Янги Президент, янги давр билан !

[Shokir Dolimov]

ЯНГИ ПРЕЗИДЕНТ, ЯНГИ ДАВР БИЛАН !

Қадрли юртдошлар, миллатдошлар, диндошлар ва қуролдош дўстлар!

Барчангизни давлатимизнинг янги раҳбари, яъни Ўзбекистон Республикаси Президенти, Қуролли Кучлар Олий Бош қўмондони сайлангани, юртимиз тарихида янги давр бошлангани, халқимиз бунёдкор ҳаёт, ижобий ўзгаришлар, юксак марралар, янги ғалабалар сари йўл олгани билан табриклайман!

Ҳеч шубҳа йўқ-ки, юртбошимиз бунёдкор, ҳалол ва меҳнаткаш халқимизни тараққиёт сари етаклайди, ички ва ташқи сиёсатни тўғри ва чиройли олиб боради, халқаро майдонларда катта обрў қозониб, ўзбек заминини ҳар ерда муносиб ифода этади, диний, ижтимоий, сиёсий ва иқтисодий масалаларни миллат манфаати йўлида янада ривожлантиради.

Янги лавозимда Шавкат Миромонович Мирзиёевга улкан зафарлар, омад, куч ва қудрат, энг муҳими – мустаҳкам соғлик тилаб қоламиз. Оллоҳ ўз амаллари ила ўзбек халқи қалбида умид учқунини, бетакрор юртимизнинг келажагига бўлган ишонч туйғусини уйғота билган Шавкат Миромоновичга тўғри, ҳақ йўл кўрсатсин, бутун бошли юртга раҳбарлик қилиш жараёнидаги ҳар қандай мушкул ишини Ўзи осон қилсин, хайрли ишларига ривож берсин.

Келинг дўстлар, хонимлар ва жаноблар, ҳаммамиз бирлашайлик, ниятни яхши қилайлик, миллий манфаатларимиз, Ватанимизни ҳар томонлама равнақ топтириш, унинг тинчлиги, хавфсизлиги, суверенитети, ҳудудий яхлитлигини таъминлаш йўлида бир ёқадан бош чиқариб, ҳар биримиз ўз ўрнимизда Шавкат Миромоновичга, демакки, юртимиз ҳукумати, вазирлик ва идораларига қўлдан келганча ёрдам берайлик. Агар у ёки бу масалани танқид қиладиган бўлсак, одоб сақлаган ҳолда, ҳеч кимни ҳақорат қилмай, туҳмат ва маломат тошларини ёғдирмай, ғийбат билан шуғулланмай, соғлом ва асосли танқид қилайлик.

Оллоҳ иймонимизни зиёда қилсин, миллий ўзлигимиздан айирмасин, юртимизни тинчлик-омонликда сақласин, халқимизнинг ризқини баракали қилсин, саноатимиз, илм-фанимиз, қишлоқ хўжалигимизни тараққий айлаб, натижаларини самарали қилсин, бугунги танловимизни тўғри ва фойдали қилсин, ўзбекнинг ютуқларини кўра олмайдиган, тилимиз ва миллий-диний анъаналаримиз, қадриятларимиз, урф-одатларимизни ҳурмат қилмайдиган, доимо ҳукуматимиздан норози юрадиган нокас ва нонкўрларни, яъни динимиз ва миллатимизнинг ички ва ташқи душманларини сўқир қилиб, юзини тескари қилсин, маддоҳлар-у, ёлғончиларни гунг қилсин, халқ ҳақини еб ўрганганларнинг жазосини берсин.
Оллоҳ ўзбекни асрасин!