlari shu ustozimizning homiyligida amalga oshirilmoqda. Ustozimizning bu ishlari ham bizga yaratilayotgan imkoniyatlarning asosi bo’lib xizmat qilayotgani ham katta yutuq hisoblanadi.
Ana shunday ustozlarimdan olgan samarali bilimlarim natijasida 2011-2012 o’quv yilida Informatika fanidan bo’lib o’tgan tuman olimpiadasida faxrli 1-o’rinni egallab, viloyat bosqichida qatnashdim. Viloyat bosqichida ham birinch o’nlikdan o’rin olishga erishdim. Bu yutuqni qo’lga kiritisghimda kompyuter vositalarini yaxsh bilishim va internet tizimidan unumli foydalanishim alohida ahamiyatga ega bo’ldi deb o’ylayman
Hozirgi zamon yoshlari kompyuter texnologiyalarini yaxshi bilishlari kerakligi yurtboshimiz I.A.Karimov tomonidan bir necha xalqaro anjumanlarda ta’kidlab aytilgan.
Yuqorida qo’lga kiritgan yutuqlarim evaziga maktab ma’muruyati tomonidan “Maqtov yorlig’i” va qimmatbaho sovg’lar bilan taqdirlandim. Bu yutuqlarni qolga kiritishimda menga yo’l-yo’riq ko’rsatgan tajribali ustozlarim Rustamjon Badalov va Qosimjon Usupjonovlarga minnatdorchilik bildiraman.
Shu o’rinda aytmoqchimanki, aziz tengdoshlar, agar imkon topsangiz,albatta, bo’sh vaqtingizni kompyuter saboqlari olishga va internet tizimini o’rganishga sarflang. Chunki XXI asr kompyuter texnologiyalari asri. Maktabingizda mavjud bolgan kompyuter sinflardan unumli foydalaning. O’zingiz o’rganib olganingizdan so’ng boshqalarga ham o’rgatishni asosiy maqsad qilib oling.

Yo’ldashev Jamoliddin, 11-maktab, 9- sinf o’quvchisi, Toshloq tumani

Bu manzillarda maktab internet markazi qilayotgan ishlar haqida ma’lumotlar bor:
http://edugalaxy.intel.ru/?automodule=blog&blogid=7&showentry=2703

http://www.epals.com/media/p/234547.aspx

[Nigora Umarova]

Bu tanlovga tayyorgarlik paytida o’zining maslahatlarini bergan uctozimiz R.Badalovga minnatdorchilik bildiraman.

Internet -bilimlar asosi
Birinchi bor internet bilan tanishuvim rus tili bilan bog’liq bo’lganligini tez-tez eslayman. Dadam va ayamlar rus tili sinflarida o’qib, bilim olishgani uchun bu tilda ular juda ham ravon gapiradilar, ularga havasim keladi. Dadam viloyatimizda rus tilida chop etiladigan “Ferganskaya pravda” gazetasiga har yili obuna bo’lishadi. Ancha yillardan beri bu gazeta har juma kunlari xonadonimizga yetib keladi. 2011 yilning 22 aprel kungi voqea juda yaxshi esimda qolgan. Shu kuni “Ferganskaya pravda” gazetasining 21 aprelda chop etilgan 16 sonini xabarchi uyimizga tashlab ketgan edi. Kechqurun dadam gazetani ko’zdan kechirib o’tirib, birdan “Juda zo’rku!” deb hitob qildi va gazetada chop etilgan tanlov haqidagi ma’lumotni gapirib, bu tanlov juda ham foydali ekanligi, unda qatnashgan insonlar bilimlarini mustahkamlashi va xatto Rossiyaga bepul borib kelishi uchun imkon borligi to’g’risida yozilganini aytdi. Shundan so’ng men ham “Ferganskaya pravda” gazetasidagi “Yazыk do Sankt-Peterburga dovedet” maqolasi bilan tanishib chiqdim. Bu maқolada butun dunyo bo’ylab rus tilini o’rganayotgan kishilar uchun juda katta imkoniyat sifatida qiziqarli tanlov e’lon qilinganini bilib oldim. Maқola so’ngida esa, tanlovda qatnashish istagi bor kishilarni Toshloq tumanidagi 11- sonli umum ta’lim maktabi internet markazi xizmatlaridan bepul foydalanishga taklif qilingan edi. Bu taklif ota-onamga va menga juda ma’qul keldi. Nega deganda biz yashab turgan ipakchilar mavzesidagi maktablarda haligacha yangi rusumdagi kompyuterlar yo’q. Borlari esa eski rusumda bo’lib, ularning ko’pi ishlamaydi. Shaharchamizdagi kompyuter xizmati ko’rsatadigan internet kafelar esa soatiga 1000 so’m miqdorida to’lov puli oladi. Bu, kam ta’minlangan oila farzandlari uchun juda ko’p hisoblanadi. Dadamning kallasiga kelgan fikr hammamizni xursand qildi. Ularning maslahatiga ko’ra men Toshloq tumanidagi 11-maktab internet markaziga har kuni boradigan bo’ldim. Ota-onamning fikricha har kuni internet kafega 1000 so’m to’lab, turli-tuman va keraksiz kompyuter o’yinlarini o’ynab vaqt o’tkazishdan ko’ra, Toshloq tumanidagi 11- maktabning internet markaziga borib, markaz xizmatidan foydalanish ma’qul ekanligini tushundim. Chunki u yerda bepul kompyuter saboqlarini olish va internetdan foydalanish bilan birga tillarni ham o’rganishimga imkon borligi meni quvontirdi.
Uyimiz yonidan qatnaydigan 34-sonli Farg’ona Quva yo’nalishidagi avtobus 11-maktab yonida to’xtab o’tishini bildik va dadam bilan shu maktabning internet markaziga bordik. Dadam bilan gaplashgan kishi 55-60 yoshlarda bo’lib, shu markazining ko’ngilli ma’muri ekan. Bu ustoz shu maktabda ingliz tili o’qituvchisi bo’lib, darsdan so’ng internet markazini boshqarar ekanlar. Shunday qilib men internet markaziga 34-avtobusda qatnay boshladim. Endi dadam menga internet kafega kirib kompyuter saboqlari olishim uchun avvalgidek, to’la 1000 so’m emas, balki 11-maktabga borib kelishim uchun yo’l kiraga, faqat 400 so’m bera boshladilar. Chunki maktab biz turgan joydan 8 km masofada joylashgan bo’lib, 200 so’m borishga va 200 so’m qaytishimga sarf bo’lishini avtobus haydovchilaridan bilib oldim. Men har kuni qatnashim tufayli haydovchilar bilan ham yaqindan tanishib qoldim. Ulardan Botir aka, Avaz aka, Abdujabbor aka kabi haydovchilar kompyuterga va rus tilini o’rganishga bo’lgan qiziqishimni ko’rib, ba’zida yo’l kira haqini ham olmay qo’ydilar. Yo’l kira haqi o’rniga menga rus tilida savollar berib, javob olishga xarakat qildilar. Men kompyuter saboqlari, rus va ingliz tillarini ustozimiz Rustamjon Badalov rahbarligida, juda ko’pchilik o’quvchilar qatori, bepul ravishda o’rgana boshladim.

[Nigora Umarova]

Tez orada kompyuter bilan muloqat qilishni bilib oldim va internet tarmog’idan foydalanishni o’rgandim. Internet men uchun boshqa bir olam bo’lib qoldi. Internet imkoniyatlari juda cheksiz ekanligi meni hayratga soldi. Nega desangiz, bir tugmachani ezib, bir necha dasturga kirib anchagina yozuv ishlarini bajarish mumkin ekan. Yana bir tugmachani ezib, dunyoning turli burchaklaridagi do’stlar bilan aloqa qilish mumkinligi meni qiziqtirdi. Ana shu imkoniyatlardan foydalanib, markaz rahbari R.Badalov ko’magida internet loyihalarda qatnasha boshladim. Ana shunday loyihalardan biri Birinchi Jahon Rus tili festivalida qatnashish mumkinligi to’g’risida ustozimiz R.Badalovdan to’liq ma’lumot oldim va bu tanlovda sirtdan qatnasha boshladim. Festivalning sirtqi topshiriqlaridan birinchisi rus tilidagi test savollari bo’lib, ularga javob berishda internet manbalari va xizmatidan keng foydalandim. Test savollariga bergan javoblarim to’g’ri ekanligi va tanlovning birinchi turida g’olib bo’lganimni elektron pochtamga kelgan xatdan bilib oldim. Oldinda festivalning keyingi topshirig’i bo’yicha rus tilida “Sankt-Peterburg meni qanday kutib oladi?” degan mavzuda insho yozib, uni ham elektron pochta orqali festival manziliga yubordim. Albatta bu ishlarni amalga oshirishimda 11-maktab internet markazi rahbari R.Badalov o’z maslahatlari bilan katta yordam ko’rsatdi. 2011- yil iyun oyining boshlarida, anigi 9- iyun kuni tanlov g’oliblari e’lon qilindi. Bu haqdagi xabarni ham elektron pochtamga kelgan taklifnomadan bilib oldim. G’oliblar orasida meni ham borligim, meni yanada ko’proq kompyuter va internet tarmoqlaridan foydalanishga etakladi. Bu yutuqqa juda ko’p sinfdoshlarimning havaslari keldi. Ularning ko’pchiligi kompyuter o’yinlari o’ynashni juda yoqtiradilar, ammo internet tarmoqlarida ishlashga, tanlovlarda qatnashishga juda ham qiziqmaydilar. Bu holatlarni eslasam, men dadamning maslahatlariga kirib, 11-maktabdagi internet markaziga borib, kompyuter va internet sohalarida kerakli bilimlarni olayotganimdan xursand bo’lib, ba’zan g’ururlanib ham ketaman. Chunki, maktabimiz tarixida bunday xalqaro tanlovda hali hech bir o’quvch g’olib bo’lmaganini eslasam, bu ulkan g’alabani qo’lga kiritishimda kompyuter texnologiyalarini bilishga qiziqqanim va internetdan foydalanishni o’rganib olganimga xursand bo’laman.
Butun Jaҳon bo’yicha o’tkazilgan rus tili festivali doirasidagi Internet tanlovda qo’lga kiritgan yutug’im, mening hayotimdagi eng quvochli kun bo’ldi. Internet va kompyuter tizimi mening asosiy maktabimga aylandi. Nega deganda maktab kutubxonasidan topolmagan kitoblarni yoki kerakli manbalarni albatta internet tarmog’idan izlab topish mumkin ekanligini tushunib yetdim va bu haqida sinfdoshlarimga ham tushuntirdim. Hozirgi kunda ularning ko’pchiligi men bilan birga 11-maktab qoshidagi internet markaziga kelib, kompyuter saboqlarini olyaptilar. Yana, internet tizimi orqali jahondagi barcha mamlakatlar bilan juda tez daqiqalarda bog’lanish mumkinligi menga juda yoqadi. Boshqa davlatlardagi maktab o’quvchilari bilan do’stlik aloqalarini o’rnatishda ham internet imkoniyatlaridan foydalanib, do’stlar orttirish mumkinligi xuddi ertakka o’xshaydi. Dadamning aytishicha, o’zlari ham maktabda o’qib yurgan paytida Germaniya, Avstraliya, Hindiston kabi mamlakatlardagi maktab o’quvchilari bilan xat orqali do’stlashgan ekanlar. Ammo ular yozgan xatlar 2-3 oyda pochta orqali etib kelgan ekan. Hozir esa biz internet orqali yozgan xabarlarimiz bir necha daqiqa ichida dunyoning narigi chetida joylashgan maktablarga yetib borayotgani va darhol javoblar ham yetib kelayotgani juda ham ajablanarli holat hisoblanadi. Bu esa kompyuter texnologiyalari va internet tizimini juda tez rivojlanib borayotganidan darak beradi.
Internet tizimi bilan uchrashgan dastlabki paytda men bepul ravishda qaysidir mamlakatga borishim mumkinligini ko’z oldimga keltirganim yo’q. Lekin Butun Jaҳon Rus tili festivali tanlovida g’olib chiqib, ustozlarim va tengdoshlarim bilan Sankt-Peterburg shahriga borib kelganimdan so’ng bunday imkoniyatni yaratish har bir insonning o’z qo’lida ekanligini yana bir bor to’liq tushunib yetdim.
Internet markazimiz xizmatidan foydalangan kishlardan 9 nafari bu tanlovda g’olib bo’lganimizni eslasam, rosa quvonaman. Ayniqsa, g’oliblar birgalikda 2011 -yil, 25- oktabr kuni “Boing” rusumli havo kemasida Farg’ona shahridan Moskvaga uchib borganimiz, Domodedova aeroportida bo’lganimizni tez-tez eslab, shirin orzularim amalga oshgani bilan mag’rurlanaman. Domodedova aeroportida bo’lgan paytimizda esa, guruhimizdagi tengdoshim Shahlo bilan aeroport liftlarda va ekskalatorlarda mazza qilib uchganimizni maroq bilan esga olaman. Bu shirin orzularning barchasi internet va kompyuterdan yaxshi foydalanganim uchun amalga oshgan deb hisoblayman. Sankt-Peterburg shahri yaqinida joylashgan Pushkin shaҳarchasida Jaҳon Rus tili festivalining ochilish marosimi hozirgacha esimda. Dunyoga taniqli bo’lgan rus shoiri Pushkin yurgan ko’chalardan bizlar ham yurib o’tdik. Ulug’ Vatan urishi davrida ҳalok bo’lganlar hotirasi uchun tashkil etilgan Piskareva yodgorlik majmuasini borib ko’rdik. Nevskiy nomli katta va keng ko’chada sayr qildik. Menga Ermitaj muzeyi juda ham yoqdi. Bu muzeyda juda ko’p qadimgi asori-atiqalar saqlanar ekan. Biz qadimgi rus hukmdori Petr Birinchi yashagan yog’och uyni ham ko’rdik. “Avrora” kreyserida joylashgan muzeyni tomosha qildik.
Sankt-Peterburgda 12 kun davom etgan bu sayohatimiz davomida “Park Inn Pulkovo” mehmonxonasida yashab turdik. Mehmonxonada menga eng yoqib qolgani, nonushta, tushlik va kechki ovqatlarning tashkil etilshi bo’ldi. Nega deganda, siz o’zingizga yoqqan va istagan ovqatlarni tanavvul qilishingiz mumkin ekan. Har kim o’zi uchun o’zi taomlarni tanlab olib, tanavvul qilar ekan. Bunday ovqatlanish tartibi “Shved stoli” deb nomlanar ekan. Bu juda katta sarf- harajatlarni talab qilar ekan.
Umuman aytadigan bo’lsam, kompyuter va internetdan foydalanishni bilganim tufayli bo’lib o’tgan xalqaro tanlovda qatnashganimdan juda-juda xursandman. Nega deganda, ota-onam men uchun 3000 amerika dollari to’lab, meni hech qachon Rossiyaga olib bormasligini juda yaxshi bilaman. Ammo kompyuter bilan yaxshi tanishib olishimda, internetda izlanib, Rossiyaning Sankt-Peterburg shahriga borib Festivalda qatnashib kelishimda Toshloq tumanidagi internet markazining ustozlari, jumladan R.Badalov katta yordam berganligini doimo esda tutib kelyapman. Internet tizimi kelajak hayotimizda biz yoshlarga juda ham zarur ekanligini, u orqali biz ko’pgina foydali ishlarni amalga oshirishimiz mumkin ekanligini tengdoshlarim bilishlari kerak deb o’ylayman. Tez kunlar ichida yozgi ta’til ham boshlanadi. Aziz tengdoshlarim, sizlar ham bizlarga o’xshab o’z maktabingizda yozgi kompyuter va internet o’quvlarini tashkil eting. Bu boradagi fikr-mulohazalaringizni o’z ustozlaringizga bildiring. Agar bu boradagi ishlarni tashkil etishda qiyinchilik yoki muammolar paydo bo’lsa, bizning internet markazimizga keling. Biz doim o’z yutuqlarimizni boshqalar bilan baham ko’rishga tayyormiz. Toshloq tumanidagi 11-umumiy ta’lim maktabi qoshidagi internet markaziga xush kelibsiz, aziz do’stlar!

Jasurbek Jahongir o’g’li – Toshloq tumanidagi 11-maktab
Quyidagi manzilda esa internet markazining yutuqlari haqida maqolalar bor. http://news.olam.uz/nauka/4410.html
http://edugalaxy.intel.ru/?automodule=blog&blogid=18161&showentry=2915

[Уктам]

5) Milliyligi (mos kelgani) uchun.

[April]

Авваламбор, TPS компанияси жамоаси болажонларни бўлиб ўтган “Халқаро болаларни ҳимоя қилиш куни” билан табриклайди. Чин юрагимиздан барча болажонларга мустаҳкам соғлик, бахтли болалик ва келажакда муваффақиятлар тилаймиз.
TPS компанияси, болаларнинг ўз истеъдод ва маҳоратларини намойиш этишига имконият яратган “Интернет - менинг ҳаётимда” болалар расм танлови ташкилотчиларига миннатдорчилик билдиради.
Бугунги кунда Интернет бу нафақат катта ёшдаги инсонлар, балки болалар ва ўсмирлар хаётининг муҳим қисмидир. Танловда намойиш этилган расмлардан ҳулоса чиқарадиган бўлсак, Интернет болажонлар учун рангбаранг ва завқли, чексиз ва янги таасуротларга бой дунёдир. Мамнуният билан таъкидлаб ўтамизки, TPS бугунги кунда ушбу дунёга эшик очиб, Интернет-провайдинг ҳизматларини амалга оширмоқда. Албатта, танловда намойиш этилган барча асарлар эътиборга лойиқ. Танлов якуний баҳоларидан қатъий назар, TPS компанияси танловда иштирок этаётган 9, 10 ва 11 рақамли асарлар муаллифларининг эсталик совғалари билан тақдирлашга қарор қилди.
Танлов ташкилотчилари ёки 9, 10 ва 11 сонли расм муаллифлари (ёки уларнинг ота-оналари) TPS компаниясининг эсталик совғаларни олиш учун (+998 97) 783-81-68 рақамига қўнғироқ қилишини сўраймиз.

[Nigora Umarova]

Kecha "Internet mening hayotimda" mavzusida ijodiy ishlar tanlovining marg'ilonlik qatnashchilarini taqdirladik. Marg'ilon shahar 5-11-maktab o'quvchilari o'z ijodiy ishlari-ijodiy bayonlarini yuborishgan ekan.
Tanlov e'lon qilinganiga 2 oy vaqt o'tgan bo'lishiga qaramay o'qituvchilarning befarqligi tufayli juda kam ijodiy ishlar oldik. Yuqorida raqamlari keltirib o'tgan maktab o'quvchilari o'qituvchisining tashabbusi bilan internetning o'qish faoliyatlarida tutgan o'rni haqida yaxshigina yoritib berishibdi. O'quvchilarni tashabbus ko'rsatishlarida tashabbuskor o'qituvchi-ustoz Rustam Badalovning hissalari katta. O'qituvchi Rustam Badalovga, Marg'ilon shahar 5-umumtalim maktabining 6-sinf o'quvchisi Shahlo Ahmedovaga, Toshloq tumani 11-maktabning 9-sinf o'quvchisi Yo'ldoshev Jamoliddinga, Jasurbek Jahongir o'g'liga tanlovga befarq qaramaganliklari uchun o'z minnatdorchiligimizni bildiramiz.
Marg'ilonlik o'quvchilarga o'z esdalik sovg'alarimizni berib yubordik.

https://img.uforum.uz/images/cxgsbvr9648135.jpg

[Nigora Umarova]

Бугун UZINFOCOM марказида ZiyoNET ахборот ресурс тармоғи ҳамда "Ўзбекистон" радиоканалининг "Болалар ва ўсмирлар" бош таҳриррияти билан ҳамкорликда мактаб ўқувчилари ўртасида ўтказилган "Интернет менинг ҳаётимда" мавзусидаги иншолар ва расмлар танлови ғолибларини тақдирлаш маросими бўлиб ўтди.
Расмларни чизиш бўйича пойтахтимизнинг Олмазор туманидаги 310-мактаб ўқувчиларининг чизган расмлари муносиб фахрий ўринни эгаллади.

1-ўрин. Эргашев Дониёр. 310-мактабнинг 7-"Б" синф ўқувчиси (6, 7,8,9, 10, 11-расмлар муаллифи).
2-ўрин. Ниғматиллаева Мафтуна. 310-мактабнинг 6-"Б" синф ўқувчиси (5-расм муаллифи)
3-ўрин. Иноғомова Насибахон. 310-мактабнинг 8-"Г" синф ўқувчиси. (1-расм муаллифи).

Рағбатлантирувчи ўринлар:
310-мактабнинг 5-"Б" синф ўқувчиси Абдувалиев Суннатилла (2-3-расмлар муаллифи)
310-мактабнинг 5-"Б" синф ўқувчиси Маҳкамова Одинахон (4-расм муаллифи).

ZiyoNET ахборот ресурс тармоғи биз билан ҳамкорлик қилган ва ғолибларни тақдирлаш учун ўз ҳиссасини қўшган TPS провайдери (http://www.tps.uz/)га ўз миннатдорчилигини билдиради.
Ғолибларга TPS провайдери ҳамда ZiyoNET ахборот ресурс тармоғининг эсдалик совғалари топширилди.

https://img.uforum.uz/images/afexzfv5414675.jpg

[Nigora Umarova]

https://img.uforum.uz/images/gsxhmkn6407056.jpg

TPS провайдерининг савдо ишлари бўйича координатори Мақсудов Ҳусан ғолибларга ўз компаниясининг эсдалик совғаларини тақдим этмоқда.

https://img.uforum.uz/images/zmjozed6757537.jpg

https://img.uforum.uz/images/ifnpbkm9486995.jpg

https://img.uforum.uz/images/mtwdthw6798288.jpg

Ҳар бир расм ўзгача маънога эга. Буни ўқувчиларнинг расмга қилган изоҳларидан ҳам билиб олиш мумкин.

[Nigora Umarova]

Агар устозлари Дадабоева Наима ташаббускорлик билан ўқувчиларига танлов ҳақида маълумот бермаганида болажонлар танловда қатнаша олишмасди.

https://img.uforum.uz/images/ndtpavs2332249.jpg

https://img.uforum.uz/images/omdytvm4880103.jpg

Ҳар қандай саъй-ҳаракат албатта ўз натижасини беради.

[Anvar Atakhanov]

Ҳар қандай саъй-ҳаракат албатта ўз натижасини беради.
Болалар хурсанд. Бу жуда яхши!

[Ergash Yuldashev]

12 июнь 2012 йил UZINFOCOM марказида ZiyoNET ахборот ресурс тармоғи ҳамда "Ўзбекистон" радиоканалининг "Болалар ва ўсмирлар" бош таҳриррияти билан ҳамкорликда мактаб ўқувчилари ўртасида ўтказилган "Интернет менинг ҳаётимда" мавзусидаги иншолар ва расмлар танлови ғолибларини тақдирлаш маросими бўлиб ўтди.
Расмларни чизиш бўйича Олмазор туманидаги 310-мактаб ўқувчиларининг чизган расмлари муносиб фахрий ўринни эгаллади.
Хозирда 310-мактабига ХТВ тасарруфидаги Аниқ фанларга ихтисослаштирилган Давлат умумтаълим мактаби мақоми берилган.
Танлов ташкилотчиларига мактаб маъмурияти ва ўқувчилари номидан ўз миннатдорчилигимизни билдирамиз.
Келажакда ташкил этиладиган танловлардан бехабар қолмаймиз деган умиддамиз.

[Nigora Umarova]

Marg'ilon shahar 5-11-maktab o'quvchilari o'z ijodiy ishlari-ijodiy bayonlarini yuborishgan ekan.
O'qituvchi Rustam Badalovga, Marg'ilon shahar 5-umumtalim maktabining 6-sinf o'quvchisi Shahlo Ahmedovaga, Toshloq tumani 11-maktabning 9-sinf o'quvchisi Yo'ldoshev Jamoliddinga, Jasurbek Jahongir o'g'liga tanlovga befarq qaramaganliklari uchun o'z minnatdorchiligimizni bildiramiz.
Marg'ilonlik o'quvchilarga o'z esdalik sovg'alarimizni berib yubordik.

Салом Нигорахон, озрок кеч колдим, чунки Шахло Ахмедова ва Жасурбеклар оромгохда эканлар. Шахло кеча кайтиши билан уларнинг уйига бориб, кеч булсада расмга олиб юборяпман. Жасурбек хам эртага оромгохдан келар экан. Келиши билан расмини олиб юбораман. 1,2,3 -расмларда эса мактаб директори М.Абдуллаева 9 -синф укувчиси Жамолиддинга, ва укитувчи Р.Бадаловга совгаларни топшираётган пайти тасвирланган.

Салом билан Р.Бадалов.


https://img.uforum.uz/images/mhtcclv3014102.jpg

https://img.uforum.uz/images/dlolkhj9394043.jpg

https://img.uforum.uz/images/pkhsyoe5821993.jpg

https://img.uforum.uz/images/xmpxgjh562744.jpg

[Nigora Umarova]

Гарчи "Интернет - менинг ҳаётимда" танлови якунланган бўлса-да, ҳанузгача манзилимизга хатлар келиши давом этмоқда.
Тошкент шаҳар, 145-мактаб ўқувчиси Анеля Дусаеванинг чизган расми ҳамда иншоси ҳам бизни бефарқ қолдирмади.

https://img.uforum.uz/images/fpsngjy4918890.jpg